فوتو: 3rm.info

ەۋرووداقتىڭ رەسەيگە قارسى سالعان سانكتسيالارىنىڭ قاتارى تاعى دا 3 ازامات پەن  گەرمانيانىڭ Siemens كومپانياسى وندىرگەن تۋربينالاردى قىرىمعا جەتكىزۋ داۋىنا قاتىسى بار دەگەن 3 كومپانيانىڭ اتىمەن تولىقتى. "قارا تىزىمگە" ىلىككەن ازاماتتار: رەسەي ەنەرگەتيكا ءمينيسترىنىڭ ورىنباسارى اندرەي چەرەزوۆ، دەپارتامەنت باسشىسى ەۆگەني گرابچاك پەن "تەحنوپرومەكسپورت" كومپانياسىنىڭ باسشىسى سەرگەي توپورگيلكا. ولارعا ەۋرووداق اۋماعىنا وتۋگە تىيىم سالىنىپ، جەكە اكتيۆتەرىنە قولجەتىمدىلىك توقتاتىلادى. 

2014 جىلى رەسەي ۋكراينادان قىرىمدى تارتىپ العانى ءۇشىن، ەۋروپا ەلدەرى جانە اقش ماسكەۋگە قارسى ەكونوميكالىق جانە ديپلوماتيالىق سانكتسيالار ەنگىزگەنى بەلگىلى. ولار ءالى دە ءوز كۇشىندە ەكەنىن ەسكەرگەن ءجون. سوڭعى كەزدە ساراپشىلار ەۋروپا مەن اقش-تىڭ رەسەيمەن قارىم-قاتىناسىن تۇزەۋگە ىنتالى ەكەنىن العا تارتىپ، سانكتسيالار تەك "رەسميلىك" ءۇشىن عانا ساقتالىپ تۇر دەگەن وي بىلدىرگەن. دونالد ترامپتىڭ G-20 سامميتىندە  ۆلاديمير پۋتينمەن جەكە كەزدەسۋىنەن كەيىن، ءسۇريانىڭ وڭتۇستىك-باتىسىندا  امەريكالىق جانە رەسەيلىك اسكەرلەردىڭ دەسكالاتسيا زوناسىن قۇرىپ، بەيبىتشىلىك جاريالاعانى ەكى ەل اراسىنداعى دوستىق بايلانىستاردى نىعايتادى دەگەن سەنىم ۇيالاتتى. دەگەنمەن...

اقش-تا وتكەن بيىلعى پرەزيدەنتتىك سايلاۋعا رەسەي استىرتىن ارالاسقان دەگەن تولاسسىز ايىپتاۋلار كونگرەسستىڭ رەسەيگە قارسى سانكتسيالاردى كۇشەيتۋىنە الىپ كەلدى. دونالد ترامپ ۇزاق ۋاقىت بۇل قۇجاتقا قول قويۋعا تايساقتاپ، ءوزىنىڭ تۆيتتەر پاراقشاسىندا كونگرەسستى رەسەي مەن امەريكا قارىم-قاتىناسىنىڭ "قاۋىپتى شەككە" كەلىپ جەتكەنىنە كىنالاعانىمەن، جاعداي وزگەرگەن جوق. رەسەي ءوز كەزەگىندە ەندى اقش-پەن قارىم-قاتىناسى جاقسارمايتىنىن اشىپ ايتتى.

ەۋرووداق اقش-تىڭ جاڭا سانكتسيالار رەجيمىن ايىپتاپ، قارسىلىق ءبىلدىردى. بۇل ارەكەتى ونىڭ رەسەيگە جانى اشىعانىنان ەمەس، ەكونوميكالىق شەكتەۋلەردىڭ ءبىر ۇشى ءوزىنىڭ ەنەرگەتيكالىق كومپانيالارىنا ءتيىپ كەتەدى مە دەگەن قاۋىپتەن جاسالىپ وتىرعان شارا. ەۋرووداق ءوزىنىڭ قاۋپى شىندىققا اينالعان جاعدايدا، اقش-قا جاۋاپ ەسەبىندە قارسى سانكتسيالار ەنگىزەتىنىن دە جاسىرمادى. ەندى رەسەيدى جاقتاعان مالىمدەمەسىنەن كەيىن اراعا ءبىر اپتا سالماي، ەۋرووداق رەسەيگە قارسى قۇرىلعان "قارا ءتىزىمدى" تاعى ۇزارتىپ وتىر.

سەبەبى...

2014 جىلعى ەۋرووداقتىڭ رەسەيگە قارسى سانكتسيالارىنىڭ ىشىندە ەنەرگەتيكالىق كومپانيالاردىڭ قىرىمعا تاۋار تاسىمالداۋىنا تولىقتاي شەك قوياتىن ءبولىم بار. شىلدە ايىنىڭ باسىندا Reuters اقپاراتتىق اگەنتتىگى "قىرىمدا رەسەيدىڭ باستاماسىمەن سالىنىپ جاتقان ەلەكتر ستانسالارىنا گەرمانيانىڭ Siemens كومپانياسىنىڭ تۋربينالارى جەتكىزىلدى" دەگەن اقپارات تاراتىپ، سەۆاستوپولدان دالەلدى سۋرەتتەر جاريالادى. رەسەي ۇكىمەتى "سۋرەتتەردەگى تۋربينالار قوسالقى نارىقتا ساتىپ الىنىپ، رەسەي زاۋىتتارىندا جاڭارعان وتاندىق ءونىم" دەسە، Siemens كومپانياسى: "بۇل ءبىزدىڭ رەسەيدەگى تامان وبلىسىنا جىبەرگەن تۋربينالارىمىز. ەكى اراداعى كەلىسىم بويىنشا تامانعا جەتكىزىلۋى كەرەك بولعان تۋربينالاردى رەسەي بىزگە ەسكەرتپەستەن، قىرىمعا تاسىمالداعان. وسى ارەكەتى ءۇشىن اراداعى بارلىق كەلىسىمدەردىڭ كۇشىن جويامىز", - دەپ مالىمدەدى.

ەۋرووداقتىڭ جاڭادان ەنگىزىلگەن سانكيالارى وسى تۋربينا داۋىنا بايلانىستى قولعا الىنىپ وتىر. ەۋرووداقتىڭ سانكتسيالار تۋرالى بەرگەن تۇسىندىرمەسىندە: "قىرىم مەن سەۆاستوپولداعى ستانسالار قۇرىلىسىنىڭ باستالۋى، جارتىتۇبەكتىڭ  ەنەرگەتيكالىق تاۋەلسىز بولۋىنا الىپ كەلىپ، ۋكراينانىڭ تەرريتوريالىق تۇتاستىعى مەن تاۋەلسىزدىگىنە نۇقسان كەلتىرەدى" دەلىنگەن.

ۋكراينا پرەزيدەنتى پەتر پوروشەنكو ەۋرووداقتىڭ بۇل قادامىن قۋانا قابىلداپ، جاڭا سانكتسيالار اگرەسسورعا (رەسەي) بەرىلگەن جاقسى ساباق دەپ ەسەپتەيدى. ول ءوزىنىڭ Facebook پاراقشاسىندا: "سانكتسيالاردى اينالىپ وتۋگە تىرىسۋ، ولاردىڭ كۇشەيە تۇسۋىنە الىپ كەلەدى. بۇل ارەكەتتەر ۋكراينانىڭ تەرريتوريالىق تۇتاستىعىن تولىقتاي قالپىنا كەلتىرگەنشە، جالعاسا بەرەدى", - دەپ جازدى.

“The Qazaq Times”