Foto: Millioner.kz

Wlttıq bank törağası Daniyar Aqışev fundamentaldı oñ faktorlarğa qaramastan, valyuta narığında qwbılu procesi jalğasıp jatqanın ayttı. Sonday-aq, ol teñge kursına qatıstı boljam jasadı, dep habarlaydı bas banktiñ baspasöz qızmeti.

Qazaqstandıq basılımdar jäne televidenielerdiñ bas redaktorlarımen kezdesui barısında Aqışev "deval'vaciya boljamına baylanıstı şetel valyutasına degen swranıstıñ tım köp boluı dollar kursınıñ 337 teñgege deyin joğarılap ketuine äser etkenin" ayttı (19 qırküyek küngi kündizgi sessiya kezinde 1 dollar 341,12 teñgege deyin nığaydı, ayırbastau punkterinde dollar 343 teñgeden satıluda-red.).

"Wlttıq banktiñ boljamı boyınşa, AQŞ dollarına qatısı teñge kursı mwnay bağası 50 dollardan tüspegen jağdayda osı deñgeyde saqtaladı. Al dollarğa qatıstı rubl' bağamı 59-60 rubl'den aspaydı", - dedi Wlttıq bank törağası.

Ayta keteyik, Brent markalı mwnay bağası Astana uaqıtımen 16:50-de barreline 55,8 dollardı qwradı.

Bwdan bölek bas bankir eldegi altın valyutalı rezervterdiñ joğarılağanın atap ötti.

"Aldın ala jasalğan mälimetter boyınşa 8 aydağı ösim 11,6 payızdı qwrap, 32 mlrd dollarğa deyin jetti. 58 mlrd dollar kölemindegi Wlttıq qor qarjısın qosa eseptegende eldiñ jalpı halıqaralıq rezervi 91 mlrd dollarğa jetti nemese Jalpı işki önimniñ 61 payızın qwraydı", - dedi ol.

“The Qazaq Times”