فوتو: Kapital.kz

«قازاقستان دامۋ بانكى» اق جانە «پەتروقازاقستان ويل پروداكتس» جشس بۇرىن قول قويىلعان كرەديتتىك كەلىسىم شەڭبەرىندە 32,5 ملرد تەڭگە (100 ملن اقش دوللارى) سوماسىنا العاشقى ترانشقا بانكتىك قارىز شارتىنا قول قويدى، دەپ حابارلايدى "قازمۇنايگاز - وڭدەۋ جانە ماركەتينگ" كومپانياسى.

بانكتىك قارىز 2017 جىلعى 19 مامىردا قول قويىلعان قازاقستان رەسپۋبليكاسىن يندۋستريالىق-يننوۆاتسيالىق دامىتۋدىڭ 2015 – 2019 جىلدارعا ارنالعان مەملەكەتتىك باعدارلاماسى شەڭبەرىندە شىمكەنت مۇناي وڭدەۋ زاۋىتىن جاڭعىرتۋ جانە رەكونسترۋكتسيالاۋ جوباسىن ىسكە اسىرۋ ءۇشىن كرەديتتىك جەلىنى اشۋ تۋرالى كەلىسىمگە سايكەس بەرىلدى.

قارىزدىڭ جالپى سوماسى 932 ملن اقش دوللارىن قۇرايدى جانە 13 جىل مەرزىمگە بەرىلەدى.

شىمكەنت ءموز-ءىن جاڭعىرتۋ جانە رەكونسترۋكتسيالاۋ ەكى كەزەڭمەن ىسكە اسىرىلادى. قازىرگى ۋاقىتتا كەپىلدەمەلىك ەكسپلۋاتاتسيالىق كورسەتكىشتەرگە جەتە وتىرىپ، جاڭعىرتۋدىڭ ءبىرىنشى كەزەڭى اياقتالۋدا. وسى جىلعى 30 ماۋسىمدا ءبىرىنشى كەزەڭنىڭ سوڭعى تەحنولوگيالىق نىسانى – يزومەريزاتسيا قوندىرعىسى پايدالانۋعا ەنگىزىلەدى، ناتيجەسىندە ك4, ك5 ەكولوگيالىق كلاستاردىڭ (ەۋرو-4 جانە ەۋرو-5 انالوگتارى) جوعارى وكتاندى بەنزينى مەن ديزەل وتىنى شىعارىلاتىن بولادى.

جوبانىڭ ەكىنشى كەزەڭى – تەحنولوگيالىق جاعىنان اسا كۇردەلى. ول زاۋىت قۋاتىن جىلىنا 6 ملن توننا مۇنايعا دەيىن جانە ونى وڭدەۋ تەرەڭدىگىن ۇلعايتۋعا باعىتتالعان. كەزەڭ جوعارى وكتاندى موتور وتىندارىن الۋمەن قۋاتى جىلىنا 2 ملن توننا مۇنايدى تەرەڭ وڭدەۋگە ارنالعان كاتاليتيكالىق كرەكينگ كەشەنىن سالۋدى قامتيدى.

شىمكەنت مۇناي وڭدەۋ زاۋىتى 1985 جىلى سالىندى. زاۋىت قازاقستاننىڭ ءۇش مۇناي وڭدەۋ زاۋىتتارى شىعاراتىن مۇناي ونىمدەرىنىڭ جالپى جىلدىق كولەمىنەن 30%-ىن وڭدەيدى.

ءشموز-ءدى جاڭعىرتۋ 2011 جىلى ءۇيد مەملەكەتتىك باعدارلاماسى شەڭبەرىندە باستالدى.

«قمگ-ءوم» اق مەن CNPC زاۋىتتىڭ 49,72% ۇلەسىنەن يەمدەنەدى، اكتسيالاردىڭ 0,57%-ى مينوريتاريلەرگە تيەسىلى.

“The Qazaq Times”