فۋتبول تاريحىنداعى جاڭا كەيىپكەر نەمەسە نەيماردىڭ بارسەلونادان كەتۋى

دۇيسەنبىدەن الا دوپتىڭ اينالاسىنداعى بولىپ جاتقان جاعدايلار ءۇش ۇيىقتاساڭ تۇسىڭە ەنبەس وقيعالارىمەن تاڭ قالدىرىپ كەلەدى. الەۋمەتتىك جەلىلەردىڭ بارلىق تۇرىنەن تەك ءبىر جاننىڭ فوتوسۋرەتى ءار ءتۇرلى رەڭدە  قايتالانا بەرگەنى ەشبىر جاندى ەلەڭ ەتكىزبەي قويماعان شىعار. اسىرەسە جاستار جاعى. ينتەرنەت سايتتارى دا تىنباي سول وبراز يەسى جايلى بىلسە دە بىلمەسە دە رەيتينگتى ساقتاۋ ءۇشىن بىرىنەن ءبىرى ءوتىپ سەنساتسيا جاساعىسى كەلەتىن سەكىلدى جازىپ جاتقانىنا نە دەرسىڭ. ءيا، مۇنداي جاعداي بولادى دەپ ءتىپتى كورىپكەلدەرىڭىزدە بولجاپ ۇلگەرمەگەن بولار قازىرگە.

كەيبىر فيلمدەردە باستى ءرولدى سومداۋشى كەيىپكەردى كينونىڭ باستالۋىنان بايقالماۋى مۇمكىن. بۇل جاعداي ارينە ستسەناريست پەن رەجيسسەردىڭ ويىنىڭ تۇتاسقان شەبەرلىگىنىڭ ارقاسىندا بولاتىن جاعداي. تىم قۇرىعاندا كينونىڭ ورتا تۇسىنا كەلگەن كەزدە بايقاي باستايسىڭ. سەبەبى ول، سول فيلمدە ءوزىنىڭ باستى ءرولدىڭ يەسى ەكەنىن كورەرمەنگە دالەلدەپ كەلەدى. ءبىزدىڭ بۇگىنگى باستى كەيىپكەرىمىز دە ءوزىنىڭ بۇل وقيعادا باستى كەيىپكەر ەكەنىن جاسىرۋعا تىرىسقانىمەن وقيعانىڭ  سوڭىنا قاراي ءوزىن ءوزى اشكەرە ەتىپ العان سياقتى.

جاسىل الاڭداعى جازعى ترانسفەر باستالعالى فۋتبولشىلاردىڭ ەمەس، كلۋب پرەزيدەنتتەرىمەن فۋتبولشىلاردىڭ اگەنتتەرى ءوزارا فۋتبول ويناۋعا كىرىسىپ كەتكەن سەكىلدى. ەڭ كوپ تالقىعا تۇسكەن رونالدونىڭ رەال ساپىنان كەتۋى جايلى تاراعان سوزدەردەن دە مىنا جاعداي ۋشىعىپ كەتتى دەسەك قاتە بولمايتىن شىعار. باستاپقىدا نەيمار ، رونالدو سەكىلدى ءوزىنىڭ قالتاسىن قامپايتۋ ماقساتىندا «بارسەلونا» كلۋبىنا ويىن قىلىپ جاتقان سەكىلدى ەدى. جوق. برازيليالىق جۇلدىز شىنىمەن دايىندالعان ەكەن كلۋبتان كەتۋ ءۇشىن. سوڭىندا كەتتى، مىنە. مۇنى كاتالونيالىقتار دا رەسمي تۇردە دالەلدەدى. مەسسيدە ينستاگرام پاراقشاسىندا روليك  تارىزدى كورىنىستە قوشتاستى. ەندى ءفيلمنىڭ قالعان ءبولىمى پاريجدە جالعاسىن تاپپاق.

بۇل ترانسفەردىڭ تاعى دا ءبىر ارتىقشىلىعى تەك اقشاسىندا ەمەس. كەشە عانا قىزىل قۇبىجىقتاردىڭ «ميۋ» ساپىنا قوسىلعان پوگبانىڭ مانچەستەرگە كەلەر الدىندا تاراعان اڭگىمەلەر مەن بۇگىنگى پىكىرتالاستىڭ اراسىندا ۇلكەن ايىرماشىلىق بار. ساتىپ الۋشىلارعا قاراعاندا ساتىپ جىبەرگەندەر جايلى كوپ ايتىلىپ جاتقانى قىزىق. پوگبا مەن نەيماردى سالىستىرۋعا كەلمەس مۇمكىن، بۇل ارينە مىسال رەتىندە ايتىلىپ وتىر. نەيمارعا ءوزىنىڭ دارەجەسىندەگى ويىنشىلارمەن سالىستىرعان دا دۇرىس شىعار بالكىم.

