اقش پرەزيدەنتتىگىنە ۇمىتكەرلەر – رەسپۋبليكالىق پارتيا وكىلى، 45-ءشى پرەزيدەنت دونالد ترامپ جانە دەموكرات دجوزەف بايدەن سەيسەنبىدە كليۆلەندتە (وگايو) ءبرىنشى رەت تەلەدەبات وتكىزەدى. كانديداتتار «Case Western Reserve University» اكت زالى ساحناسىندا بەتپە-بەت كەزدەسپەك. تەلەدەباتتاردىڭ ترانسلياتسياسىن بارلىق ءىرى تەلەكومپانيالار ءبىر جارىم ساعات بويى ءۇزىلىسسىز كورسەتەدى. ۇزاقتىعى 15 مينۋت بولاتىن سايىس التى سەگمەنتكە بولىنەدى، ءاربىر سەگمەنت «Fox News» كومپانياسىنىڭ جەتەكشى ءجۋرناليستى كريس ۋوللەستىڭ سۇراعىنان باستالادى.

جەكە قايىرىمدىلىق ارقىلى قارجىلاندىرىلاتىن تەلەدەبات تاقىرىپتارىن پارتيادان تىس كوميسسيا الدىن الا انىقتادى. تاراپتار پاندەميا كەزىندە داعدارىسقا ۇشىراعان ەكونوميكانىڭ پەرسپەكتيۆالارى; افروامەريكالىق دجوردج فلويدتىڭ ميننەاپوليستەگى ولىمىنەن كەيىن باستالعان ناسىلدىك ادىلەتسىزدىككە قارسى نارازىلىقتارعا قاتىستى سۇراقتارعا جاۋاپ بەرۋى ءتيىس. سونىمەن قاتار الداعى سايلاۋدىڭ اشىقتىعىن قامتاماسىز ەتۋ جانە اقش جوعارعى سوتىنىڭ جاڭا مۇشەسىن تاڭداۋ جاعدايى سياقتى تاقىرىپتار بويىنشا ءوز ۇستانىمدارىن كورسەتەدى.

نيۋ-يورك ۇكىمەتتىك ەمەس ۇيىمى – حالىقارالىق قاتىناستار جونىندەگى كەڭەس ءوز سايتىندا رەسەيگە قاتىستى ساياسات ماسەلەلەرى بويىنشا كانديداتتاردىڭ ۇستانىمدارىن كەلتىرەدى. بۇل جونىندە سۇحباتىندا قازىرگى پرەزيدەنت ترامپ «رەسەيدىڭ ارالاسۋىنا قارسى تۇرۋ ءۇشىن ارنايى شارالار قابىلداعانىن»، سونىڭ ىشىندە بىرقاتار سانكتسيالار ەنگىزىپ، ۋكرايناعا اسكەري كومەك كورسەتكەنىن، پرەزيدەنت باراك وبامانىڭ اكىمشىلىگى كەزىندە ەنگىزىلگەن قىرىمعا بايلانىستى سانكتسيالاردى ساقتاعانىن، 2018 جىلى رەسەي ديپلوماتتارىن قۋىپ شىعارعانىن، ورتا جانە قىسقا قاشىقتىقتاعى زىمىرانداردى جويۋ تۋرالى كەلىسىمنەن شىققانىن ايتتى.

دجو بايدەن «ناتو-نى نىعايتۋدىڭ جانە وداقتى شىعىس باعىتتا تاراتۋدىڭ كوپتەن بەرى جاقتاۋشىسى» ەكەنىن ايتقان. مۇنىمەن قاتار، گرۋزيا مەن ۋكراينانىڭ ناتو-عا كىرۋىن قولداپ، رەسەيدىڭ امەريكا دەموكراتياسىن بۇزۋ ارەكەتتەرىن تاۋەلسىز تەرگەۋگە ۋادە بەرگەن. بايدەن اقش پەن وداقتاستاردىڭ كيبەرقاۋىپسىزدىگىن كۇشەيتۋ ماسەلەسىنە دە توقتالدى.

