Foto: Kapital.kz

«Qazaqstan Damu Banki» AQ jäne «PetroQazaqstan Oyl Prodakts» JŞS bwrın qol qoyılğan kredittik kelisim şeñberinde 32,5 mlrd teñge (100 mln AQŞ dolları) somasına alğaşqı tranşqa banktik qarız şartına qol qoydı, dep habarlaydı "Qazmwnaygaz - Öñdeu jäne marketing" kompaniyası.

Banktik qarız 2017 jılğı 19 mamırda qol qoyılğan Qazaqstan Respublikasın industriyalıq-innovaciyalıq damıtudıñ 2015 – 2019 jıldarğa arnalğan memlekettik bağdarlaması şeñberinde Şımkent mwnay öñdeu zauıtın jañğırtu jäne rekonstrukciyalau jobasın iske asıru üşin kredittik jelini aşu turalı Kelisimge säykes berildi.

Qarızdıñ jalpı soması 932 mln AQŞ dolların qwraydı jäne 13 jıl merzimge beriledi.

Şımkent MÖZ-in jañğırtu jäne rekonstrukciyalau eki kezeñmen iske asırıladı. Qazirgi uaqıtta kepildemelik ekspluataciyalıq körsetkişterge jete otırıp, jañğırtudıñ birinşi kezeñi ayaqtaluda. Osı jılğı 30 mausımda birinşi kezeñniñ soñğı tehnologiyalıq nısanı – izomerizaciya qondırğısı paydalanuğa engiziledi, nätijesinde K4, K5 ekologiyalıq klastardıñ (Euro-4 jäne Euro-5 analogtarı) joğarı oktandı benzini men dizel' otını şığarılatın boladı.

Jobanıñ ekinşi kezeñi – tehnologiyalıq jağınan asa kürdeli. Ol zauıt quatın jılına 6 mln tonna mwnayğa deyin jäne onı öñdeu tereñdigin wlğaytuğa bağıttalğan. Kezeñ joğarı oktandı motor otındarın alumen quatı jılına 2 mln tonna mwnaydı tereñ öñdeuge arnalğan katalitikalıq kreking keşenin saludı qamtidı.

Şımkent mwnay öñdeu zauıtı 1985 jılı salındı. Zauıt Qazaqstannıñ üş mwnay öñdeu zauıttarı şığaratın mwnay önimderiniñ jalpı jıldıq köleminen 30%-ın öñdeydi.

ŞMÖZ-di jañğırtu 2011 jılı ÜIID Memlekettik bağdarlaması şeñberinde bastaldı.

«QMG-ÖM» AQ men CNPC zauıttıñ 49,72% ülesinen iemdenedi, akciyalardıñ 0,57%-ı minoritariylerge tiesili.

“The Qazaq Times”