Futbol tarihındağı jaña keyipker nemese Neymardıñ Barselonadan ketui

Düysenbiden ala doptıñ aynalasındağı bolıp jatqan jağdaylar üş wyıqtasañ tüsiñe enbes oqiğalarımen tañ qaldırıp keledi. Äleumettik jelilerdiñ barlıq türinen tek bir jannıñ fotosureti är türli reñde  qaytalana bergeni eşbir jandı eleñ etkizbey qoymağan şığar. Äsirese jastar jağı. Internet sayttarı da tınbay sol obraz iesi jaylı bilse de bilmese de reytingti saqtau üşin birinen biri ötip sensaciya jasağısı keletin sekildi jazıp jatqanına ne dersiñ. Iä, mwnday jağday boladı dep tipti köripkelderiñizde boljap ülgermegen bolar qazirge.

Keybir fil'mderde bastı röldi somdauşı keyipkerdi kinonıñ bastaluınan bayqalmauı mümkin. Bwl jağday ärine scenarist pen rejisserdiñ oyınıñ twtasqan şeberliginiñ arqasında bolatın jağday. Tım qwrığanda kinonıñ orta twsına kelgen kezde bayqay bastaysıñ. Sebebi ol, sol fil'mde öziniñ bastı röldiñ iesi ekenin körermenge däleldep keledi. Bizdiñ bügingi bastı keyipkerimiz de öziniñ bwl oqiğada bastı keyipker ekenin jasıruğa tırısqanımen oqiğanıñ  soñına qaray özin özi äşkere etip alğan siyaqtı.

Jasıl alañdağı jazğı transfer bastalğalı futbolşılardıñ emes, klub prezidentterimen futbolşılardıñ agentteri özara futbol oynauğa kirisip ketken sekildi. Eñ köp talqığa tüsken Ronaldonıñ Real sapınan ketui jaylı tarağan sözderden de mına jağday uşığıp ketti desek qate bolmaytın şığar. Bastapqıda Neymar , Ronaldo sekildi öziniñ qaltasın qampaytu maqsatında «Barselona» klubına oyın qılıp jatqan sekildi edi. Joq. Braziliyalıq jwldız şınımen dayındalğan eken klubtan ketu üşin. Soñında ketti, mine. Mwnı kataloniyalıqtar da resmi türde däleldedi. Messide instagram paraqşasında rolik  tärizdi köriniste qoştastı. Endi fil'mniñ qalğan bölimi Parijde jalğasın tappaq.

Bwl transferdiñ tağı da bir artıqşılığı tek aqşasında emes. Keşe ğana qızıl qwbıjıqtardıñ «MYU» sapına qosılğan Pogbanıñ Mançesterge keler aldında tarağan äñgimeler men bügingi pikirtalastıñ arasında ülken ayırmaşılıq bar. Satıp aluşılarğa qarağanda satıp jibergender jaylı köp aytılıp jatqanı qızıq. Pogba men Neymardı salıstıruğa kelmes mümkin, bwl ärine mısal retinde aytılıp otır. Neymarğa öziniñ därejesindegi oyınşılarmen salıstırğan da dwrıs şığar bälkim.

Äueli, soñğı kezderde jwldızdı oyınşılardıñ soñğı beketi Real ne bolmasa Barselona klubtarı bolıp qalğanı eşkimge jasırın emes. Endi esimi tanılıp kele jatqan futbolşını osı eki klubtıñ bireui satıp aluına äbden köndigip qalğanımız sonşalıqtı, futbolğa nemqwraylı  jandar da endi tanılıp kele jetqan futbolşını köre qalsa Real nemese Barselona alatın şığar dep otıratın bolğan. Biraq Neymar jäne de biikke örleu üşin klubtan ketip jatqan boluı kerek. Sebebin aytpay aq öziñiz bilip otırğan şığarsız. Ia ol Messidiñ köleñkesinde qalıp qoyğanday sezile beredi. Mümkin Neymar basqa maqsattardı közdegen bolar ä?

Qazir katalondıq janküyerler arasında Neymardı satqın dep ayıp tağıp jatqandar tabıladı. Ras. Solay boluı da kerek. Bwl jağday köbirek Luiş Figonı eske tüsiredi. Biraq Figonıñ «Barsa»-dan «Real»-ğa keluindegi közdelgen maqsat basqa edi. Sosın ol biz körip üyrengen «El klassiko»-dan basqa jaqqa ketpegen. YAğni örleu satısında dwrıs şeşim bolğan. Al Neymardıñ Parijge jol aluı, köpşiliktiñ oyında: kezinde Ronaldinonıñ «Barsa»-dan ketip köp ötpey jwldızdıq sätiniñ söngeni tärizdi Neymar da osı jağdayğa tap bolmasa eken degen boljam jatqan siyaqtı. Ärine Ronaldinonıñ ketu sebebi men Neymardıñ «PSJ»-ğa ötui müldem säykes kelmeytin basqa mäseleler bolsa da, däl qazirgi braziliyalıq jwldızdıñ twrğan biiktiginen tömen qaray qwlap bara jatqanday.

Bir jağınan osılay bolğanı da dwrıs şığar. Kim köringen Ispan klubtarınıñ janküyeri bolıp ketpeui kerek şığar. Äyteuir qazir köşede ketip bara jatqan bir top bala körseñiz jartısı «Real» qalğanı «Barselona» ekeni ötirik emes. Arasında basqa klubtıñ janküyeri de bolsın degeni şığar. Meyli, Neymar Parijge barıp biz oylağannan birneşe ese mıqtı oyın körseter. «Altın doptı» da alar bälkim. Biraq Futbol öz tarihındağı eñ mıqtı «ÜŞTİK»-ten ayrıldı, bälkim. Mine osınıñ özi aq tek Barsa tarapına emes kez kelgen jağınan qarasañız da äyteuir bir apattı körinistiñ beynesi elestey beredi.

P/S: Sonımen bastı röldi somdauşı keyipkerdi tanıp ülgerdiñizbe? Messi deysiz be? Mümkin! Biraq Barselonanıñ jaña karoli bapker «Val'verdi»di wmıtpağanıñız jön bolar. Sebebi Kataloniyanıñ erteñgi küni osı kisiniñ moynına jüktetilgenin esten şığarmağan jön. Al endi bastı keyipker kim ekenin öziñiz aq bilip ala beriñiz. 

Nwrğisa Kamalbek

“The Qazaq Times”