Foto: Habar 24

QR Wlttıq ekonomika ministrligi men Auıl şaruaşılığı ministrligi qant bağasına qatıstı tüsinikteme berdi. Şeneunikterdiñ sözinşe, qant bağası ösedi deudiñ qajeti joq.

Sonımen Wlttıq ekonomika vice-ministri Aybatır Jwmağwlov ükimette ötken baspasöz konferenciyasında "bwl önimniñ bağası josparlanğan deñgey boyınşa özgeredi" degendi aytadı.

"Öñirlerdegi bağa deñgeyi jıldıñ soñına deyin biz belgilegen josparğa säykes boladı dep esepteymiz. Sondıqtan bağa qwbılmalığı boladı dep oylamaymız. Öñirler boyınşa naqtı jwmıs istelip jatır, bağa monitoringin jasaymız", - dedi ol.

Al Auıl şaruaşılığı vice-ministri Rüstem Qwrmanov är oblısta qant qorı jetkilikti ekenin atap ötti.

"Bizde qant qorı 500 mıñ tonnanı qwraydı. Öñirlerde önim qorı bar. Al onıñ bağasınıñ birden qımbattap ketu tendenciyası bayqalmaydı", - dedi AŞM ökili.

Ayta keteyik, Qazaqstanda jıl sayın jazdıñ ortası men küz aylarında tättiniñ bağası şarıqtap ketetini belgili. Mısalı bıltır Qazaqstannıñ biraz oblısında qanttıñ bağası 20-25%-ğa, key öñirde 30%-ğa deyin köterilgen. Sol kezde eñ joğarı bağa Atırau qalasında tirkeldi. Mwnda 1 kg qanttıñ qwnı 400 teñgege deyin jetken.

“The Qazaq Times”