Soltüstik Koreyağa bağıttalğan sankciya şeşimi düysenbi küngi BWW Qauipsizdik keñesinde qabıldandı. Alayda, Tramp ükimeti alğaşqı qatañ talabına tolıqtay qol jetkize almadı. Ötken aptada Soltüstik Koreya soñğı yadrolıq sınağın ötkizgen bolatın. Al, jaña şekteu şaraları KHDR-nıñ yadrolıq jäne ballistikalıq zımıran sınaqtarına tosqauıl qoya alatın, almaytının kesip aytu qiın.

BWW Qauipsizdik keñesine müşe 15 eldiñ bir auızdan qoldauı arqılı, Soltüstik Koreyağa jaña sankciya salu şeşimi jüzege aspaq. Dese de, Soltüstik Koreyağa qaratılğan jazalau şaralarınıñ äuelgi nwsqasına qarağanda birşama älsirey tüskenin Qauipsizdik keñestegi Qıtay men Reseydiñ ıqpalı dep qarauğa boladı. Sebebi, alğaşqı qatañ jobağa Resey basşısı da, Beyjiñ jaq ta tübegeyli qarsılıq bildirgen edi.

Ötken aptadağı zımıran sınağına jauap retinde, AQŞ-tıñ BWW-dağı ökili mwnay embargosın qamtığan, halıqaralıq birlesken qısım jasau jobasın Qauipsizdik keñeske joldağan. Keyinnen bwl mäselede reseylik jäne qıtaylıq elşilermen kelissözder jürgizilip, bwl qatañ şekteuler birşama jeñildetildi. Jeksenbi küni keşte köptegen jabıq kezdesulerden keyin, Keñeske qayta qaralğan joba bekitildi. Onda KHDR mwnay eksportınıñ eñ joğarğı şegi belgilendi, biraq tolıqtay embargo salu talabı şığarılıp tastaldı.

Jaña sankciya qaulısı älemniñ barlıq elderinen Koreya portına kiretin jäne şığatın kemelerdi tekserudi talap etedi. Biraq Tramp ükimetiniñ alğaşqı wsınğan jobasındağıday, Soltüstik Koreya kemelerine qarulı küş qoldanu qarastırılmağan. Barlıq elderde KHDR kemeleriniñ tirkeuge alınuın talap etedi. Äri erejeler bwzılıp jatqan jağdayda, aytalıq tirkeusiz Soltüstik Koreya kemelerine ayıppwl salınuı mümkin. Al, Tramp ükimeti wsınğan alğaşqı jobasında mwnay tasımaldağan Soltüstik Koreya kemelerine qarulı küş arqılı tosqauıl jasauğa mümkindik beretin edi.

Sonımen berge, Qauipsizdik keñestiñ talqılauına Soltüstik Koreya basşısı Kim Joñ Unnıñ şeteldegi aktivterin mwzdatu mäselesin qosa wsınudı quattağan AQŞ ökilderiniñ talabı toytarılıp tastaldı. Esesine soltüstik koreyalıq jwmıskerlerdiñ özge elde jwmıs isteuine şekteu qoyıldı. Sonıñ özinde, Qıtay jäne Resey jaqtıñ pikirine jığıla otırıp, eger qajet bolğan jağdayda Soltüstik Koreya jwmısşıların kirgizuge rwqsat etetin boldı.

Jaña joba KHDR-nıñ toqıma fabrika önerkäsibin şektemeydi, biraq Soltüstik Koreyağa tabiği gazdı eksporttauğa tıyım saladı. Eñ mañızdısı eldiñ tazartılğan mwnay satılımına berilgen rwqsat mölşeri jılına 200 mln barrel' dep belgilendi. Bwdan artıq mwnay satıp aluına tıyım salınadı. AQŞ Energetikalıq aqparat agenttiginiñ derekteri boyınşa, bwl şekteu belgilemesi Qıtaydıñ Soltüstik Koreyağa satatın mwnay mölşerin şamamen 10% -ğa azaytadı eken.

Bwl Soltüstik Koreyanıñ tamız ayınan beri ekinşi ret sankciya soqqısın qabıldauı bolıp sanaladı. AQŞ ökili sankciya jobasın ortağa salardan bwrın Soltüstik Koreyağa qısım jasau turasındağı AQŞ jäne Qıtay basşıları arasındağı telefondağı dialogtardı alğa tarttı. Onıñ sözinde körsetilgendey, halıqaralıq qoğamdastıq Pioñyañ (Phen'yan) rejimine qarsı birikken. Ol jäne bwl jobalar iske asırılatın bolsa, Soltüstik Koreyağa auır soqqı bolıp tiip, onıñ yadrolıq bağdarlaması men ballistikalıq zımırandarına ülken tosqauıl qoyadı eken.

Osı jerde AQŞ tarabı men Soltüstik Koreya ükimetiniñ pikirleri bir birine jol bere almay twr. Soltüstik Koreya ükimeti jariyalağan mälimette AQŞ ükimeti sankciyanı qabıldatar bolsa onda AQŞ-qa tübegeyli qarsı twrıp, onı müşkil jağdayğa tüsiretinderin ayttı. Al, AQŞ ökili Qauipsizdik keñestiñ otırısında: "Soltüstik Koreya tabanda rayınan qaytar bolsa, bwl sankciya jobası da tez arada qaytarıp alınadı", - dedi.

Al, Qauipsizdik keñeste Resey men Qıtay Soltüstik Koreyağa bolısqan sekildi. Onı bastapqı qatañ jobanıñ jeñildey qaluınan da bayqaymız. Osınıñ özi Soltüstik Koreya mäselesi şındap kelgende alıptardıñ tiresi, KHDR orındauşı ekenin añğartıp otırsa kerek.

“The Qazaq Times”