پرەزيدەنت ن.نازارباەۆ بىرىككەن اراب امىرلىكتەرىنىڭ ىسكەر توپ وكىلدەرىمەن كەزدەستى

بۇل تۋرالى اقوردانىڭ رەسمي سايتى حابارلادى. كەزدەسۋگە امىرلىكتەردىڭ الەمدىك دەڭگەيدە جۇمىس جۇرگىزەتىن جەتەكشى كومپانيالارىنىڭ باسشىلارى قاتىستى.

قازاقستان پرەزيدەنتى بىرىككەن اراب امىرلىكتەرى قازاقستاننىڭ تاياۋ شىعىس اۋماعىنداعى نەگىزگى سەرىكتەسىنىڭ ءبىرى ەكەنىن اتاپ ءوتتى. نۇرسۇلتان نازارباەۆ تاۋەلسىزدىك العالى بەرى ەلىمىزگە بىرىككەن اراب امىرلىكتەرىنەن كەلگەن تىكەلەي ينۆەستيتسيا كولەمى 2 ميلليارد دوللارعا جۋىقتاعانىن ايتتى.

– قازاقستاندا امىرلىكتەر كاپيتالىنىڭ قاتىسۋىمەن 200-گە جۋىق بىرلەسكەن كاسىپورىن جۇمىس ىستەيدى. ولار اۋىل شارۋاشىلىعى، مەتاللۋرگيا جانە ەنەرگەتيكا سالالارىن قامتيدى. «مۋبادالا» مەملەكەتتىك ينۆەستيتسيالىق كومپانياسىمەن تىعىز بايلانىس ورناعان، – دەدى مەملەكەت باسشىسى.

قازاقستان پرەزيدەنتى استانادا جالپى قۇنى 1,6 ملرد دوللار بولاتىن «ابۋ دابي پلازا» ەكى جاقتى ءىرى ينۆەستيتسيالىق جوباسى ىسكە اسىرىلىپ جاتقانىن ەرەكشە اتاپ ءوتتى.

سونداي-اق، نۇرسۇلتان نازارباەۆ ەلىمىزدىڭ ەكونوميكانى ارتاراپتاندىرۋعا ايرىقشا كوڭىل ءبولىپ، وزىق 30 مەملەكەتتىڭ قاتارىنا قوسىلۋ مىندەتىن الدىنا قويىپ وتىرعانىنا توقتالدى.

– وسى ماقساتقا جەتۋ ءۇشىن قازاقستاندا بيزنەسكە بارىنشا جەڭىلدىكتەر قاراستىرىلىپ، ينۆەستيتسيا تارتۋعا قولايلى جاعداي جاسالۋدا، – دەدى مەملەكەت باسشىسى.

قازاقستان پرەزيدەنتى رەسپۋبليكامىزدا جۇرگىزىلىپ جاتقان بىرقاتار جۇيەلى شارالار مەن ينستيتۋتسيونالدىق رەفورمالارعا توقتالىپ ءوتتى.

– تاۋەلسىزدىك جىلدارى ەلىمىزدىڭ ەكونوميكاسىنا جۇمسالعان شەتەلدىك تىكەلەي ينۆەستيتسيا 265 ميلليارد دوللاردان اسادى. دۇنيەجۇزىلىك بانكتىڭ «بيزنەس جۇرگىزۋ جەڭىلدىگى» رەيتينگىندە قازاقستان 35-ءشى ورىنعا يە بولدى. بۇگىنگى تاڭدا 56 مەملەكەتتىڭ ازاماتتارى قازاقستانعا ۆيزاسىز كەلە الادى. ولاردىڭ قاتارىندا بىرىككەن اراب امىرلىكتەرى دە بار، –دەدى نۇرسۇلتان نازارباەۆ.

مەملەكەت باسشىسى يندۋستريالاندىرۋ باعدارلاماسىن جۇزەگە اسىرۋعا بىرىككەن اراب امىرلىكتەرى كومپانيالارىن بەلسەنە قاتىسۋعا شاقىرىپ، ەلىمىز جان-جاقتى ينۆەستيتسيالىق قولداۋ كورسەتۋگە دايىن ەكەنىن جەتكىزدى.

