الماتىدا ومارعازى ايتاننىڭ جىر جيناعىنىڭ تۇساۋكەسەرى وتەدى

ابايدان باستاۋ العان جاڭا ءداۋىر قازاق پوەزياسىنىڭ شوقتىعى بيىك دارا شىڭدارى قازاق دالاسىنىڭ ءار تۇسىندا قاداۋ-قاداۋ بوي كورسەتىپ تۇر. سونىڭ ءبىرى – قازاق ولەڭ ونەرىنە تىڭنان تۇرەن سالىپ، ءوز قولتاڭباسىن قالدىرعان ومارعازى ايتان. قازاق ادەبيەتىنىڭ كلاسسيگى، اقىن، جازۋشى، دراماتۋرگ ومارعازى ايتاننىڭ دۇنيەگە كەلگەنىنە 85 جىل تولۋىنا وراي، «ەر جانىبەك» حالىقارالىق قوعامدىق قورىنىڭ جانىنان اقىننىڭ "قۇستار قايعىسى" اتتى جىر جيناعى جارىق كوردى.  كىتاپتىڭ شىعۋىنا «Kelun-Kazpharm» جشس-نىڭ دا قولداۋ كورسەتكەنىن ايتا كەتەيىك.

«ەر جانىبەك» حالىقارالىق قوعامدىق قورى مەن  الماتى قالاسىنداعى قر ۇلتتىق كىتاپحاناسى بىرلەسىپ، اتالعان كىتاپتىڭ تۇساۋكەسەر ءراسىمىن وتكىزەدى. شارا 26 مامىر، جۇما كۇنى 15:00 دە ۇلتتىق كىتاپحانانىڭ «كورمەلەر زالىندا» وتەدى.

كىتاپتا اقىنىڭ ءار جىلدارى جازىلعان ويى تەرەڭ، بوياۋى كەلىستى، سارىنى وزگەشە ولەڭدەرى مەن اساۋ، ايتارى سالماقتى، قۇلاشى اسا كەڭ داستاندارى توپتاستىرىلعان. قازاق ولەڭىنىڭ كەڭىستىگىن تاڭعاجايىپ تالانتىمەن كەڭەيتە بىلگەن تارلان اقىننىڭ تۋىندىلارى تالعامپاز ءھام ويلى وقىرماندارعا ارنالادى

ومارعازى ايتانۇلى 1931 جىلى 20 قاراشادا، شىنجاڭنىڭ تارباعاتاي ايماعى، تولى اۋدانىنىڭ مايلى تاۋىندا دۇنيەگە كەلگەن. 1957 جىلى شىنجاڭ ۋنيۆەرسيتەتىنىڭ ادەبيەت فاكۋلتەتىن بىتىرگەن. 1957-1959 جىلدار ارالىعىندا «شۇعىلا» ادەبي جۋرنالىندا رەداكتورلىق قىزمەت اتقارعان. ومارعازى ايتان قىتايدا جۇرىلگەن «مادەنيەت توڭكەرىسى» ناۋقانىندا اسىرە قىزىل ساياساتتىڭ سالدارىنان 1959 جىلدان 1978 جىلعا دەيىن جەر اۋدارىلىپ، اۋىر ەڭبەك مايدانىندا قاتاڭ باقىلاۋدا بولعان. 1978 جىلعى قىتاي ساياساتىنىڭ وڭالا باستاۋىنا وراي، اقىننىڭ دا ناقاق جالالى ءومىرى اقتالىپ، ساياسي قۇقىعى مەن قوعامدىق قىزمەتى قالپىنا كەلتىرىلدى.

ارتىنا «قۇس جول»، «تۇيە»، «ساۋكەلە» قاتارلى جىر جيناقتارىمەن بىرگە، «اڭ شادىرىن وق تابار»، «تارازى» روماندارى جانە كوپتەگەن درامالىق شىعارمالار قالدىرعان ۇلى قالامگەر 1997 جىلى 26 مامىردا ءۇرىمجى قالاسىندا قايتىس بولدى.

"The Qazaq Times"