الماتى ماڭىنداعى قىرعاۋىلدى اۋىلىندا ونكولوگيا دەرتىنە شالدىققان بالالارعا ارنالعان جازعى لاگەر جۇمىسىن باستادى. اتالعان ءىس-شارانى «مەن سەنىمەن بىرگەمىن» دامۋ جانە پسيحولوگيالىق قولداۋ ورتالىعىندا وڭالتۋدان ءوتىپ جاتقان ونكولوگيا دەرتى بار بالالارعا ارناپ «دەنى ساۋ ازيا» قوعامدىق قورى ۇيىمداستىردى. قازاقستانداعى بالالار ونكولوگياسىنىڭ ماڭىزدى ماسەلەلەرىن كەشەندى تۇردە شەشۋگە جۇمىس ىستەيتىن مەكەمە جوباسى، دياگنوز قويىلعاننان كەيىن قورشاعان ورتا مەن قوعامدىق ومىردەن قول ءۇزىپ قالاتىن بالالاردى الەۋمەتتىك بەيىمدەۋ، ولاردىڭ جازعى دەمالىسىن كوڭىلدى ۇيىمداستىرۋ، بالالار مەن اتا-انالارعا پسيحولوگيالىق قولداۋ كورسەتۋدى ماقسات تۇتادى.

دەمەۋشىلەردىڭ قولداۋىمەن قۇرىلعان لاگەردە ويىن الاڭى، ءجۇزۋ باسسەينى، وقۋ بولمەسى، سپورت كەشەنى، سۋرەت بولمەسى، اتا-انالارعا ارنالعان بۇرىشتار، ءتىپتى ءدىني قۇلشىلىق ورىندارى دا قاراستىرىلعان. مۇندا ونكولوگيا سىرقاتىنا شالدىققان بالالارمەن جۇمىس ىستەۋدەن ونداعان جىلدىق تاجىريبەسى بار ماماندار جاسوسپىرىمدەردىڭ دەمالىسىن ۇيىمداستىرۋدا ەرتەگى، قۇم، ارت-تەراپياسى سىندى زاماناۋي ادىستەمەلەردى قولدانادى. لاگەر اياسىندا سونداي-اق ءموبيلدى جەدەل-جاردەم كولىگى مەن بىلىكتى دارىگەر ماماندار قىزمەت ەتەدى. جاز مەزگىلىندە بالالار ءاربىر تاڭىن يوگا جانە گيمناستيكا ساباقتارىنان باستاپ، كۇندەرىن مۇراجايلار مەن مادەني دەمالىس ورىندارىنا ساياحاتپەن جالعاستىرادى.

ونكولوگيا دەرتىن قابىلداۋ بالالاردىڭ ءالى قالىپتاسىپ ۇلگەرمەگەن پسيحولوگياسىنا اۋىر سوعادى. اۋرۋحانا قابىرعاسىندا ايلاپ، جىلداپ ۋاقىت وتكىزۋ، ۇزدىكسىز ەم شارالارىن قابىلداۋ، وزىندە ورىن الىپ جاتقان وزگەرىستەرگە بەيىمدەلۋ – جاس جەتكىنشەك ءۇشىن ەڭ ۇلكەن سىناقتاردىڭ ءبىرى. ەم قابىلداۋ كەزىندە مەكتەپتەن جىلداپ قالىپ قوياتىن بالالاردىڭ ساباق ۇلگەرىمى ناشارلاپ، دوستارىنان اجىراپ قالاتىنى تاعى بار. وسى ولقىلىقتىڭ ورنىن تولتىرۋ ءۇشىن قۇرىلعان «مەن سەنىمەن بىرگەمىن» دامۋ جانە پسيحولوگيالىق قولداۋ ورتالىعىندا بالالارعا ءارتۇرلى ترەنينگتەر، ويىندار جانە پسيحولوگ ماماندارمەن ارنايى شەبەرلىك ساعاتتارى وتكىزىلەدى. ەرىكتى تۇردە جينالعان ستۋدەنت جاستار بالالارعا مەكتەپ باعدارلاماسىنداعى پاندەر بويىنشا جىبەرىپ العان ساباقتارىن مەڭگەرۋگە، ءبىلىمىن جەتىلدىرۋگە كومەكتەسەدى.

