قىتايدىڭ «Klassik-2» كومپانياسى قازاقستان اۋماعىنا  37 جۇك اۆتوكولىك قۇرالىمەن جاساندى قۇجاتتار ارقىلى حالىق تۇتىناتىن تاۋارلاردى زاڭسىز اكەلگەن. بۇل جاعداي  2015 جىلعى 1-28 تامىز ارالىعىندا بولعان دەپ حابارلايدى مەملەكەتتىك كىرىستەر كوميتەتى.

كوميتەتتىڭ مالىمەتىنشە، كەدەن وداعىنىڭ كەدەندىك شەكاراسى ارقىلى زاڭسىز وتكىزىلگەن تاۋارلاردىڭ جالپى سوماسى 1 ملرد 126 ملن 578 مىڭ تەڭگەنى قۇراعان، ونىڭ ىشىندە دەكلاراتسيالاردا كورسەتىلمەگەن تاۋارلاردىڭ سوماسى - 304 ملن 996 مىڭ 192 تەڭگە.

"03.05.2017 ج. قازاقستان رەسپۋبليكاسى جوعارى سوتىنىڭ قىلمىستىق ىستەر بويىنشا قاداعالاۋ سوت القاسىنىڭ شەشىمىمەن «KLASSIK-2» كومپانياسىنىڭ وكىلى بارحۋداروۆ ن.ر. قر قق 234-بابىنىڭ 1, 4 جانە 5-ت. 2-بولىگى (ەكونوميكالىق كونتراباندا), 385-بابىنىڭ 2 جانە 3-بولىكتەرى بويىنشا كىنالى دەپ تانىلدى، قق 58-بابىنىڭ 2-بولىگىنىڭ نەگىزىندە وعان  كونتراباندالىق تاۋاردى تاركىلەي وتىرىپ، 3 000 اەك كولەمىندە ايىپپۇل تۇرىندە جازالاۋ تۇپكىلىكتى تۇردە تاعايىندالدى", - دەلىنگەن كوميتەتتىڭ ءباسپاسوز مالىمدەمەسىندە.

سونداي-اق، ۆەدومستۆونىڭ اقپاراتىنشا، «كلاسسيك-2» كومپانياسىنىڭ وكىلدەرى بارلىق تاۋارعا قحر-دىڭ جاساندى ەكسپورتتىق دەكلاراتسياسىن، ينۆويستاردى جانە تاۋار-كولىكتىك جۇكقۇجاتتاردى جاساپ ولاردى قىتايلىق كومپانيا ءمورىنىڭ بەدەرلەرىمەن زاڭسىز تۇردە بەكىتكەن.  كورسەتىلگەن جاساندى كوممەرتسيالىق جانە كولىكتىك قۇجاتتاردى «كلاسسيك-2» كومپانياسىنىڭ وكىلدەرى كەدەن ورگاندارىنا ۇسىنعان جانە تاۋاردىڭ اتاۋى، سالماعى، سانى جانە قۇنى تۋرالى جالعان مالىمەتتەر كورسەتىلگەن كەدەندىك دەكلاراتسيالاردى مالىمدەگەن.

ولار «دوستىق» كەدەنى ارقىلى كىرگەن، وندا «كلاسسيك-2» كومپانياسىنىڭ وكىلدەرى كەدەندىك ترانزيت ءراسىمى بويىنشا جوعارىدا اتالعان اۆتوكولىكتەردەن تاۋارلاردى 15 تەمىرجول ۆاگونىنا قايتا تيەگەن، بۇل رەتتە، تاۋارلاردىڭ ءبىر بولىگى كەدەندىك باج بەن سالىقتى تولەمەستەن  قازاقستاننىڭ اۋماعىندا قالعان.

"مەملەكەتتىك كىرىستەر كوميتەتىنىڭ قىزمەتكەرلەرى اقتاۋ قالاسىندا 15 ۆاگونداعى كونتراباندالىق تاۋاردى ۇستادى. جۇرگىزىلگەن تەكسەرۋ  ىس جۇزىندە انىقتالعان تاۋارلاردىڭ كەدەندىك دەكلاراتسيادا كورسەتىلگەن تاۋارلارعا تولىقتاي سايكەس كەلمەيتىنىن كورسەتتى", - دەيدى كوميتەتى وكىلدەرى.

ماسەلەن، كوپ مولشەردە دەكلاراتسيالانباعان جانە دۇرىس ەمەس دەكلاراتسيالانعان تاۋارلار تابىلدى، سونداي-اق الەمدىك برەندتەردىڭ كونترافاكتىلى تاۋارلارى انىقتالدى.

“The Qazaq Times”