فوتو: Forbes

سوڭعى 10 كۇندە، ياعني 2017 جىلعى 21 تامىز بەن 6 قىركۇيەك ارالىعىندا  اقش دوللارىنا قاتىستى تەڭگە باعامى 2,6%-عا السىرەگەن. بۇل بانكتەردىڭ، كومپانيالاردىڭ جانە حالىق تاراپىنان شەتەل ۆاليۋتاسىنا دەگەن سۇرانىستىڭ ارتىپ كەتۋىمەن بايلانىستى، دەپ حابارلايدى ۇلتتىق بانكتىڭ ءباسپاسوز قىزمەتى.

"تەڭگەنىڭ ەركىن وزگەرمەلى باعامى جانە ۇلتتىق بانكتىڭ ۆاليۋتالىق ساۋدا-ساتتىققا قاتىسۋىن بارىنشا ازايتۋ جاعدايلارىندا مۇنداي جاعداي باعامنىڭ اۆتوماتتى تۇردە السىرەۋىنە اكەلەدى", - دەلىنگەن ءباسپاسوز حابارلاماسىندا.

ءباسپاسوز قىزمەتىنىڭ مالىمەتىنشە، ۇلتتىق بانك شەتەل ۆاليۋتاسىنىڭ جەتكىلىكتى ۇسىنىسى بولماعان جاعدايدا ونى ساتۋشى بولدى. تامىزدا ۇلتتىق بانكتىڭ نەتتو-وكتەمدىكتەرىنىڭ كولەمى 70 ملن اقش دوللارىن قۇرادى.

سونداي-اق، ۇلتتىق بانك قىركۇيەكتىڭ ءبىرىنشى اپتاسىندا  شەتەل ۆاليۋتاسىن ساتۋ جونىندە وكتەمدىك جۇرگىزگەن. ال ونىڭ قورىتىندىسى بويىنشا دەرەكتەر قازاننىڭ باسىندا جاريالانادى.

ۇلتتىق بانكتىڭ پىكىرىنشە، ەگەر مۇناي باعاسى ءبىر باررەل ءۇشىن 50 اقش دوللارىنان تومەندەمەسە، ال رەسەي ءرۋبلىنىڭ باعامى ءبىر اقش دوللارى ءۇشىن 59-60 رۋبلدەن اسپاسا، تەڭگەنىڭ اقش دوللارىنا قاتىستى باعامى اعىمداعى دەڭگەيدە ساقتالادى. سونىمەن بىرگە، ايىرباستاۋ باعامىنىڭ اعىمداعى دەڭگەيى رۋبلگە قاتىستى جەتكىلىكتى باعالانباي وتىر، بۇل ونى تۇزەتۋ ءۇشىن العىشارتتار جاسايدى.

ايتا كەتەيىك، وسى جىلدىڭ شىلدە ايىنان باستاپ ءبىرىنشى توقسانعا قاراعاندا دوللار قايتا نىعايعان بولاتىن. ۇلتتىق بانك ول كەزدەگى تەڭگەنىڭ السىرەۋىن "اقش بيلىگىنىڭ رەسەيگە سالعان سانكتسياسى سالدارىنان" دەپ تۇسىندىرگەن ەدى.

دەسەك تە، بايقاپ وتىرعانىمىزداي ۇلتتىق ۆاليۋتانىڭ السىرەۋى تەك رەسەيگە سالىنعان سانكتسياعا عانا ەمەس، ىشكى نارىققا دا قاتىستى بولىپ وتىر. ال ونى رەتتەۋدىڭ العىشارتتارىن ۇلتتىق بانك ءالى ۇسىنا المادى. تەك ۆاليۋتانىڭ السىرەۋىن ءتۇرلى جاعدايلارمەن بايلانىستىرىپ، حالىقتى الدارقاتۋدان ارى اسا العان جوق. وسىدان كەيىن تەڭگەگە سەنىمسىزدىك بولعاندىقتان حالىقتىڭ شەتەل ۆاليۋتاسىنا سۇرانىسىنىڭ ارتۋى ورىندى.

“The Qazaq Times”