Resey FB-nı bwğattauı mümkin. Foto: Newsader.

Reseydiñ Aqparattıq tehnologiyalar jäne Bwqaralıq aqparat qwraldarınıñ qadağalau departamentiniñ direktorı Aleksandr Zarrov mälimdeme jasap, eger Facebook jeke derekterdi saqtauğa qatıstı zañdı talaptardı orındamasa, Reseyde bwl äleumettik jelini qoldanudı toqtatıp tastaytının mälimdedi. Bwl turalı «Şilañ» aqparattıq saytı habarladı.

Aleksandr Zarrov sözinde: «Zañ barlıq adamğa ortaq bolğandıqtan da,  qanday jağdayda da biz zañnıñ orındaluın qamtamasız etuimiz kerek. Al onı atqarmaytın bolsa onda Resey territoriyasında Facebook äleumettik jelisin paydalanudı toqtatamız. Ärine bwl ökinişti, biraq, qalayda Resey zañın qorğauğa tiispiz», – dedi.

Ol jäne sözinde Aqparattıq tehnologiyalar jäne bwqaralıq aqparat qwraldarınıñ inspekciyası Facebook-tiñ Reseyde öte tanımal ekenin tüsinetinin, degenmen onıñ birden bir äleumettik jeli sanalmaytının, soğan wqsas basqa da äleumettik jelilerdiñ bar ekenin alğa tarttı. «Sondıqtan Facebook kompaniyasına zañğa säykes jwmıstar alıp baruın ümit etemiz», – dedi Aleksandr Zarrov.

«Jeke derekter turalı zañ» boyınşa, Resey azamattarınıñ jeke derekteri Resey aumağında saqtaluı kerek bolğan. Resey Fedraciyasınıñ Aqparattıq tehnologiyalar jäne Bwqaralıq aqparat qwraldarınıñ inspekciyası zañsız veb-sayttardı arnayı tizimge aladı. Eger tüzetuden bas tartsa, tizimdegi kez-kelgen äleumettik jelini bwğattauğa jiberedi. Bwdan bwrında Resey zañın bwzdı degen ayıppen birneşe äleumettik jeli bwğattalıp tastalğan.

Bwl turalı Resey prezidenti baspasöz hatşısı Dmitriy Peskov mälimdemesinde: «Facebook –  bwl biznes-kompaniya bolıp tabıladı, demek aqşa tabuğa bağıttalğan. Alayda, aqşa tabu jolı RF-nıñ zañdarına säykes boluı kerek. Zañdı atqaruı kerek», degen pikirin bildirdi.

“The Qazaq Times”