Prezident N.Nazarbaev Birikken Arab Ämirlikteriniñ isker top ökilderimen kezdesti

Bwl turalı Aqordanıñ resmi saytı habarladı. Kezdesuge ämirlikterdiñ älemdik deñgeyde jwmıs jürgizetin jetekşi kompaniyalarınıñ basşıları qatıstı.

Qazaqstan Prezidenti Birikken Arab Ämirlikteri Qazaqstannıñ Tayau Şığıs aumağındağı negizgi seriktesiniñ biri ekenin atap ötti. Nwrswltan Nazarbaev täuelsizdik alğalı beri elimizge Birikken Arab Ämirlikterinen kelgen tikeley investiciya kölemi 2 milliard dollarğa juıqtağanın ayttı.

– Qazaqstanda ämirlikter kapitalınıñ qatısuımen 200-ge juıq birlesken käsiporın jwmıs isteydi. Olar auıl şaruaşılığı, metallurgiya jäne energetika salaların qamtidı. «Mubadala» memlekettik investiciyalıq kompaniyasımen tığız baylanıs ornağan, – dedi Memleket basşısı.

Qazaqstan Prezidenti Astanada jalpı qwnı 1,6 mlrd dollar bolatın «Abu Dabi Plaza» eki jaqtı iri investiciyalıq jobası iske asırılıp jatqanın erekşe atap ötti.

Sonday-aq, Nwrswltan Nazarbaev elimizdiñ ekonomikanı ärtaraptandıruğa ayrıqşa köñil bölip, ozıq 30 memlekettiñ qatarına qosılu mindetin aldına qoyıp otırğanına toqtaldı.

– Osı maqsatqa jetu üşin Qazaqstanda bizneske barınşa jeñildikter qarastırılıp, investiciya tartuğa qolaylı jağday jasaluda, – dedi Memleket basşısı.

Qazaqstan Prezidenti respublikamızda jürgizilip jatqan birqatar jüyeli şaralar men institucionaldıq reformalarğa toqtalıp ötti.

– Täuelsizdik jıldarı elimizdiñ ekonomikasına jwmsalğan şeteldik tikeley investiciya 265 milliard dollardan asadı. Düniejüzilik banktiñ «Biznes jürgizu jeñildigi» reytinginde Qazaqstan 35-şi orınğa ie boldı. Bügingi tañda 56 memlekettiñ azamattarı Qazaqstanğa vizasız kele aladı. Olardıñ qatarında Birikken Arab Ämirlikteri de bar, –dedi Nwrswltan Nazarbaev.

Memleket basşısı industriyalandıru bağdarlamasın jüzege asıruğa Birikken Arab Ämirlikteri kompaniyaların belsene qatısuğa şaqırıp, elimiz jan-jaqtı investiciyalıq qoldau körsetuge dayın ekenin jetkizdi.

– Basımdığı bar salalarda investor korporativtik tabıs salığınan jäne jer salığınan 10 jılğa, mülik salığınan 8 jılğa bosatıladı. Şeteldik käsipkerlerge qoldau körsetetin Şeteldik investorlar keñesi 19 jıldan beri tiimdi jwmıs atqarıp keledi, – dedi Qazaqstan Prezidenti.

Bwdan bölek, Nwrswltan Nazarbaev Qazaqstanda 10 arnayı ekonomikalıq jäne 20 industriyalıq aymaq jwmıs isteytinin ayttı.

– Bizdi Birikken Arab Ämirlikteriniñ industriyalıq aymaqtar jwmısı jönindegi täjiribesi qızıqtıradı. Biz osınday aymaqtardı ämirlikter kompaniyalarınıñ basqaruına beruge dayınbız, – dedi Memleket basşısı.

Qazaqstan Prezidenti ämirlikterdiñ biznesmenderine Qazaqstanda qazir iri memlekettik nısandardı jekeşelendiru nauqanı jürip jatqanın, onıñ ayasında jeti jüzdey memlekettik käsiporın satılımğa şığarılğanın jetkizdi.

– Bwl – tau-ken metallurgiyası, mwnay öndiru, energetika, kölik jäne baylanıs salasındağı käsiporındardıñ, infraqwrılım nısandarınıñ akciyaları. Biz ämirlikter kompaniyalarınıñ osı jekeşelendiru isine atsalısuın biz qwptaymız, – dedi Nwrswltan Nazarbaev.

Memleket basşısı «Astana halıqaralıq qarjı ortalığınıñ qızmetine jäne Abu-Dabidegi sammitpen taqırıbı ortaq aldağı «EKSPO-2017» halıqaralıq körmesine toqtalıp ötti.

– Qazaqstannıñ elordasında biıl «Bolaşaqtıñ energiyası» taqırıbımen «EKSPO-2017» halıqaralıq körmesi ötedi. Oğan 110-nan astam memleket, 18 halıqaralıq wyım jäne jañartılatın energetika salasındağı jetekşi älemdik kompaniyalar qatısadı. Ämirlikter – arab memleketteri arasınan «Astana EKSPO-2017» körmesine qatısatının resmi türde rastağan birinşi memleket, – dedi Qazaqstan Prezidenti.

Nwrswltan Nazarbaev eki jaqtı kelissözder ayasında «Astana EKSPO – 2017» men «Byuro EKSPO Dubay 2020» arasında ıntımaqtastıq turalı memorandumğa qol qoyılğanın atap ötip, «jasıl» energiya nemese balamalı jäne jañartılatın energiya salası boyınşa Birikken Arab Ämirlikterimen arada tabıstı ıntımaqtastıq ornaydı dep ümittenetinin jetkizdi.

Soñında Memleket basşısı kezdesuge qatısuşılardıñ bärine alğıs aytıp, taraptar özara tiimdi ıntımaqtastıqtıñ jaña mümkindikteri men bolaşağın ayqınday alatınına senim bildirdi.

Memleket basşısı Birikken Arab Ämirlikterine resmi saparmen barğan bolatın.

«The Qazaq Times»