Külli mwsılman jwrtına ortaq qasietti Qwrban ayt merekesiniñ ekinşi küninde, Astananıñ altın böligi sanalatın soltüstik jağalauda salınıp jatqan «Abu Dabi Plaza» köp qabattı ğimaratınıñ aumağında jwmıs isteytin ündister men qazaqtar arasında töbeles bolğanı belgili. Biz bügin qırküyektiñ 2-si küni Astana halqın dürliktirgen oqiğağa jäne osığan deyin elimizde qazaq pen özge wlt ökilderi arasında bolğan jay ğana «bwzaqılıqtarğa» qısqaşa toqtalamız.

Resmi aqparattarğa süyensek Astananıñ eñ biik ğimaratı «Abu Dabi Plaza» aumağında bolğan töbeleske eki jaqtan 30-ğa juıq adam qatısqan jäne bwl eşqanday wltaralıq qaqtığıs emes jay ğana «bwzaqılıq». Bwnı endi wltaralıq qaqtığıs dep aytuğa mülde kelmeytin dünie ekeni belgili. Öytkeni tınıştığı mızğımas toleranttı eldiñ Astanasında wltarlıq qaqtığıstıñ boluı mümkin emes. Biraq Almatı, Oñtüstik Qazaqstan nemese Taraz köşelerinde qazaq pen şeşen, qazaq pen wyğır, qazaq pen täjik arasında bolğan qatardağı bwzaqılıqqa atalğan qalalardıñ äkimderi men ministrler barmaydı da. Al bas qaladağı «Abu Dabi Plaza» oqiğasına qala äkimi Äset Isekeşovten bastap, aqparat jäne kommunikaciya ministri Däuren Abaevqa deyin bilek sıbana aralasadı. Özderi aytqanday, işip alğan ündis pen küzetşi arasında bolğan bolmaşı töbeleske osınşama dürligudiñ ne qajeti bar? Jay ğana «bwzaqılıqqa» bola qaptağan policiya men arnayı jasaq qızmetkerlerin alıp kelip qwrılıs aumağın qorşap tastaytınday ne körindi? Älde Astana qalasınıñ äkimdigi osı uaqıtqa deyin işip alğan ündis körmegen be? Jä qoyşı, mümkin Isekeşov mırza EXPO qonaqtarına köp wlttı Qazaqstannıñ otbasılıq janjalın körsetkisi kelmegen bolar. Qanşa degenmen qazaqtıñ qara şañırağı Astana qalasınıñ äkimi ğoy. Onıñ üstine Aqordağa da jaqın otır.

Jalpı Astanada 30 adam qatısıp, 40 adam wstalatın «bwzaqılıq» oqiğaları osı uaqıtqa deyin boldı ma, bolmadı ma ol jağı bizge belgisiz. Bir belgilisi qala äkimi Isekeşov pen aqparat jäne kommunikaciya ministri Abaev tüsinikteme bergen bwl jolğı «bwzaqılıq», bwrınğı «bwzaqılıqtardan» özgerek boldı. Sebebi bar qazaqtıñ qarjısı salınğan «EXPO-2017» halıqaralıq körmesiniñ ayaqtaluına 7 kün qalğanda işip alğan bir ündis el imidjin tas-talqan etti. Şetelderden Astanağa EXPO-nı köruge ağılıp kelip jatqan turister ne oylaydı6 onı bir qwday biledi.

Şeteldik qonaqtardı, EXPO-nı, el imidjin bılay qoyğanda Astana qalasına, jalpı Qazaqstanğa sırttan jılına nemese ayına qanşa eñbek küşi keletinin eseptep otırğan jan bar ma eken joğarı bilikte. Däl osı «Abu Dabi Plaza» ğimaratın saluğa qanşa ündis kelgen, jwmıs beruşi tarap zañ şeñberinde qanşalıqtı jwmıs jasap otır? Ol jerdegi jwmısşı qazaqtardıñ üles salmağı qanday? Äset Isekeşov mırza işip alğan ündister jayında emes osı swraqtarğa jauap bergeni dwrıs şığar. Äytpese Qazaqstannıñ qaq ortasında otırıp bir ündiske qaptağan qazaqqa qarsı şığatınday ne körinipti? Negizinen Qazaqstan imidjin jatsa da, twrsa da oylaytın el biligine osınday jağdaylardıñ aldın alu üşin barlığın «twrmıstıq jağdaydağı bwzaqılıqqa» jaba bermey, bardı bar, joqtı joq dep aytıp üyrengen dwrıs şığar. Äytpese osı uaqıtqa deyin Almatı oblısınıñ Şelek, Molovodnoe, Şeñgeldi auıldarında, Oñtüstik Qazaqstannıñ Sarıağaş audanında, Jambıl oblısınıñ Burıldı auılında bolğan qazaq-wyğır, qazaq-şeşen, qazaq-täjik, qazaq-kürt arasındağı janjaldar da qatardağı «bwzaqılıq» deñgeyinde qaraldı.

Degenmen, atalğan oqiğalardıñ barlığında qazaq halqın özge wlt ökilderi aldına jığıp beru faktileri basım. Soñğı uaqıtta bolğan osığan wqsas kez kelgen jağdaydı alıp qaraytın bolsaq qamalıp, sottalıp, ayıppwl tölep tentirep jürgen qazaqtar. Özge wlt ökilderiniñ temir tordıñ ar jağına ketip jatqanın bayqamaysız. Barlığınıñ da ağı aq, qızılı qızıl. Osı jolğı «Abu Dabi Plazada» bolğan oqiğadan da ündister oñay qwtılatın tärizdi. Öytkeni 40-tan astam Qazaqstan azamatı wstalğanda qarsı taraptıñ basına köleñke tüsirgen joq, astanalıq tärtip saqşıları. Al QR Bas prokurorı Jaqıp Asanov jurnalisterdiñ «Bwzaqılıq jasağan ündister elden deportaciyalanadı ma?» degen swrağına: «Onı sot şeşedi», - dep qısqa qayırdı.

Qorıta kelgende "Abu Dabi Plazada" bolğan oqiğadan Aqorda mañındağı atqa minerler ne tüydi ol jağı belgisiz. Biraq bwnday jağdaylardıñ barlığın äsker kirgizu arqılı küşpen basa beru jaqsılıqqa aparmaytını anıq. Ne de bolsa bwrın Qazaqstannıñ Astanadan şalğay öñirlerinde bolatın mwnday oqiğalardıñ bas qalanıñ qaq ortasında boluı el biligine sabaq bolğan tärizdi. Äset Isekeşovtıñ oqiğa orınına barıp, elmen tildesui halıqpen bolğan dialogtıñ tek bası ğana.

“The Qazaq Times”