Foto: abctv.kz

Biıl Qazaqstan öziniñ 26 jıl täuelsiz ğwmırında köptegen şaralar ötkizip jatqanı belgili. Ol Almatıda ötken «Universiyada» oyındarınan bastap, Astanada älem elderiniñ basın qosqan «EKSPO-2017» halıqaralıq körmesimen ayaqtaladı. Bwl şaralar el imidjin köteru üşin ötkizu kerek aq dünie şığar. Biraq osınşama düniege qıruar qarjı qwrtqanda sol EKSPO-nıñ «Nwrlı äleminiñ» bir bölmesine biıl qwrılğanına 100 jıl tolıp otırğan Alaş qozğalısına nege orın bwyırmay qaldı? Biz kimderdiñ aldında qarızdar ekenimizdi nege wmıtıp qaldıq? «Öli razı bolmay tiri bayımaydı» degen qazaqtıñ maqalın nege wmıt qaldırdıq?

Bwl swraqtarğa jauaptı 26 jıl el basqarğan joğarıdağı atqaminerlerdiñ emeuirinen wğınuğa boladı. Mısalı osı uaqıtqa deyin olar ne aytıp keldi? Bwğan deyin qazaqta el bolmağan dep bir kökidi, qazaqtı, qazaq qılğan elbası dep bir kökidi. Qazaqstan tarihında Nazarbaevtay köşbasşı bolğan emes dep aytıp kele jatqandarına 26 jıl boldı. Maqtaudan olar jalıqpaydı, maqtanudan ol jalıqpaydı. Alaş qozğalısınıñ 100 jıldığın öz därejesinde atap ötpeuleriniñ sebebi de osında jatır. Eger Alaş qozğalısın öz deñgeyinde nasihattaytın bolsa, osığan deyin aytıp kelgen dünieleriniñ barlığı joqqa şığatının olar bilmeydi emes biledi. Öytkeni Alaştı qozğasa onıñ artında Älihan Bökeyhanov, Ahmet Baytwrsınwlı, Sımağwl Saduaqasov sındı qazaq demokrattarı, qazaq köşbasşıları twr. Tipti kerek deseñiz Alaş dese qazaqtıñ twñğış partiyası men prezidenti twr.

Alaştı memlekettik deñgeyde nasihattaytın bolsa, 26 jıl boyı maqtanu men jağımpazdıqtan salğan äynek sarayları biraq künde şıtınap ertegiler äleminiñ tügide qalmayın dep twr. Al bwl olarğa kerek emes, kerek emes bolğasın Qazaqstannıñ är tükpirinde «jetim qızdıñ toyınday qılıp» Alaşqa baylanıstı şağın ğılımi konferenciyalar, döñgelek üstelder, as beruler ötkizip jatır. Bwl äyteuir el şulamasın, elde jürgen birdi, ekili alaştanuşı zarlamasınnıñ qamı. Onıñ özinde bwl ülkendi, kişili ğılımi zertteuler men döñgelek üstelderdiñ basım köpşiligin azamattıq belsendiler men täuelsiz wyımdar wyımdastırıp jür.

Eger şınımen Alaş qayratkerleri salğan jolmen jürgileri keletin bolsa, onda EKSPO-nıñ qaq ortasınan pavilion berip Qazaqstanğa ğana emes bükil älemge Alaş atın asqaqtatuğa bolar edi. Bizde de osınday partiya, osınday azamattar bolğan. Olardı qızıl imperiya osınlay azaptap öltirgen, qazaq wltına qarsı genocid jasağan dep aytar edi. Al olar olay istemey otır. Öytkeni joğarıda atalğan sebepterden bölek, bwl jerde qorqaqtıq, jaltaqtıq degen dünie jatır. Ol Reseyden qorqu, sol bayağı Mäskeuge, Kreml'ge jaltaqtau. Osı jerde qazaqtıñ bir sözi eske tüsedi «qasqırdan bir ret talanğan küşik, ekinşi ret oğan qarsı bettemeydi» degen. Ätpese bizden basqa evreyler, ukrainder barlığı, barlığı halqın qırğan aştıqtı, ziyalılarına jasalğan qastandıqtı genocid dep tanıp qoydı. Al biz äli otırmız. Bir sözben aytqanda Qazaqstanda Alaş nasihattalu üşin  mäñgilik eldegi mäñgilik bilik auısuı kerek şığar.

«The Qazaq Times»