اۋەلى، سوڭعى كەزدەردە جۇلدىزدى ويىنشىلاردىڭ سوڭعى بەكەتى رەال نە بولماسا بارسەلونا كلۋبتارى بولىپ قالعانى ەشكىمگە جاسىرىن ەمەس. ەندى ەسىمى تانىلىپ كەلە جاتقان فۋتبولشىنى وسى ەكى كلۋبتىڭ بىرەۋى ساتىپ الۋىنا ابدەن كوندىگىپ قالعانىمىز سونشالىقتى، فۋتبولعا نەمقۇرايلى  جاندار دا ەندى تانىلىپ كەلە جەتقان فۋتبولشىنى كورە قالسا رەال نەمەسە بارسەلونا الاتىن شىعار دەپ وتىراتىن بولعان. بىراق نەيمار جانە دە بيىككە ورلەۋ ءۇشىن كلۋبتان كەتىپ جاتقان بولۋى كەرەك. سەبەبىن ايتپاي اق ءوزىڭىز ءبىلىپ وتىرعان شىعارسىز. يا ول مەسسيدىڭ كولەڭكەسىندە قالىپ قويعانداي سەزىلە بەرەدى. مۇمكىن نەيمار باسقا ماقساتتاردى كوزدەگەن بولار ءا؟

قازىر كاتالوندىق جانكۇيەرلەر اراسىندا نەيماردى ساتقىن دەپ ايىپ تاعىپ جاتقاندار تابىلادى. راس. سولاي بولۋى دا كەرەك. بۇل جاعداي كوبىرەك لۋيش فيگونى ەسكە تۇسىرەدى. بىراق فيگونىڭ «بارسا»-دان «رەال»-عا كەلۋىندەگى كوزدەلگەن ماقسات باسقا ەدى. سوسىن ول ءبىز كورىپ ۇيرەنگەن «ەل كلاسسيكو»-دان باسقا جاققا كەتپەگەن. ياعني ورلەۋ ساتىسىندا دۇرىس شەشىم بولعان. ال نەيماردىڭ پاريجگە جول الۋى، كوپشىلىكتىڭ ويىندا: كەزىندە رونالدينونىڭ «بارسا»-دان كەتىپ كوپ وتپەي جۇلدىزدىق ءساتىنىڭ سونگەنى ءتارىزدى نەيمار دا وسى جاعدايعا تاپ بولماسا ەكەن دەگەن بولجام جاتقان سياقتى. ارينە رونالدينونىڭ كەتۋ سەبەبى مەن نەيماردىڭ «پسج»-عا ءوتۋى مۇلدەم سايكەس كەلمەيتىن باسقا ماسەلەلەر بولسا دا، ءدال قازىرگى برازيليالىق جۇلدىزدىڭ تۇرعان بيىكتىگىنەن تومەن قاراي قۇلاپ بارا جاتقانداي.

ءبىر جاعىنان وسىلاي بولعانى دا دۇرىس شىعار. كىم كورىنگەن يسپان كلۋبتارىنىڭ جانكۇيەرى بولىپ كەتپەۋى كەرەك شىعار. ايتەۋىر قازىر كوشەدە كەتىپ بارا جاتقان ءبىر توپ بالا كورسەڭىز جارتىسى «رەال» قالعانى «بارسەلونا» ەكەنى وتىرىك ەمەس. اراسىندا باسقا كلۋبتىڭ جانكۇيەرى دە بولسىن دەگەنى شىعار. مەيلى، نەيمار پاريجگە بارىپ ءبىز ويلاعاننان بىرنەشە ەسە مىقتى ويىن كورسەتەر. «التىن دوپتى» دا الار بالكىم. بىراق فۋتبول ءوز تاريحىنداعى ەڭ مىقتى «ۇشتىك»-تەن ايرىلدى، بالكىم. مىنە وسىنىڭ ءوزى اق تەك بارسا تاراپىنا ەمەس كەز كەلگەن جاعىنان قاراساڭىز دا ايتەۋىر ءبىر اپاتتى كورىنىستىڭ بەينەسى ەلەستەي بەرەدى.

P/S: سونىمەن باستى ءرولدى سومداۋشى كەيىپكەردى تانىپ ۇلگەردىڭىزبە؟ مەسسي دەيسىز بە؟ مۇمكىن! بىراق بارسەلونانىڭ جاڭا كارولى باپكەر «ۆالۆەردي»دى ۇمىتپاعانىڭىز ءجون بولار. سەبەبى كاتالونيانىڭ ەرتەڭگى كۇنى وسى كىسىنىڭ موينىنا جۇكتەتىلگەنىن ەستەن شىعارماعان ءجون. ال ەندى باستى كەيىپكەر كىم ەكەنىن ءوزىڭىز اق ءبىلىپ الا بەرىڭىز. 

نۇرعيسا كامالبەك

“The Qazaq Times”