Şwğıl jağdayda qonğan AQŞ joyğış wşağı. Foto: The Sun.

Şeteldik aqparat közderi AQŞ joğarı lauazımdılarınıñ sözine silteme bere otırıp, AQŞ-tıñ joyğış wşağı Parsı şığanağında Irannıñ wşqışsız wşağınıñ qudalauına wşırağanın habarladı. Bwl turalı qıtaylıq «Şinlañ» aqparattıq agenttigi öz saytında jazdı.

AQŞ äue küşteriniñ F/A-18E joyğış wşağınıñ Parsı şığanağındağı Nimic aviamatkasına qonuğa dayındalğan kezinde, kenetten Irannıñ qarulanbağan dronnıñ quğınına wşırağan. Eki el wşağı bir-birine 31 metr aralıqqa deyin jaqındap kelgen. Tipti soqtığısa jazdağan.

Reuters agenttiginiñ 8 tamızdağı habarında, AQŞ qorğanıs ökilderiniñ atın atağısı kelmegen bir lauazımdısı oqiğanı: "AQŞ joyğış wşağı wşaq tasımaldauşı kemege (aviamatka) qonuğa dayındalğan kezde, soñınan irandıq wşqışsız wşaq ilese wşıp jaqındağan. AQŞ jaq radio signalı arqılı eskertu berse de Iran dronı qauipti jağdayda jaqınday tüsken. AQŞ wşağı qonu operaciyasın rwqsatsız şwğıl türde jüzege asıruğa mäjbür bolğan", - dep tüsindirgen.

Iran men AQŞ-tıñ soğıs kemeleri men barlauşı wşaqtarı Parsı şığanağında san ret jüzdesip qaladı. Alayda, Iran dronınıñ AQŞ joyğış wşağına mwnşalıq jaqın kelui alğaş ret. Onıñ üstine bwl joyğış wşaqtıñ kemege qonuı kezinde orın alğan.

2015 jılı AQŞ bas tartqan 6 elmen yadrolıq bağdarlamanı toqtatu kelisimine keldi. Iran öziniñ yadrolıq bağdarlamasın toqtatudıñ ornına, Batıs elderiniñ ekonomikalıq qısımın joyumen almastırudı ümit etti. Alayda, Tramp AQŞ prezidenttigine kelgeli beri, Orta-Şığıstağı AQŞ sayasatı tipti tarılıp, Irandı oqşaulau sayasatın jedeldetti. Uaşingtonnıñ qarauınşa, Irannıñ ballistikalıq zımırandarı AQŞ-tıñ keybir ielikti müddelerine qauip töndiredi. Al, Iran jaq ballistikalıq zımırandardı damıtu memlekettik qauipsizdiktiñ mañızdı bir bağıtı. Sonday-aq, bwl bağdarlama kelisimde qamtılmağan.

18 şilde küni, Amerika Qwrama Ştattarı Iranğa qarsı jaña sankciyalar jariyalağannan keyin, Iran Sırtqı ister ministrligi mälimdeme jasap, AQŞ sankciyasın orınsız dep ayıptadı. Äri Uaşingtonnıñ sankciyaları sonşalıq mağınasız jäne tükke twrğısız dep sınadı. Onıñ qaytarım jauabı retinde Iran jaqta AQŞ-tıñ keybir twlğalarına sankciya saldı.

“The Qazaq Times”