«دەنى ساۋ ازيا» قوعامدىق قورىنىڭ نەگىزىن سالۋشى پسيحولوگ مامان ناگيما پلوحيح: «ونكولوگيا دەرتىن جەڭۋدە كوپ ماماندار پسيحولوگيالىق فاكتوردىڭ ەڭ ۇلكەن ءرول اتقاراتىنىن ەسكەرمەيدى. ءوزىن اينالاسىنا قاجەت سەزىنگەن، مەيىرىم مەن ماحابباتقا بولەنگەن، ۇنەمى كوڭىلدى جۇرگەن بالانىڭ سىرقاتتى جەڭۋ ىقتيمالدىلىعى اۋرۋحانا توسەگىندە ءولىم ساعاتىن توسىپ جاتقان ناۋقاسپەن سالىستىرعاندا الدەقايدا جوعارى ەكەندىگىمەن ەشكىم تالاسا قويماس. ءبىزدىڭ ماقساتىمىز دا – بالالارعا ونكولوگيا دەرتىمەن كۇرەستە قولايلى، قولداۋ مەن جىلۋلىققا تولى ورتا قالىپتاستىرىپ بەرۋ»، - دەيدى.

وسى ورتالىققا 2012 جىلدان بەرى قىزىن اكەلىپ جۇرگەن شاجانباەۆا گۇلىم ەسىمدى انا، پەرزەنتىنىڭ ومىرىندە ورىن العان وڭ وزگەرىستەرمەن بىلاي ءبولىستى:

«ءبىز بۇل ورتالىق قىزمەتىمەن «الاتاۋ» شيپاجايىندا ەم قابىلداپ جۇرگەن كەزدەن بەرى تانىسپىز. ول قىزىمىزدا ونكولوگيا دەرتى انىقتالعان، بۇل نەندەي اۋرۋ ەكەندىگىنەن مۇلدە حابارسىز، ارى قارايعى ارەكەتتەرىمىز بەلگىسىز بولعان اۋىر ءسات ەدى. ورتالىق قىزمەتكەرلەرى تەك بالالارمەن عانا ەمەس، ولاردىڭ اتا-انالارىنا دا سىرقاتتىڭ ءمان-جايىن تۇگەل ءتۇسىندىرىپ، قانداي ەم-شارالارىنا جۇگىنۋ كەرەكتىگى جونىندە پايدالى كەڭەستەر بەرىپ، ۇلكەن قولداۋ كورسەتەدى. سوڭعى 5 جىل كولەمىندە پسيحولوگيالىق قولداۋ ورتالىعىمەن تىعىز بايلانىستا جۇمىس ىستەۋ قىزىمنىڭ ونكولوگيا دەرتىن جەڭۋىنە ۇلكەن ىقپال ەتتى. قازىر 9-سىنىپتى تامامداعان قىمبات مەديتسينا قىزمەتكەرى ماماندىعىنا وقۋعا تۇسۋگە دايىندالىپ ءجۇر. بولاشاقتا ءوزى سياقتى بالالارعا سىرقاتىنان ايىعۋعا كومەكتەسۋدى ارمان ەتەدى».

جالپى ۇزاقتىعى  5 ماۋسىمعا سوزىلادى  دەپ جوسپارلانعان جازعى لاگەرگە ءار اۋىسىمدا  20 كۇنگە 20 بالادان قابىلدانادى. اتاپ ءوتۋ كەرەك، ونكولوگيا دەرتىنە شالدىققان بالالارعا ارنالعان جازعى لاگەر تولىقتاي تەگىن تۇردە جۇمىس ىستەيدى.

“The Qazaq Times”