Foto: express.co.uk

Balide Agung janartauınan köterilgen kök tütin 4 mıñ metr biiktikke jetip, ıstıq magmanıñ kraterdiñ kerneuine köteriluine baylanıstı barlıq äue kompaniyalarına eskertu jasaldı. Qızıl deñgeyli qauip jönindegi eskertu janartaudıñ atqılau ıqtimaldılığı tolıqtay rastalğanın körsetedi. Bir aptada ekinşi ret dabıl qağılıp otırğandıqtan, birqatar äue bağıttarı öz reysterin keyinge şegerdi. Balige bağıt alğan nemese elge qaytatın turisterge öz äue kompaniyalarımen baylanısqa şığıp, reystiñ uaqıtın naqtılau qajet. 

Bali - eñ tanımal turistik bağıttardıñ biri. Degenmen älem halqı jii tañdaytın Kuta men Seminyak demalıs aymaqtarı janartaudan 70 km qaşıqtıqta ornalasqan. Jergilikti bilik ökilderi janartauğa 7,5 km jaqın aymaqta twratın azamattarğa osığan deyingi üyrenşikti qalıpta, artıq şusız basqa qauipsiz aymaqtarğa qonıs audaruı qajettigin eskertti. Sonday-aq janartau mañındağı twrğındarğa ulı tütinnen saqtanu üşin betperdeler (maska) taratıldı.

Volkonolog mamandar tütinnen qwralğan bwlttar Balidiñ şığısındağı Lombok aralına qaray ığısqanın aytadı. Ondağı eñ ülken äuejay jabıldı. Balidiñ Tötenşe jağdaylar jönindegi qızmeti öziniñ tvitter paraqşasında Lomboktıñ Mataram qalasında kül aralas jauın jauğanın habarladı.

Osı jıldıñ basında kezekti janartau atqılau qaupinen saqtanıp, basqa öñirlerge qonıs audarğan 140 mıñ adamnıñ 25 mıñı äli de uaqıtşa baspanalarda twrıp jatır. Olar qırküyek ayınıñ soñında öz üylerine oraladı dep kütilgenimen, janartau mañı äli de qauipti aymaq esebinde qalıp otır.

Resmi derekterge säykes, janartau sebebinen bolğan evakuaciya Balidiñ turizm salasına 110 mln euro köleminde şığın keltirgen. Bali Tınıq mwhitındağı tektonikalıq taqtalar jii soqtığısatın seysmikalıq "Ottı saqina" aymağında ornalasqan. Mwnda şamamen 130 -day belsendi janartau bar. Agung janartauı soñğı ret atqılağan 1963 jılı mıñ adam qaza tapqan.

“The Qazaq Times”