Foto: APF

AQŞ Prezidenti Donal'd Tramp Filippinniñ memleket basşısı Rodrigo Dutertemen qarım-qatınası öte jaqsı deñgeyde ekenin jetkizdi. Mwnday mälimdeme olardıñ Manila qalasında bolğan kezdesulerinen keyin jasaldı. Osığan deyin AQŞ Fillipindegi naşaqorlardı sottıñ şeşiminsiz öltiru sayasatın ayıptağan bolatın. Rodrigo Duterteniñ adam qwqıqtarına qayşı keletin şaraları turalı sın pikir bildirip kelgen Donal'd Tramptıñ oyı ayaq astınan nege özgergeni belgisiz. 

AQŞ-tıñ Donal'd Tramptan aldıñğı basşılığı da 4 mıñğa juıq adamnıñ ölimine sebepker bolğan Rodrigo Duterteniñ esirtkige qarsı soğıs sayasatın qoldamağan bolatın.  Donal'd Tramp pen Rodrigo Duterteniñ Oñtüstik-şığıs Aziya memleketteriniñ Asean sammitindegi alğaşqı kezdesui kezinde de qos el basşısı bir-birine qarsı pikir bildirgen salqın közqarastarımen este qalğan edi.

Soñğı kezdesuden keyin Donal'd Tramp adam qwqıqtarınıñ qorğaluın talap etetin bastaması turalı jurnalisterdiñ swrağına jauap bergen joq. Al Rodrigo Duterteniñ baspasöz hatşısı kezdesu barısında bwl taqırıpta äñgime qozğalmağanın ayttı. Aq üydiñ baspasöz qızmetiniñ ökili Sara Sanders keyinnen Donal'd Tramp adam qwqıqtarı turalı oy qosqanın, biraq qısqa qayırğanın habarladı.

2016 jıldan beri Fillipindi naşaqorlıqtan tolıqtay tazartu maqsatında, qolğa tüsip, qarsılıq bildirgen küdikti azamattardı oqiğa ornında sottıñ şeşiminsiz birden öltiruge rwqsat beretin Duterte sayasatı älemdik qauımdastıq tarapınan qatañ sınğa wşırağan.

Sammit qatısuşılarına arnalğan keşki as barısında sahnağa şığıp, fillipindik mahabbat turalı än şırqağan Rodrigo Duterte bwl öneri AQŞ-tıñ äsker basşısınıñ tapsırısımen orındalğanın jetkizdi. Däl osı uaqıtta Manila köşelerinde Donal'd Tramptıñ Fillipinge keluine baylanıstı narazılıq şeruleri bolıp ötti. "Tramp üyiñe qayt!" degen wrandağı plakattarmen köşege şıqqan halıqtı policiya küştep tarattı.

Donal'd Tramp Fillipindegi sammitke qatısuı arqılı öziniñ Aziya elderine bağıttalğan resmi saparın ayaqtadı. Osığan deyin Qıtay, Japoniya, Oñtüstik Koreya men V'etnamda bolğan AQŞ basşısı birqatar mañızdı öñirlik jäne älemdik mäselelerdi talqıladı.

“The Qazaq Times”