كاتار داعدارىسىنىڭ كولەڭكەسىندە كىم جاتىر؟

اراب ەلدەرىنىڭ كاتارعا قويعان تالاپتارى تويتارىسقا ۇشىرادى. الايدا، ساۋد ارابياسى باستاعان اراب ەلدەرى وزدەرىنىڭ كاتارعا باعىتتاعان بويكوت قاۋلىسىن جالعاستىرۋعا بەل بايلاپ وتىر. بۇل تۋرالى شەشىمدەرى كايردە وتكەن ساۋد ارابياسى، بىرىككەن اراب امىرلىگى، باحرەين جانە ەگيپەتتىڭ سىرتقى ىستەر مينيسترلەرىنىڭ باس قوسۋىندا قابىلداعان بولاتىن.

اراب مينيسترلەرى جينالىستا ءبىر اۋىزدان كاتاردىڭ كەرى جاۋابىن ايىپتادى. ولار «كاتار امىرلىگى ءوزىنىڭ قانداي كۇيگە تاپ بولعالى وتىرعاندارىن تۋرا باعامداي الماي وتىر» دەگەن پىكىردە. ساۋد ارابياسى ءسىم باسشىسى باستاپ كاتارعا قاراتىلعان قوسىمشا شارالاردى ىسكە قوسۋ بويىنشا قارارلارىن ورتاعا سالىستى.

ەستەرىڭىزدە بولسا وسىدان ءبىر اي بۇرىن، ياعني 5 ماۋسىم كۇنى ساۋد ارابياسى باستاعان ءبىر قاتار اراب ەلدەرى كاتارمەن بولعان بارلىق ديپلوماتيالىق قاتىناسىن ءۇزىپ، كاتار داعدارىسىن ورناتقان بولاتىن. بۇل 2017 جىلدىڭ حالىقارالىق ساياسي الاڭداعى ەڭ ءبىر ەلەۋلى وقيعا بولىپ ەدى. كەيىننەن كاتارعا قويعان اراب ەلدەرىنىڭ 13 ءتۇرلى تالابى اقتالماي قالدى. ال، اراب ەلدەرى بولسا كاتاردى تەررورلىق توپتارعا قولداۋ كورسەتىپ وتىر دەپ ايىپتايدى.

كاتاردى «مۇسىلمان باۋىرلار» ۇيىمىن قولداپ وتىر دەپ ايىپتايتىنىنىڭ ءبىر سەبەبىن تاراتا كەتەلىك. بىرقاتار اراب ەلدەرىنىڭ جاريالاعان مالىمەتتەرىنە سۇيەنسەك، كاتار بيلىگى يراندا اڭ اۋلاپ ءجۇرىپ قولعا ءتۇسىپ قالعان كاتار ءامىرىنىڭ وتباسى مۇشەلەرىن قۇتقارۋ ءۇشىن، يران قولداۋ كورسەتىپ وتىر دەپ قارالاتىن شيت قارۋلى توپتارىنا كوپ مولشەردە قارجى اۋدارعان. دەرەكتىڭ راس-جالعاندىعى تۋرالى ءار ەلدىڭ باسىلىمدارى ءار ءتۇرلى ايتادى. الايدا، ساۋد اۋلەتىنە قارايتىن ارابستان باستاعان بىرقاتار اراب ەلدەرى كاتاردىڭ بۇل ارەكەتىن تەررورلىق ۇيىمعا قولداۋ كورسەتۋ دەپ تاۋىپ وتىر.

كاتار جاعى وزگە اراب ەلدەرى قويعان تالاپتار مەن ولاردىڭ تاققان ايىبىن تەرىسكە شىعاردى. كاتار ءسىم باسشىسىنىڭ ايتۋىنشا ولاردىڭ قويعان تالابى كەلىسسوزگە تارتۋ ەمەس، كەرىسىنشە پارسى شىعاناعى ەلدەرىن ساۋد ارابياسىنىڭ سىرتقى ساياساتىنا كۇشتەپ بويسىندىرۋدى كوزدەيدى ەكەن. سونىمەن بىرگە 13 تارماقتى تالاپتار تولىقتاي كاتاردىڭ ەگەمەندىگىنە قول سۇعۋمەن پارا-پار دەپ كورسەتتى.

وسىلاي وقيعا جۇلگەسىن قۋالاي وتىرىپ شەگىنىس جاسايتىن بولساق، كاتار داعدارىسىنىڭ بولىمسىز ساۋلەسىنەن اقش-تىڭ كولەڭكەسىن دە كورە الامىز. قۇراما شتاتتىڭ قازىرگى پرەزيدەنتى دونالد ترامپتىڭ العاشقى ساپارى ورتا، تاياۋ-شىعىستاعى اراب جانە ەۆرەي ەلىنە بارۋى، وڭىرگە از بولماعان جاڭا وقيعالار تارتۋ ەتتى دەۋگە بولاتىنداي. كاتار داعدارىسىنان بىرەر اپتا بۇرىن اراب ەلىندە بولىپ قايتقان ترامپ، كەيىن يزرايلگە، سوسىن ەۋروپا ەلدەرىنە ات باسىپ بۇردى. ترامپتىڭ ورتا-شىعىس ساياساتىنىڭ باستى باعىتى يراننىڭ وڭىردەگى ىقپالىنىڭ ارتىپ كەتۋىنىڭ الدىن الۋ جانە ونى ساياسي وقشاۋلاۋ. ول ءۇشىن اراب ەلدەرىنىڭ قولىمەن وت كوسەۋ كوپتەن بەرگى ۋاشينگتونعا ءتان عادەت دەسەك ارتىق ەمەس.

“The Qazaq Times”