AQŞ, Qıtay häm Tayuan basşıları. Foto: The Indian Express

AQŞ-Qıtay qarım-qatınası jaña kezeñge ayaq basqalı twr. Osıdan bwrınğı maqalalarımızda körsetkenimizdey, Tramptıñ prezidenttigi Qıtay men AQŞ arasında jaña qayşılıqtar tudıruı mümkin. Sonıñ biri qıtay biligi üşin asa mañızdı «Ülken Qıtay» sayasatı.

AQŞ prezidenti Donald Tramp ötken aptada “The Wall Street Journal” basılımına bergen swhbatında, «Ülken Qıtay» sayasatı turalı öz közqarasın bildirgen bolatın. «Bwl wzaq merzimdi sayasattıñ bolaşağı tiyanaqtı emes. Ärine, AQŞ halıqarada Tayuannıñ (Tayvan') derbes el ekenin moyındamauğa kelisedi. Alayda, valyuta bağamı men sauda qarım-qatınası, tağı basqada mäseleler bwl bir sayasatqa bağına bermeydi. Biz bwl turalı qaytalay talqılaularr alıp baramız. Bwl talqı «Ülken Qıtay» sayasatın da qamtidı», - degen bolatın.

Tramptıñ bwl sözi Qıtay ükimetine keri äserin tigizeri anıq. Bwğan qarsı Qıtay Sırtqı ister ministrligi jeñil ayıptau bildirdi. Olar: «Ülken Qıtay» sayasatı qayta talqılauğa salınbaydı, Tramptıñ bwl sözi AQŞ-Qıtay qarım-qatınasınıñ 40 jıldan bergi qalıptasqan ürdisin bwzu bolıp sanaladı», - dedi.  Qıtay ükimeti ejelden Tayuan isinde jiñişkelikpen qadağalaudan tayğan emes. Tipti olar «Ülken Qıtay» sayasatı Qıtay-AQŞ qatınasınıñ taban tirer tiyanağı degendi qabıldatqısı keledi.

Qıtay ükimeti mälimdesesinde, Tayuan isininiñ asa bayıptılıqtı qajet etetindigin eskertti jäne bwl mäsele turalı taraptardı talqı keñesine şaqırdı. Biraq, bwl talqı «Älemde bir ğana qıtay eli bar, Tayuan onıñ bir bölegi» degen princip astında boladı dep eskertti.

Qazaqstanğa körşi alpauıttar men älemdik alpauıttar arasındağı teke-tiresterdi, qayşılıqtar men selbestikterdi qadağalau, damuşı el retinde bizge asa qajetti dep sanaymız. Derjavalardıñ tiresinen keyde basqa elder zardap şekkenimen, key kezde paydağa jaratuğa boladı. Resey jäne Qıtaydıñ ekonomikası men basqa da salasına bäsekeles bolu üşin AQŞ jaña prezidentiniñ nazarı Orta Aziyadağı memleketterdiñ birine tüspey qoymadı. Bwl sol eldiñ ekonomikasınıñ, özge salardıñ damuına paydalı oray jaratuı bek mümkin.

"The Qazaq Times"