فوتو: Reuters

جۋىردا دونالد ترامپ اقش-تىڭ اۋعانستانداعى ساياساتىن ايقىندايتىن ستراتەگيانى جاريالادى. وعان سايكەس، الەمدى الاڭداتقان باستى ساۋالعا جاۋاپ تابىلدى: اقش اسكەرلەرى اۋعانستانداعى سوعىسقا قاتىسۋىن جالعاستىراتىن بولدى. ولاردىڭ قاتارىن جەڭىسكە جەتكەنشە كۇرەسەتىن جاڭا امەريكالىق اسكەريلەر تولىقتىرادى. ال امەريكانىڭ بۇل قادامىن قولداعاندار مەن  قارسىلىق بىلدىرگەندەر كىمدەر؟ ەندى وسىعان توقتالايىق. 

اقش اسكەرىنىڭ اۋعانىستانداعى تۇراقتىلىقتى ساقتاۋ ءۇشىن كۇرەسىن جالعاستىراتىنىن ءبىرىنشى بولىپ قولداعاندار: ناتو، اۋعانستان بيلىگى، ءۇندىستان، ۇلىبريتانيا. قارسى تاراپتا پىكىر بىلدىرگەندەر: قىتاي، رەسەي، پاكىستان.

اۋعانستان بيلىگى

اۋعانىستاننىڭ پرەزيدەنتى اشراف عاني دونالد ترامپتىڭ شەشىمىن جىلى قابىلداپ، "بۇل امەريكانىڭ ۇنەمى بىزبەن بىرگە ەكەنىن كورسەتەدى. اۋعانستان جەرىندە امەريكالىق اسكەريلەردىڭ سانىنىڭ ارتۋى ءبىزدىڭ تەزىرەك جەڭىسكە جەتىپ، بەيبىتشىلىك ورناتۋىمىزعا كومەكتەسەدى", - دەدى.

پاكىستان 

پاكىستاننىڭ سىرتقى ىستەر ءمينيسترى حۆادجا مۇحاممەد اسيف دونالد ترامپتىڭ "پاكىستان تەرروريزمدى قارجىلاندىرىپ وتىر" دەگەن ايىپتاۋىن جوققا شىعارىپ، نارازىلىق ءبىلدىردى.

ناتو

ناتو-نىڭ باس حاتشىسى يەنس ستولتەنبەرگ اقش-تىڭ اۋعانستانداعى اسكەري قۋاتىن ارتتىرۋ تۋرالى ويىن قولداپ: ء"بىزدىڭ ماقساتىمىز اۋعانستاندى ەندى ەشقاشان تەرروريستەردىڭ وشاعىنا اينالمايتىنداي ەتۋ", - دەدى. ناتو-نىڭ بىرلەسكەن كواليتسياسى اۋعانستان جەرىندەگى اسكەري ءىس-قيمىلىن توقتاتقان 2015 جىلدىڭ قاڭتارىنان كەيىن دە، ارىپتەس مەملەكەتتەر وداعى جەرگىلىكتى بيلىكتىڭ اسكەري كۇشتەرىنە كەڭەس بەرۋ، وقىتۋ جۇمىستارىن جۇرگىزىپ وتىر.

ءۇندىستان 

ءۇندىستاننىڭ سىرتقى ىستەر مينيسترلىگى اقش-تىڭ اۋعانستانداعى ماسەلەلەردى شەشۋدەگى باتىل قادامدارى مەن تەرروريستەردىڭ باس ساۋعالايتىن مەكەندەرىنە اينالعان مەملەكەتتەردىڭ قولداۋىن توقتاتۋعا قاتىستى تالابىن ورىندى دەپ تاپتى.

قىتاي

قىتاي ءوزىنىڭ ارىپتەسى پاكىستاندى قورعاپ، ونىڭ تەرروريزمگە قارسى كۇرەسكە قوسقان ۇلەسىن ەرەكشە اتاپ ءوتتى. اۋعانستانداعى جاعدايدىڭ جاقسارا تۇسەتىنىنە ءۇمىت ارتقان قىتاي ۇكىمەتى دونالد ترامپتىڭ ستراتەگياسىنا قاتىستى اشىق قارسىلىق ايتقان جوق.

رەسەي

رەسەيدىڭ "ينتەرفاكس" اقپاراتتىق اگەنتتىگىنىڭ حابارلاۋىنشا، ماسكەۋ اقش-تىڭ جاڭا ستراتەگياسى اۋعانىستاندى بەيبىتشىلىككە جەتكىزەدى دەگەنگە ۇلكەن كۇمانمەن قارايدى.

“The Qazaq Times”