Foto: RIA Novosti / Hav'er Luengo

Ispaniyanıñ ministrler keñesi senbi küni Kataloniyanıñ özin özi basqaru mümkindigin şekteuge baylanıstı şwğıl kezdesu ötkizedi. Kezdesude Kataloniya täuelsizdigine tosqauıl qoyatın Ispaniya Ata zañınıñ 155 babı qabıldanuı mümkin.

El ükimeti bwl mäseleni Senat qarauına jibermekşi. Bilik ökilderiniñ sözinşe, şara "ispandıqtardıñ, Qataloniya twrğındarınıñ müddelerin qorğau jäne konstituciyalıq tärtipti qalpına keltiru üşin" qolğa alınadı.

Ükimettiñ mälimdemesinde "Kataloniya avtonomiyasınıñ basşısı Karles Pudjemonttıñ Ispaniya prem'eri Mariano Rahoydıñ talaptarın orındamay otırğanı" turalı aytılğan. Bwdan bölek Ispaniya biligi "zañdı jäne konstituciyalıq tärtipti, azamattar arasındağı beybitşilikti qalpına keltirip, Kataloniyadağı twraqsızdıqtan tuındağan ekonomikalıq naşar jağdaydardı toqtatu üşin barlıq mümkindikti paydalanatının" atap ötti.

Ayta keteyik, bügin Ispaniyanıñ jergilikti uaqıtımen 10:00-de Karles Pudjemon Mariano Rahoydıñ "Katoloniya täuelsizdigin jariyaladı ma, joq pa?" degen swrağına jauap beru kerek edi. Alayda Pudjemont tek Kataloniyanıñ täuelsizdigin jariyalauı küşinde qalatını turalı ğana aytqan.  Bwdan bölek ol Madrid dialogtan bas tartsa jäne jergilikti bilikke küş körsetetin bolsa Kataloniya parlamenti täuelsizdik üşin dauıs beretinin mälimdegen.

“The Qazaq Times”