بانكتەر قۇرىلىس كومپانيالارىنا كرەديت بەرۋدەن «قورقادى»

بانكتەر قۇرىلىس سەكتورىنداعى ءوزىنىڭ پوزيتسياسىن السىرەتىپ جاتىر. سەبەبى كرەديتورلار قازىردىڭ وزىندە مەرزىمى وتكەن قارىزدار كوبەيىپ كەتە مە دەپ قورقادى. ەnergyprom.kz اگەنتتىگىنىڭ مالىمەتىنە سۇيەنسەك، وسى جىلدىڭ ناۋرىز ايىنىڭ سوڭىندا قۇرىلىسقا بەرىلگەن بانكتىك كرەديتتەردىڭ كولەمى 961,3 ملرد تەڭگەنى قۇرادى. بۇل وتكەن جىلعا قاراعاندا 3,8%-عا تومەن. ال سوڭعى ءۇش جىلدا قۇرىلىس سالاسىنا بەرىلگەن قارىز ۇلەسى 34%-عا قىسقارعان.

دەگەنمەن بانك تاراپىنان كرەديت بەرۋ دەڭگەيى تومەندەگەنمەن، بيىل قۇرىلىس قارقىنى جوعارى بولىپ وتىر. مىسالى 2017 جىلدىڭ 4 ايىندا قازاقستاندا 305 كوپپاتەرلى ءۇي پايدالانۋعا بەرىلگەن. بۇل وتكەن جىلمەن سالىستارعاندا 35%-عا، وتكەن 5 جىلعا قاراعاندا 53%-عا جوعارى.

اگەنتتىكتىڭ ەسەپتەۋىنشە، قۇرىلىس سالاسىندا بانكتەردىڭ ۇزاقمەرزىمدى قارىز پورتفەلىنىڭ ۇلەسى 2014-2015 جىلدار ارالىعىندا بىردەن 26%-عا تومەندەگەن. ودان كەيىنگى جىلداردا 5%-عا ازايعان.

نەگىزى قۇرىلىس كومپانيالارىن ۇزاقمەرزىمدى كرەديتتەۋ تاپشىلىعى قىسقامەرزىمدى قارىز كولەمىن ءوسىرۋ ارقىلى رەتتەلىپ وتىراتىن، الايدا سوڭعى ەكى جىلدا مۇنداي قارجى كوزدەرىنىڭ دە ۇلەسى ازايىپ كەتكەن.

سونداي-اق، قۇرىلىس كومپانيالارىنىڭ تولەم قابىلەتىنىڭ تومەن بولۋ قاۋىپى جوعارى بولعاندىقتان كرەديتورلار ولارعا قىزىعۋشىلىق تانىتىپ وتىرعان جوق. سەبەبى 2016 جىلدىڭ ەكىنشى جارتىسىندا قۇرىلىس كومپانيالارىنىڭ مەرزىمى وتكەن قارىزدارى كوبەيە باستاعان. ال 2017 جىلدىڭ ناۋرىز ايىندا قۇرىلىس كومپانيالارىنا بەرىلگەن قارىزداردىڭ 12%-نىڭ مەزىمى وتكەنى انىقتالعان.

ەnergyprom.kz اگەنتتىگىنىڭ ايتۋىنشا، ەگەر بانكتەر تاراپىنان كرەديت بەرۋ بۇلاي قىسقارا بەرەتىن بولسا "نۇرلى جەر" تۇرعىن ءۇي باعدارلاماسىنىڭ جۇزەگە اسىرىلۋى ءبىراز باسەڭدەۋى مۇمكىن. ايتا كەتەيىك، باعدارلاما اياسىندا الداعى 15 جىلدا 1,5 ملن وتباسىعا تۇرعىن ۇيمەن قامتاماسىز ەتىلۋ كەرەك.

“The Qazaq Times”