– باسىمدىعى بار سالالاردا ينۆەستور كورپوراتيۆتىك تابىس سالىعىنان جانە جەر سالىعىنان 10 جىلعا، مۇلىك سالىعىنان 8 جىلعا بوساتىلادى. شەتەلدىك كاسىپكەرلەرگە قولداۋ كورسەتەتىن شەتەلدىك ينۆەستورلار كەڭەسى 19 جىلدان بەرى ءتيىمدى جۇمىس اتقارىپ كەلەدى، – دەدى قازاقستان پرەزيدەنتى.

بۇدان بولەك، نۇرسۇلتان نازارباەۆ قازاقستاندا 10 ارنايى ەكونوميكالىق جانە 20 يندۋستريالىق ايماق جۇمىس ىستەيتىنىن ايتتى.

– ءبىزدى بىرىككەن اراب امىرلىكتەرىنىڭ يندۋستريالىق ايماقتار جۇمىسى جونىندەگى تاجىريبەسى قىزىقتىرادى. ءبىز وسىنداي ايماقتاردى امىرلىكتەر كومپانيالارىنىڭ باسقارۋىنا بەرۋگە دايىنبىز، – دەدى مەملەكەت باسشىسى.

قازاقستان پرەزيدەنتى امىرلىكتەردىڭ بيزنەسمەندەرىنە قازاقستاندا قازىر ءىرى مەملەكەتتىك نىسانداردى جەكەشەلەندىرۋ ناۋقانى ءجۇرىپ جاتقانىن، ونىڭ اياسىندا جەتى جۇزدەي مەملەكەتتىك كاسىپورىن ساتىلىمعا شىعارىلعانىن جەتكىزدى.

– بۇل – تاۋ-كەن مەتاللۋرگياسى، مۇناي ءوندىرۋ، ەنەرگەتيكا، كولىك جانە بايلانىس سالاسىنداعى كاسىپورىنداردىڭ، ينفراقۇرىلىم نىساندارىنىڭ اكتسيالارى. ءبىز امىرلىكتەر كومپانيالارىنىڭ وسى جەكەشەلەندىرۋ ىسىنە اتسالىسۋىن ءبىز قۇپتايمىز، – دەدى نۇرسۇلتان نازارباەۆ.

مەملەكەت باسشىسى «استانا حالىقارالىق قارجى ورتالىعىنىڭ قىزمەتىنە جانە ابۋ-دابيدەگى سامميتپەن تاقىرىبى ورتاق الداعى «ەكسپو-2017» حالىقارالىق كورمەسىنە توقتالىپ ءوتتى.

– قازاقستاننىڭ ەلورداسىندا بيىل «بولاشاقتىڭ ەنەرگياسى» تاقىرىبىمەن «ەكسپو-2017» حالىقارالىق كورمەسى وتەدى. وعان 110-نان استام مەملەكەت، 18 حالىقارالىق ۇيىم جانە جاڭارتىلاتىن ەنەرگەتيكا سالاسىنداعى جەتەكشى الەمدىك كومپانيالار قاتىسادى. امىرلىكتەر – اراب مەملەكەتتەرى اراسىنان «استانا ەكسپو-2017» كورمەسىنە قاتىساتىنىن رەسمي تۇردە راستاعان ءبىرىنشى مەملەكەت، – دەدى قازاقستان پرەزيدەنتى.

نۇرسۇلتان نازارباەۆ ەكى جاقتى كەلىسسوزدەر اياسىندا «استانا ەكسپو – 2017» مەن «بيۋرو ەكسپو دۋباي 2020» اراسىندا ىنتىماقتاستىق تۋرالى مەموراندۋمعا قول قويىلعانىن اتاپ ءوتىپ، «جاسىل» ەنەرگيا نەمەسە بالامالى جانە جاڭارتىلاتىن ەنەرگيا سالاسى بويىنشا بىرىككەن اراب امىرلىكتەرىمەن ارادا تابىستى ىنتىماقتاستىق ورنايدى دەپ ۇمىتتەنەتىنىن جەتكىزدى.

سوڭىندا مەملەكەت باسشىسى كەزدەسۋگە قاتىسۋشىلاردىڭ بارىنە العىس ايتىپ، تاراپتار ءوزارا ءتيىمدى ىنتىماقتاستىقتىڭ جاڭا مۇمكىندىكتەرى مەن بولاشاعىن ايقىنداي الاتىنىنا سەنىم ءبىلدىردى.

مەملەكەت باسشىسى بىرىككەن اراب امىرلىكتەرىنە رەسمي ساپارمەن بارعان بولاتىن.

«The Qazaq Times»