فوتو: express.co.uk

باليدە اگۋنگ جانارتاۋىنان كوتەرىلگەن كوك ءتۇتىن 4 مىڭ مەتر بيىكتىككە جەتىپ، ىستىق ماگمانىڭ كراتەردىڭ كەرنەۋىنە كوتەرىلۋىنە بايلانىستى بارلىق اۋە كومپانيالارىنا ەسكەرتۋ جاسالدى. قىزىل دەڭگەيلى قاۋىپ جونىندەگى ەسكەرتۋ جانارتاۋدىڭ اتقىلاۋ ىقتيمالدىلىعى تولىقتاي راستالعانىن كورسەتەدى. ءبىر اپتادا ەكىنشى رەت دابىل قاعىلىپ وتىرعاندىقتان، بىرقاتار اۋە باعىتتارى ءوز رەيستەرىن كەيىنگە شەگەردى. باليگە باعىت العان نەمەسە ەلگە قايتاتىن تۋريستەرگە ءوز اۋە كومپانيالارىمەن بايلانىسقا شىعىپ، رەيستىڭ ۋاقىتىن ناقتىلاۋ قاجەت. 

بالي - ەڭ تانىمال تۋريستىك باعىتتاردىڭ ءبىرى. دەگەنمەن الەم حالقى ءجيى تاڭدايتىن كۋتا مەن سەمينياك دەمالىس ايماقتارى جانارتاۋدان 70 كم قاشىقتىقتا ورنالاسقان. جەرگىلىكتى بيلىك وكىلدەرى جانارتاۋعا 7,5 كم جاقىن ايماقتا تۇراتىن ازاماتتارعا وسىعان دەيىنگى ۇيرەنشىكتى قالىپتا، ارتىق شۋسىز باسقا قاۋىپسىز ايماقتارعا قونىس اۋدارۋى قاجەتتىگىن ەسكەرتتى. سونداي-اق جانارتاۋ ماڭىنداعى تۇرعىندارعا ۋلى تۇتىننەن ساقتانۋ ءۇشىن بەتپەردەلەر (ماسكا) تاراتىلدى.

ۆولكونولوگ ماماندار تۇتىننەن قۇرالعان بۇلتتار ءباليدىڭ شىعىسىنداعى لومبوك ارالىنا قاراي ىعىسقانىن ايتادى. ونداعى ەڭ ۇلكەن اۋەجاي جابىلدى. ءباليدىڭ توتەنشە جاعدايلار جونىندەگى قىزمەتى ءوزىنىڭ تۆيتتەر پاراقشاسىندا لومبوكتىڭ ماتارام قالاسىندا كۇل ارالاس جاۋىن جاۋعانىن حابارلادى.

وسى جىلدىڭ باسىندا كەزەكتى جانارتاۋ اتقىلاۋ قاۋپىنەن ساقتانىپ، باسقا وڭىرلەرگە قونىس اۋدارعان 140 مىڭ ادامنىڭ 25 مىڭى ءالى دە ۋاقىتشا باسپانالاردا تۇرىپ جاتىر. ولار قىركۇيەك ايىنىڭ سوڭىندا ءوز ۇيلەرىنە ورالادى دەپ كۇتىلگەنىمەن، جانارتاۋ ماڭى ءالى دە قاۋىپتى ايماق ەسەبىندە قالىپ وتىر.

رەسمي دەرەكتەرگە سايكەس، جانارتاۋ سەبەبىنەن بولعان ەۆاكۋاتسيا ءباليدىڭ تۋريزم سالاسىنا 110 ملن ەۋرو كولەمىندە شىعىن كەلتىرگەن. بالي تىنىق مۇحيتىنداعى تەكتونيكالىق تاقتالار ءجيى سوقتىعىساتىن سەيسميكالىق "وتتى ساقينا" ايماعىندا ورنالاسقان. مۇندا شامامەن 130 -داي بەلسەندى جانارتاۋ بار. اگۋنگ جانارتاۋى سوڭعى رەت اتقىلاعان 1963 جىلى مىڭ ادام قازا تاپقان.

“The Qazaq Times”