Foto: 3rm.info

Euroodaqtıñ Reseyge qarsı salğan sankciyalarınıñ qatarı tağı da 3 azamat pen  Germaniyanıñ Siemens kompaniyası öndirgen turbinalardı Qırımğa jetkizu dauına qatısı bar degen 3 kompaniyanıñ atımen tolıqtı. "Qara tizimge" ilikken azamattar: Resey energetika ministriniñ orınbasarı Andrey Çerezov, departament basşısı Evgeniy Grabçak pen "Tehnopromeksport" kompaniyasınıñ basşısı Sergey Toporgilka. Olarğa Euroodaq aumağına ötuge tıyım salınıp, jeke aktivterine qoljetimdilik toqtatıladı. 

2014 jılı Resey Ukrainadan Qırımdı tartıp alğanı üşin, Europa elderi jäne AQŞ Mäskeuge qarsı ekonomikalıq jäne diplomatiyalıq sankciyalar engizgeni belgili. Olar äli de öz küşinde ekenin eskergen jön. Soñğı kezde sarapşılar Europa men AQŞ-tıñ Reseymen qarım-qatınasın tüzeuge ıntalı ekenin alğa tartıp, sankciyalar tek "resmilik" üşin ğana saqtalıp twr degen oy bildirgen. Donal'd Tramptıñ G-20 sammitinde  Vladimir Putinmen jeke kezdesuinen keyin, Süriyanıñ oñtüstik-batısında  amerikalıq jäne reseylik äskerlerdiñ deskalaciya zonasın qwrıp, beybitşilik jariyalağanı eki el arasındağı dostıq baylanıstardı nığaytadı degen senim wyalattı. Degenmen...

AQŞ-ta ötken biılğı prezidenttik saylauğa Resey astırtın aralasqan degen tolassız ayıptaular Kongresstiñ Reseyge qarsı sankciyalardı küşeytuine alıp keldi. Donal'd Tramp wzaq uaqıt bwl qwjatqa qol qoyuğa taysaqtap, öziniñ tvitter paraqşasında Kongressti Resey men Amerika qarım-qatınasınıñ "qauipti şekke" kelip jetkenine kinälağanımen, jağday özgergen joq. Resey öz kezeginde endi AQŞ-pen qarım-qatınası jaqsarmaytının aşıp ayttı.

Euroodaq AQŞ-tıñ jaña sankciyalar rejimin ayıptap, qarsılıq bildirdi. Bwl äreketi onıñ Reseyge janı aşığanınan emes, ekonomikalıq şekteulerdiñ bir wşı öziniñ energetikalıq kompaniyalarına tiip ketedi me degen qauipten jasalıp otırğan şara. Euroodaq öziniñ qaupi şındıqqa aynalğan jağdayda, AQŞ-qa jauap esebinde qarsı sankciyalar engizetinin de jasırmadı. Endi Reseydi jaqtağan mälimdemesinen keyin arağa bir apta salmay, Euroodaq Reseyge qarsı qwrılğan "qara tizimdi" tağı wzartıp otır.

Sebebi...

2014 jılğı Euroodaqtıñ Reseyge qarsı sankciyalarınıñ işinde energetikalıq kompaniyalardıñ Qırımğa tauar tasımaldauına tolıqtay şek qoyatın bölim bar. Şilde ayınıñ basında Reuters aqparattıq agenttigi "Qırımda Reseydiñ bastamasımen salınıp jatqan elektr stansalarına Germaniyanıñ Siemens kompaniyasınıñ turbinaları jetkizildi" degen aqparat taratıp, Sevastopol'dan däleldi suretter jariyaladı. Resey Ükimeti "Suretterdegi turbinalar qosalqı narıqta satıp alınıp, Resey zauıttarında jañarğan otandıq önim" dese, Siemens kompaniyası: "Bwl bizdiñ Reseydegi Taman' oblısına jibergen turbinalarımız. Eki aradağı kelisim boyınşa Taman'ğa jetkizilui kerek bolğan turbinalardı Resey bizge eskertpesten, Qırımğa tasımaldağan. Osı äreketi üşin aradağı barlıq kelisimderdiñ küşin joyamız", - dep mälimdedi.

Euroodaqtıñ jañadan engizilgen sankiyaları osı turbina dauına baylanıstı qolğa alınıp otır. Euroodaqtıñ sankciyalar turalı bergen tüsindirmesinde: "Qırım men Sevastopol'dağı stansalar qwrılısınıñ bastaluı, jartıtübektiñ  energetikalıq täuelsiz boluına alıp kelip, Ukrainanıñ territoriyalıq twtastığı men täuelsizdigine nwqsan keltiredi" delingen.

Ukraina Prezidenti Petr Poroşenko Euroodaqtıñ bwl qadamın quana qabıldap, jaña sankciyalar agressorğa (Resey) berilgen jaqsı sabaq dep esepteydi. Ol öziniñ Facebook paraqşasında: "Sankciyalardı aynalıp ötuge tırısu, olardıñ küşeye tüsuine alıp keledi. Bwl äreketter Ukrainanıñ territoriyalıq twtastığın tolıqtay qalpına keltirgenşe, jalğasa beredi", - dep jazdı.

“The Qazaq Times”