Foto: APF

Aldağı uaqıtta Ispaniya Konstituciyasına  aymaqtardıñ täuelsizdik turalı referendumdar ötkizuine rwqsat beretin bölim engizilui mümkin. Bwl turalı VVS-ge bergen swhbatı barısında Ispaniyanıñ Sırtqı İster ministri Al'fonso Dastis habarladı. 

Bwl jañaşıldıq Kataloniyada ötken referendumğa baylanıstı tuındağan sayasi dağdarıstıñ qaytalanbauı üşin qolğa alınbaq. Degenmen bwl Ispaniyanıñ Kataloniya äreketin aqtağanın bildirmeydi. Öytkeni Kataloniyanıñ bwrınğı basşıların twtqındau turalı bwyrıqqa qarsı narazılıq şeruleri ötip jatqanına qaramastan, Ispaniyanıñ Joğarğı Sotı referendumdı "Konstituciyağa qayşı jäne zañdı küşi joq" dep tapqan pikirin özgertpedi.

Sırtqı İster ministri katalondıqtardıñ täuelsizdikke wmtılısına män berip, Konstituciyağa özgeris engizu mümkindigin zertteu üşin Parlamentte arnayı komitet qwrılğanın jetkizdi. Ol sonday-aq sayasi dağdarıs saldarınan zardap şekken katalondıqtardan keşirim swradı. Osıdan bwrın Al'fonso Dastis policiyamen qaqtığıs sätinen jariyalanğan keybir suretterdiñ jalğan ekendigin aytqan bolatın.

Konstituciyanı qayta qarau turalı bastama separatisterdiñ täuelsizdik üşin qozğalıstarınıñ qayta jandanuına äkelui mümkin. Öytkeni bwl olarğa endi zañ jüzinde erkin referendum ötkizu qwqığın aluğa ümit sıylaydı. Biraq mwnda eskeretin bir jayt tağı bar. Eger Konstituciyağa atalğan özgeris engizilse, onda Ispaniyanıñ 47 mln halqınıñ da Kataloniyanıñ  bölinuine qatıstı pikiri eskeriletin boladı. Ispaniyanıñ Sırtqı İster ministri qwqıq beru turalı bastamanı qoldaytının, biraq tek katalondıqtardıñ ğana müddesin eskeretin Karles Pudjemont wsınğan jüyege qarsı ekendigin bildirdi.

Kataloniyadağı köterilister äli de jalğasın tauıp jatır. Birqatar mañızdı köşeler jabılıp, jüzdegen adamdar Kataloniyadağı Prezident üyiniñ aldına jinalğan. Kataloniyada 21 jeltoqsanğa belgilengen saylauğa qatısatın täuelsizdikti jaqtauşı partiyalardı bir frontqa biriktiru turalı oy äli jüzege aspay otır. Öñirdiñ bwrınğı basşısı 17 qaraşa küni Ispaniyadağı Sotqa keledi dep kütilude.

“The Qazaq Times”