Almatı mañındağı Qırğauıldı auılında onkologiya dertine şaldıqqan balalarğa arnalğan jazğı lager' jwmısın bastadı. Atalğan is-şaranı «Men senimen birgemin» damu jäne psihologiyalıq qoldau ortalığında oñaltudan ötip jatqan onkologiya derti bar balalarğa arnap «Deni sau Aziya» qoğamdıq qorı wyımdastırdı. Qazaqstandağı balalar onkologiyasınıñ mañızdı mäselelerin keşendi türde şeşuge jwmıs isteytin mekeme jobası, diagnoz qoyılğannan keyin qorşağan orta men qoğamdıq ömirden qol üzip qalatın balalardı äleumettik beyimdeu, olardıñ jazğı demalısın köñildi wyımdastıru, balalar men ata-analarğa psihologiyalıq qoldau körsetudi maqsat twtadı.

Demeuşilerdiñ qoldauımen qwrılğan lager'de oyın alañı, jüzu basseyni, oqu bölmesi, sport keşeni, suret bölmesi, ata-analarğa arnalğan bwrıştar, tipti dini qwlşılıq orındarı da qarastırılğan. Mwnda onkologiya sırqatına şaldıqqan balalarmen jwmıs isteuden ondağan jıldıq täjiribesi bar mamandar jasöspirimderdiñ demalısın wyımdastıruda ertegi, qwm, art-terapiyası sındı zamanaui ädistemelerdi qoldanadı. Lager' ayasında sonday-aq mobildi jedel-järdem köligi men bilikti däriger mamandar qızmet etedi. Jaz mezgilinde balalar ärbir tañın yoga jäne gimnastika sabaqtarınan bastap, künderin mwrajaylar men mädeni demalıs orındarına sayahatpen jalğastıradı.

Onkologiya dertin qabıldau balalardıñ äli qalıptasıp ülgermegen psihologiyasına auır soğadı. Auruhana qabırğasında aylap, jıldap uaqıt ötkizu, üzdiksiz em şaraların qabıldau, özinde orın alıp jatqan özgeristerge beyimdelu – jas jetkinşek üşin eñ ülken sınaqtardıñ biri. Em qabıldau kezinde mektepten jıldap qalıp qoyatın balalardıñ sabaq ülgerimi naşarlap, dostarınan ajırap qalatını tağı bar. Osı olqılıqtıñ ornın toltıru üşin qwrılğan «Men senimen birgemin» damu jäne psihologiyalıq qoldau ortalığında balalarğa ärtürli treningter, oyındar jäne psiholog mamandarmen arnayı şeberlik sağattarı ötkiziledi. Erikti türde jinalğan student jastar balalarğa mektep bağdarlamasındağı pänder boyınşa jiberip alğan sabaqtarın meñgeruge, bilimin jetildiruge kömektesedi.

«Deni sau Aziya» qoğamdıq qorınıñ negizin saluşı psiholog maman Nagima Plohih: «Onkologiya dertin jeñude köp mamandar psihologiyalıq faktordıñ eñ ülken röl atqaratının eskermeydi. Özin aynalasına qajet sezingen, meyirim men mahabbatqa bölengen, ünemi köñildi jürgen balanıñ sırqattı jeñu ıqtimaldılığı auruhana töseginde ölim sağatın tosıp jatqan nauqaspen salıstırğanda äldeqayda joğarı ekendigimen eşkim talasa qoymas. Bizdiñ maqsatımız da – balalarğa onkologiya dertimen küreste qolaylı, qoldau men jılulıqqa tolı orta qalıptastırıp beru», - deydi.

Osı ortalıqqa 2012 jıldan beri qızın äkelip jürgen Şajanbaeva Gülim esimdi ana, perzentiniñ ömirinde orın alğan oñ özgeristermen bılay bölisti:

«Biz bwl ortalıq qızmetimen «Alatau» şipajayında em qabıldap jürgen kezden beri tanıspız. Ol qızımızda onkologiya derti anıqtalğan, bwl nendey auru ekendiginen mülde habarsız, arı qarayğı äreketterimiz belgisiz bolğan auır sät edi. Ortalıq qızmetkerleri tek balalarmen ğana emes, olardıñ ata-analarına da sırqattıñ män-jayın tügel tüsindirip, qanday em-şaralarına jüginu kerektigi jöninde paydalı keñester berip, ülken qoldau körsetedi. Soñğı 5 jıl köleminde psihologiyalıq qoldau ortalığımen tığız baylanısta jwmıs isteu qızımnıñ onkologiya dertin jeñuine ülken ıqpal etti. Qazir 9-sınıptı tämämdağan Qımbat medicina qızmetkeri mamandığına oquğa tüsuge dayındalıp jür. Bolaşaqta özi siyaqtı balalarğa sırqatınan ayığuğa kömektesudi arman etedi».

Jalpı wzaqtığı  5 mausımğa sozıladı  dep josparlanğan jazğı lager'ge är auısımda  20 künge 20 baladan qabıldanadı. Atap ötu kerek, onkologiya dertine şaldıqqan balalarğa arnalğan jazğı lager' tolıqtay tegin türde jwmıs isteydi.

“The Qazaq Times”