Foto: 1-sk.ru

Bankter qwrılıs sektorındağı öziniñ poziciyasın älsiretip jatır. Sebebi kreditorlar qazirdiñ özinde merzimi ötken qarızdar köbeyip kete me dep qorqadı. Energyprom.kz agenttiginiñ mälimetine süyensek, osı jıldıñ naurız ayınıñ soñında qwrılısqa berilgen banktik kreditterdiñ kölemi 961,3 mlrd teñgeni qwradı. Bwl ötken jılğa qarağanda 3,8%-ğa tömen. Al soñğı üş jılda qwrılıs salasına berilgen qarız ülesi 34%-ğa qısqarğan.

Degenmen bank tarapınan kredit beru deñgeyi tömendegenmen, biıl qwrılıs qarqını joğarı bolıp otır. Mısalı 2017 jıldıñ 4 ayında Qazaqstanda 305 köppäterli üy paydalanuğa berilgen. Bwl ötken jılmen salıstarğanda 35%-ğa, ötken 5 jılğa qarağanda 53%-ğa joğarı.

Agenttiktiñ esepteuinşe, qwrılıs salasında bankterdiñ wzaqmerzimdi qarız portfeliniñ ülesi 2014-2015 jıldar aralığında birden 26%-ğa tömendegen. Odan keyingi jıldarda 5%-ğa azayğan.

Negizi qwrılıs kompaniyaların wzaqmerzimdi kreditteu tapşılığı qısqamerzimdi qarız kölemin ösiru arqılı rettelip otıratın, alayda soñğı eki jılda mwnday qarjı közderiniñ de ülesi azayıp ketken.

Sonday-aq, qwrılıs kompaniyalarınıñ tölem qabiletiniñ tömen bolu qauipi joğarı bolğandıqtan kreditorlar olarğa qızığuşılıq tanıtıp otırğan joq. Sebebi 2016 jıldıñ ekinşi jartısında qwrılıs kompaniyalarınıñ merzimi ötken qarızdarı köbeye bastağan. Al 2017 jıldıñ naurız ayında qwrılıs kompaniyalarına berilgen qarızdardıñ 12%-nıñ mezimi ötkeni anıqtalğan.

Energyprom.kz agenttiginiñ aytuınşa, eger bankter tarapınan kredit beru bwlay qısqara beretin bolsa "Nwrlı jer" twrğın üy bağdarlamasınıñ jüzege asırıluı biraz bäseñdeui mümkin. Ayta keteyik, bağdarlama ayasında aldağı 15 jılda 1,5 mln otbasığa twrğın üymen qamtamasız etilu kerek.

“The Qazaq Times”