Foto: SLON

London transport jüyesiniñ jetekşiligi Uber onlayn taksi qızmetiniñ licenziyasın qaytarıp aldı. Endi qazan ayınan bastap atalğan kompaniya Wlıbritaniya astanasında jolauşılardı tasımaldau qızmetin toqtatadı. Bwl turalı qala basqarması öziniñ Twitter paraqşasında mälimdedi, dep jazdı RBK.

Londondağı transport jüyesi operatorı kompaniyağa "30 qırküyekten keyin licenziya merzimin sozbaytının" eskertken. Taksi qızmetine berilgen licenziya merzimi däl sol küni ayaqtaladı. Operatordıñ mälimetinşe,  Uber taksomotorlı qızmetterde jariyalanatın talaptarğa jauap bermeydi, sonday-aq, qılmıstıq oqiğalar kezinde eskertuler jasauda olqılıq tanıtadı, medicina jäne jürgizuşilerdiñ sottalmağanı turalı anıqtamalarına qatıstı aqparattı aşıq jariyalamaydı, tipti kompaniya qızmetine tıyım salınğan nemese şektelgen orındardağı qwqıq qorğau organdarınıñ qızmetkerleri men qala biligin aldap ketuge bolatın Greyball jüyesin paydalanadı eken.

Endi Uber-diñ 21 kün işinde şağım tüsiru qwqığı bar.  Reuters-tıñ jazuınşa, appelyaciya qaralğan künniñ özinde kompaniya qızmetiniñ odan arı jalğasuı ekitalay.  Bloomberg mälimetine sensek, Londonda atalğan kompaniyanıñ qızmetin şamamen 3,5 mln klient pen 40 mıñ jürgizuşi paydalanadı.

Soñğı uaqıtta Uber-ge qatıstı mäseleler köbeygen. Mısalı AQŞ kompaniyağa qatıstı birneşe tergeu jwmıstarın jürgizip jatır. San-Francisko prokuraturasınıñ mälimetinşe, bwl eldegi onlayn taksi qızmeti de Greyball jüyesin paydalanğan.

Uber qızmetine qatıstı şağımdar Qazaqstanda da bayqalıp jür. Bizde jergilikti bilik ökilderi arızdanbağanmen, äleumettik jeli qoldanuşıları onlayn-taksi qızmetiniñ bağası soñğı kezde qımbattap ketetinin aytadı.

“The Qazaq Times”