Astanada bes jwldızdı alğaşqı halıqaralıq premium-klastı «Ritc-Karlton»  qonaq üyi aşıldı. Qonaq üy Talan Towers köpfunkcionaldı keşeniniñ ğimaratında ornalasqan.

Nwrswltan Nazarbaev astanalıqtardı, investorlardı jäne qwrılısqa qatısqan barlıq azamattardı qonaq üydiñ aşıluımen qwttıqtadı.

Foto: akorda.kz

– «EKSPO-2017» halıqaralıq körmesi qarsañında elorda twrğındarına tağı bir sıylıq jasaldı. Bwl  –  älemdik deñgeydegi «Ritc-Karlton» qonaq üyi. Onıñ qwrılısına sapalı tehnologiyalar men standarttar qoldanılıp, qısqa merzim işinde boy köterdi. Bwl – qala infraqwrılımına salınğan zor investiciya, – dedi Memleket basşısı.

Qazaqstan Prezidenti Astananıñ joğarı deñgeyli qonaq üy keşenine ie bolğanın atap ötti.

– Qonaq üy qwrılısına Qazaqstannıñ kompaniyaları qatıstı. Jaña ğimaratta eñ joğarı deygeydegi is-şaralardı ötkizip, joğarı märtebeli meymandardı qabıldauğa qajetti barlıq infraqwrılım bar, – dedi Nwrswltan Nazarbaev.

Sonday-aq, Elbası Qwrmetti qonaqtar kitabına qoltañba qaldırdı.

Astananıñ sol jağalauındağı Talan Towers keşeniniñ jalpı alañı – 120 mıñ şarşı metr. Onda Talan Towers Offices, «Ritc-Karlton» qonaq üyi, SPA ortalığı, biznes ortalığı jäne «Emporium» sauda galereyası ornalasqan.

“The Qazaq Times”