Katar doha. Foto: visitqatar.qa.

Arab elderiniñ Katarğa qoyğan talaptarı toytarısqa wşıradı. Alayda, Saud Arabiyası bastağan arab elderi özderiniñ Katarğa bağıttağan boykot qaulısın jalğastıruğa bel baylap otır. Bwl turalı şeşimderi Kairde ötken Saud Arabiyası, Birikken Arab Ämirligi, Bahreyn jäne Egipettiñ sırtqı ister ministrleriniñ bas qosuında qabıldağan bolatın.

Arab ministrleri jinalısta bir auızdan Katardıñ keri jauabın ayıptadı. Olar «Katar ämirligi öziniñ qanday küyge tap bolğalı otırğandarın tura bağamday almay otır» degen pikirde. Saud Arabiyası SİM basşısı bastap Katarğa qaratılğan qosımşa şaralardı iske qosu boyınşa qararların ortağa salıstı.

Esteriñizde bolsa osıdan bir ay bwrın, yağni 5 mausım küni Saud Arabiyası bastağan bir qatar arab elderi Katarmen bolğan barlıq diplomatiyalıq qatınasın üzip, Katar dağdarısın ornatqan bolatın. Bwl 2017 jıldıñ halıqaralıq sayasi alañdağı eñ bir eleuli oqiğa bolıp edi. Keyinnen Katarğa qoyğan arab elderiniñ 13 türli talabı aqtalmay qaldı. Al, arab elderi bolsa Katardı terrorlıq toptarğa qoldau körsetip otır dep ayıptaydı.

Katardı «Mwsılman bauırlar» wyımın qoldap otır dep ayıptaytınınıñ bir sebebin tarata ketelik. Birqatar arab elderiniñ jariyalağan mälimetterine süyensek, Katar biligi Iranda añ aulap jürip qolğa tüsip qalğan Katar ämiriniñ otbası müşelerin qwtqaru üşin, Iran qoldau körsetip otır dep qaralatın şiit qarulı toptarına köp mölşerde qarjı audarğan. Derektiñ ras-jalğandığı turalı är eldiñ basılımdarı är türli aytadı. Alayda, Saud äuletine qaraytın Arabstan bastağan birqatar arab elderi Katardıñ bwl äreketin terrorlıq wyımğa qoldau körsetu dep tauıp otır.

Katar jağı özge arab elderi qoyğan talaptar men olardıñ taqqan ayıbın teriske şığardı. Katar SİM basşısınıñ aytuınşa olardıñ qoyğan talabı kelissözge tartu emes, kerisinşe Parsı şığanağı elderin Saud Arabiyasınıñ sırtqı sayasatına küştep boysındırudı közdeydi eken. Sonımen birge 13 tarmaqtı talaptar tolıqtay Katardıñ egemendigine qol swğumen para-par dep körsetti.

Osılay oqiğa jülgesin qualay otırıp şeginis jasaytın bolsaq, Katar dağdarısınıñ bolımsız säulesinen AQŞ-tıñ köleñkesin de köre alamız. Qwrama Ştattıñ qazirgi prezidenti Donal'd Tramptıñ alğaşqı saparı Orta, Tayau-Şığıstağı arab jäne evrey eline baruı, öñirge az bolmağan jaña oqiğalar tartu etti deuge bolatınday. Katar dağdarısınan birer apta bwrın Arab elinde bolıp qaytqan Tramp, keyin Izrail'ge, sosın Europa elderine at basıp bwrdı. Tramptıñ Orta-Şığıs sayasatınıñ bastı bağıtı Irannıñ öñirdegi ıqpalınıñ artıp ketuiniñ aldın alu jäne onı sayasi oqşaulau. Ol üşin arab elderiniñ qolımen ot köseu köpten bergi Uaşingtonğa tän ğadet desek artıq emes.

“The Qazaq Times”