Foto: Reuters

Juırda Donal'd Tramp AQŞ-tıñ Auğanstandağı sayasatın ayqındaytın strategiyanı jariyaladı. Oğan säykes, älemdi alañdatqan bastı saualğa jauap tabıldı: AQŞ äskerleri Auğanstandağı soğısqa qatısuın jalğastıratın boldı. Olardıñ qatarın jeñiske jetkenşe küresetin jaña amerikalıq äskeriler tolıqtıradı. Al Amerikanıñ bwl qadamın qoldağandar men  qarsılıq bildirgender kimder? Endi osığan toqtalayıq. 

AQŞ äskeriniñ Auğanıstandağı twraqtılıqtı saqtau üşin küresin jalğastıratının birinşi bolıp qoldağandar: NATO, Auğanstan biligi, Ündistan, Wlıbritaniya. Qarsı tarapta pikir bildirgender: Qıtay, Resey, Päkistan.

Auğanstan biligi

Auğanıstannıñ Prezidenti Aşraf Ğani Donal'd Tramptıñ şeşimin jılı qabıldap, "Bwl Amerikanıñ ünemi bizben birge ekenin körsetedi. Auğanstan jerinde amerikalıq äskerilerdiñ sanınıñ artuı bizdiñ tezirek jeñiske jetip, beybitşilik ornatuımızğa kömektesedi", - dedi.

Päkistan 

Päkistannıñ Sırtqı ister ministri Hvadja Mwhammed Asif Donal'd Tramptıñ "Päkistan terrorizmdi qarjılandırıp otır" degen ayıptauın joqqa şığarıp, narazılıq bildirdi.

NATO

NATO-nıñ bas hatşısı Yens Stoltenberg AQŞ-tıñ Auğanstandağı äskeri quatın arttıru turalı oyın qoldap: "Bizdiñ maqsatımız Auğanstandı endi eşqaşan terroristerdiñ oşağına aynalmaytınday etu", - dedi. NATO-nıñ birlesken koaliciyası Auğanstan jerindegi äskeri is-qimılın toqtatqan 2015 jıldıñ qañtarınan keyin de, äriptes memleketter odağı jergilikti biliktiñ äskeri küşterine keñes beru, oqıtu jwmıstarın jürgizip otır.

Ündistan 

Ündistannıñ Sırtqı ister ministrligi AQŞ-tıñ Auğanstandağı mäselelerdi şeşudegi batıl qadamdarı men terroristerdiñ bas sauğalaytın mekenderine aynalğan memleketterdiñ qoldauın toqtatuğa qatıstı talabın orındı dep taptı.

Qıtay

Qıtay öziniñ äriptesi Päkistandı qorğap, onıñ terrorizmge qarsı küreske qosqan ülesin erekşe atap ötti. Auğanstandağı jağdaydıñ jaqsara tüsetinine ümit artqan Qıtay Ükimeti Donal'd Tramptıñ strategiyasına qatıstı aşıq qarsılıq aytqan joq.

Resey

Reseydiñ "Interfaks" aqparattıq agenttiginiñ habarlauınşa, Mäskeu AQŞ-tıñ jaña strategiyası Auğanıstandı beybitşilikke jetkizedi degenge ülken kümänmen qaraydı.

“The Qazaq Times”