Aqınnıñ jañadan şıqqan jır jinağı. Foto: Foto: QT

Abaydan bastau alğan jaña däuir qazaq poeziyasınıñ şoqtığı biik dara şıñdarı qazaq dalasınıñ är twsında qadau-qadau boy körsetip twr. Sonıñ biri – qazaq öleñ önerine tıñnan türen salıp, öz qoltañbasın qaldırğan Omarğazı Aytan. Qazaq ädebietiniñ klassigi, aqın, jazuşı, dramaturg Omarğazı Aytannıñ düniege kelgenine 85 jıl toluına oray, «Er Jänibek» halıqaralıq qoğamdıq qorınıñ janınan aqınnıñ "Qwstar qayğısı" attı jır jinağı jarıq kördi.  Kitaptıñ şığuına «Kelun-Kazpharm» JŞS-nıñ da qoldau körsetkenin ayta keteyik.

«Er Jänibek» halıqaralıq qoğamdıq qorı men  Almatı qalasındağı QR Wlttıq kitaphanası birlesip, atalğan kitaptıñ twsaukeser räsimin ötkizedi. Şara 26 mamır, jwma küni 15:00 de Wlttıq kitaphananıñ «Körmeler zalında» ötedi.

Kitapta aqınıñ är jıldarı jazılğan oyı tereñ, boyauı kelisti, sarını özgeşe öleñderi men asau, aytarı salmaqtı, qwlaşı asa keñ dastandarı toptastırılğan. Qazaq öleñiniñ keñistigin tañğajayıp talantımen keñeyte bilgen tarlan aqınnıñ tuındıları talğampaz häm oylı oqırmandarğa arnaladı

Omarğazı Aytanwlı 1931 jılı 20 qaraşada, Şınjañnıñ Tarbağatay aymağı, Tolı audanınıñ Maylı tauında düniege kelgen. 1957 jılı Şınjañ universitetiniñ ädebiet fakul'tetin bitirgen. 1957-1959 jıldar aralığında «Şwğıla» ädebi jurnalında redaktorlıq qızmet atqarğan. Omarğazı Aytan Qıtayda jürilgen «Mädeniet töñkerisi» nauqanında äsire qızıl sayasattıñ saldarınan 1959 jıldan 1978 jılğa deyin jer audarılıp, auır eñbek maydanında qatañ baqılauda bolğan. 1978 jılğı Qıtay sayasatınıñ oñala bastauına oray, aqınnıñ da naqaq jalalı ömiri aqtalıp, sayasi qwqığı men qoğamdıq qızmeti qalpına keltirildi.

Artına «Qws jol», «Tüye», «Säukele» qatarlı jır jinaqtarımen birge, «Añ şadırın oq tabar», «Tarazı» romandarı jäne köptegen dramalıq şığarmalar qaldırğan wlı qalamger 1997 jılı 26 mamırda Ürimji qalasında qaytıs boldı.

"The Qazaq Times"