Foto: d-p.by

Qıtaydıñ «Klassik-2» kompaniyası Qazaqstan aumağına  37 jük avtokölik qwralımen jasandı qwjattar arqılı halıq twtınatın tauarlardı zañsız äkelgen. Bwl jağday  2015 jılğı 1-28 tamız aralığında bolğan dep habarlaydı Memlekettik kirister komiteti.

Komitettiñ mälimetinşe, keden odağınıñ kedendik şekarası arqılı zañsız ötkizilgen tauarlardıñ jalpı soması 1 mlrd 126 mln 578 mıñ teñgeni qwrağan, onıñ işinde deklaraciyalarda körsetilmegen tauarlardıñ soması - 304 mln 996 mıñ 192 teñge.

"03.05.2017 j. Qazaqstan Respublikası Joğarı sotınıñ qılmıstıq ister boyınşa qadağalau sot alqasınıñ şeşimimen «KLASSIK-2» kompaniyasınıñ ökili Barhudarov N.R. QR QQ 234-babınıñ 1, 4 jäne 5-t. 2-böligi (ekonomikalıq kontrabanda), 385-babınıñ 2 jäne 3-bölikteri boyınşa kinäli dep tanıldı, QQ 58-babınıñ 2-böliginiñ negizinde oğan  kontrabandalıq tauardı tärkiley otırıp, 3 000 AEK köleminde ayıppwl türinde jazalau tüpkilikti türde tağayındaldı", - delingen komitettiñ baspasöz mälimdemesinde.

Sonday-aq, vedomstvonıñ aqparatınşa, «Klassik-2» kompaniyasınıñ ökilderi barlıq tauarğa QHR-dıñ jasandı eksporttıq deklaraciyasın, invoystardı jäne tauar-köliktik jükqwjattardı jasap olardı qıtaylıq kompaniya möriniñ bederlerimen zañsız türde bekitken.  Körsetilgen jasandı kommerciyalıq jäne köliktik qwjattardı «Klassik-2» kompaniyasınıñ ökilderi keden organdarına wsınğan jäne tauardıñ atauı, salmağı, sanı jäne qwnı turalı jalğan mälimetter körsetilgen kedendik deklaraciyalardı mälimdegen.

Olar «Dostıq» kedeni arqılı kirgen, onda «Klassik-2» kompaniyasınıñ ökilderi kedendik tranzit räsimi boyınşa joğarıda atalğan avtokölikterden tauarlardı 15 temirjol vagonına qayta tiegen, bwl rette, tauarlardıñ bir böligi kedendik baj ben salıqtı tölemesten  Qazaqstannıñ aumağında qalğan.

"Memlekettik kirister komitetiniñ qızmetkerleri Aqtau qalasında 15 vagondağı kontrabandalıq tauardı wstadı. Jürgizilgen tekseru  is jüzinde anıqtalğan tauarlardıñ kedendik deklaraciyada körsetilgen tauarlarğa tolıqtay säykes kelmeytinin körsetti", - deydi komiteti ökilderi.

Mäselen, köp mölşerde deklaraciyalanbağan jäne dwrıs emes deklaraciyalanğan tauarlar tabıldı, sonday-aq älemdik brendterdiñ kontrafaktili tauarları anıqtaldı.

“The Qazaq Times”