Foto: Forbes

Soñğı 10 künde, yağni 2017 jılğı 21 tamız ben 6 qırküyek aralığında  AQŞ dollarına qatıstı teñge bağamı 2,6%-ğa älsiregen. Bwl bankterdiñ, kompaniyalardıñ jäne halıq tarapınan şetel valyutasına degen swranıstıñ artıp ketuimen baylanıstı, dep habarlaydı Wlttıq banktiñ baspasöz qızmeti.

"Teñgeniñ erkin özgermeli bağamı jäne Wlttıq Banktiñ valyutalıq sauda-sattıqqa qatısuın barınşa azaytu jağdaylarında mwnday jağday bağamnıñ avtomattı türde älsireuine äkeledi", - delingen baspasöz habarlamasında.

Baspasöz qızmetiniñ mälimetinşe, Wlttıq bank şetel valyutasınıñ jetkilikti wsınısı bolmağan jağdayda onı satuşı boldı. Tamızda Wlttıq Banktiñ netto-öktemdikteriniñ kölemi 70 mln AQŞ dolların qwradı.

Sonday-aq, Wlttıq Bank qırküyektiñ birinşi aptasında  şetel valyutasın satu jöninde öktemdik jürgizgen. Al onıñ qorıtındısı boyınşa derekter qazannıñ basında jariyalanadı.

Wlttıq Banktiñ pikirinşe, eger mwnay bağası bir barrel' üşin 50 AQŞ dollarınan tömendemese, al Resey rubliniñ bağamı bir AQŞ dolları üşin 59-60 rubl'den aspasa, teñgeniñ AQŞ dollarına qatıstı bağamı ağımdağı deñgeyde saqtaladı. Sonımen birge, ayırbastau bağamınıñ ağımdağı deñgeyi rubl'ge qatıstı jetkilikti bağalanbay otır, bwl onı tüzetu üşin alğışarttar jasaydı.

Ayta keteyik, osı jıldıñ şilde ayınan bastap birinşi toqsanğa qarağanda dollar qayta nığayğan bolatın. Wlttıq bank ol kezdegi teñgeniñ älsireuin "AQŞ biliginiñ Reseyge salğan sankciyası saldarınan" dep tüsindirgen edi.

Desek te, bayqap otırğanımızday wlttıq valyutanıñ älsireui tek Reseyge salınğan sankciyağa ğana emes, işki narıqqa da qatıstı bolıp otır. Al onı retteudiñ alğışarttarın Wlttıq bank äli wsına almadı. Tek valyutanıñ älsireuin türli jağdaylarmen baylanıstırıp, halıqtı aldarqatudan arı asa alğan joq. Osıdan keyin teñgege senimsizdik bolğandıqtan halıqtıñ şetel valyutasına swranısınıñ artuı orındı.

“The Qazaq Times”