Dimaş "Änşi" telejobasında. Qıtay.

Qıtaydağı «Änşi» telejobasına qatısıp jatqan jas änşi Dimaş Qwdaybergenov sol eldiñ aqparat qwraldarı men äleumettik jelilerinde tanımal bola bastadı. Qıtaydıñ universal saytındağı habarğa süyensek Dimaş telejobadağı alğaşqı tüsiriliminen-aq, jwrttı özine jalt qaratqan.

Dimaş "Änşi" jobasında. Qıtay.

Qıtaydıñ “Xin Lang” universal saytınıñ mädeniet taqırıbı betinde Dimaş turalı aqparattardıñ kün sayın jañalanıp twratının bayqadıq. Sol aqparattarğa şolu jasağanda, qazaq änşisiniñ Qıtay elinde ülken añıs tudırıp, äleumettik jelilerde tanımal bola bastağanına kuä boldıq.

Änşi Dimaş

“Xin Lang” saytınan bayqağan aqparatımız tömendegidey:

Jalpı jobağa «halıqaralıq» at berip twrğan bir ğana Dimaş bolsa kerek. Sebebi, jobağa Qıtay Gonkongınan Du Lişa attı qatısuşı men Dimaştan özgesi tügel qıtaylıq önerpazdar. Dimaş qıtaylarmen alğaşqı jüzdesuinde francuzdıñ «S.O.S D‘un teerien en detresse» attı änin taldağan. Bwl än francuzdıñ orındauğa asa qiın bes äniniñ biri ekenin de aytıptı.  Dimaş alğaşqı aynalımda-aq ändi sätti orındap, käsibi mamandardıñ tañdayın qaqtırğan. Onıñ alğaşqı tüsirilim üşin taldağan äninen-aq, onıñ özine degen senimi anıq körinedi degen pikirlerdi de kezdestirdik.

Dimaş Qwdaybergenov

Jobadağı Son Qı jäne Şan Qı qatarlı käsibi mamandar Dimaştı jobağa qatısqandar arasındağı teñdessiz änşi dep bağalağan. Olardıñ aytuınşa, Dimaş bwl retki än orındau barısında koloraturalıq, erkin vokaldı, keñ tınıstı öz äuezimen qatar dolphins dıbıstarın jaqsı meñgergendigin anıq bayqatqan. Tipti, joba mamandarı men qatısuşılarınan «Täñir özi nazarına alğan jas änşi, onday dauıs mende de bolsa dep armandaudıñ qajeti joq, ol oğan Qwdaydıñ bergen sıyı» degen marapattau sözderine de ie bolıp ülgeripti.

D.Qwdaybergenov "Änşi" telejobadağı alğaşqı qadamı

Dimaş Qıtaydağı resmi aqparattarmen birge, äleumettik jelide de qıtaylıqtardı tamsandırğanın jazıptı. Äleumettik jelilerde ol turlı alqaular köbirek kezdesedi. Qıtay qızdarı Dimaştı wzın boylı, kelbetti, jigittiñ sarası dep maqtap jatsa kerek. Key sayttarda «Aq boz attı hanzada keldi, bwl qızdarğa jaña tañdau orayı» degen jazbalar da kezdesti. Qazaqstan men Reseyden qoldauşıları köp, al Qıtaydağı negizgi qoldauşıları Şınjañ qazaqtarı degen taldaular da bar.

Dimaş Qwdaybergen Qıtayda

Tüsirilim äli de telearnalarda taratılıp ülgermepti. Qıtay sayttarındağı pikirlerge qarağanda «Änşi» jobası telearnalarğa taratılğannan keyin, Dimaştıñ qoldauşıları tipti de arta tüspek. Onlayn dauıs beru arqılı ötetin jarıs türinde Dimaş öziniñ kelisti tür-kelbeti, jağımdı dauısı, adamdı baurağıştığımen qoldauşılar jinauı mümkin delingen.

Dimaştıñ aqparattıq jelidegi paraqşasına qıtaylıq qoldanuşılar qaldırğan "Layktarı"

Qıtaylıq sayttar Dimaşqa qatıstı aqparattardı jinau barısında onıñ äleumettik jeli paraqşalarında qaldırmay qadağalap ülgeripti. Atalmış sayıtta «Dimaş özin önerpaz retinde jaqsı baulığanı onıñ äleumettik jelilerinen bayqaladı. Instagram paraqşasında tek otbası, önerdegi dostarı ğana bar. Eger jeñiltek jigit bolsa endigi qıtaylıq qızdarmen tanısqanın jariyalap ülgirer edi» degen sözder kezdesedi.

Qıtaylıqtar Dimaştıñ äleumettik jelidegi suretterin bölisken

Qıtaydağı közqaraqtı adamdardıñ aytısına qarağanda «Änşi» jobası halıqaralıq deñgeyde emes, tek Dimaş Qwdaybergenovtıñ qatısuı ğana onı halıqaralıq joba atandırıp otır. Onda qatısıp jatqan qıtaylıq änşilerdiñ bäri tanımal bola qoymağan jas änşiler. Dimaş bolsa talay halıqaralıq konkurstardı körgen. Bwl joba onıñ şanağına tar keledi degen pikirlerin de ayttı.

Dimaştıñ qıtayda tanımal bolğan suretteriniñ biri

Meyli qalay bolsa da, talanttı otandasımız Dimaştıñ milliard qıtaydıñ arasındağı är qadamınıñ sätti boluına, Qazaqstannıñ abıroy-bedelin köterip qaytuına tilektespiz! Dimaş jaraysıñ!

"The Qazaq Times"