ترامپتىڭ تەلەدەباتتارعا دايىندىعى ەكى اپتا بۇرىن باستالدى. قىركۇيەكتىڭ ورتاسىندا «Fox News» تەلەارناسىنا بەرگەن سۇحباتىندا ول كۇن سايىن دايىندالىپ جاتقانىن ايتتى.

سۇحبات بارىسىندا 74 جاستاعى ترامپ قوس ۇمىتكەر دە تەلەدەبات الدىندا «دوپينگ سىناعىنان» ءوتۋى كەرەك دەپ ازىلدەدى. بۇعان دەيىن ترامپ 77 جاستاعى بايدەن كارىلىگىنە بايلانىستى وزىمەن تەڭ دارەجەدە پىكىر تالاستىرا المايتىنىنا سەنىم بىلدىرگەن.

قوس ۇمىتكەر – قوس ستراتەگيا

رەسپۋبليكالىق پارتيانىڭ ستراتەگياسىن جاساۋشىلار ترامپتىڭ العاشقى تەلەدەباتتارداعى ەڭ ماڭىزدى ءترامپلينى ەكونوميكا دەپ سانايدى. سايلاۋ ناۋقانىنىڭ بارىسى تۋرالى اقپاراتتى ورنالاستىراتىن «Election Central» پورتالى اتاپ وتكەندەي، ترامپ «پاندەمياداعى داعدارىس سالدارىن سەزىنەتىن سايلاۋشىلارعا ونىڭ پرەزيدەنتتىگىنىڭ العاشقى ءۇش جىلىندا ەكونوميكانىڭ ءوسۋ قارقىنى قانشالىقتى جوعارى بولعانىن قايتا-قايتا ەسكە سالۋى كەرەك». اتالعان سايت ساراپشىلارىنىڭ بولجاۋىنشا، اق ءۇي باسشىسى سايىس كەزىندە بايدەننىڭ جارتى عاسىرعا جۋىق ساياسي مانسابى كەزىندە جىبەرگەن قاتەلىكتەرىنە نازار اۋدارادى. رەسپۋبليكالىق سايلاۋالدى شتابتىڭ قىزمەتكەرى برەتت و ' دوننەل تە «پرەزيدەنت ترامپ ءوزىن ايقىن كورسەتەتىن تاقىرىپ – ەكونوميكا سالاسى»، دەيدى.

ءوز كەزەگىندە بايدەن «سىن، ءاجۋا» ستراتەگياسىن تاڭدايدى. «ول ترامپتىڭ مازاعىنا جاۋاپ بەرىپ، جەڭىسكە جەتۋ ءۇشىن بارىن سالادى»، دەپ اتاپ ءوتتى «Election Central». سونىمەن قاتار بايدەن نەگىزگى تاقىرىپ رەتىندە ترامپ اكىمشىلىگىنىڭ كوروناۆيرۋس پاندەمياسىنا قارسى شارالارىن قاتاڭ سىنعا الماق.

تاعى ەكى راۋند

«The New York Times» گازەتى مەن سيەن كوللەدجىنىڭ زەرتتەۋ قىزمەتى 23-24 قىركۇيەك ارالىعىندا 950 سايلاۋشىمەن جۇرگىزىلگەن ۇلتتىق ساۋالناماسى بويىنشا بايدەندى رەسپوندەنتتەردىڭ 49%-ى، ال ترامپتى 41%-ىن قولداۋعا دايىن ەكەنىن ايتقان.

21-24 قىركۇيەكتە «ABC» جانە «The Washington Post» گازەتىنىڭ 1008 ىقتيمال سايلاۋشىلار اراسىندا جۇرگىزگەن ساۋالناماسىنىڭ ناتيجەلەرى بويىنشا رەسپوندەنتتەردىڭ 54%-ى بايدەنگە، 44%-ى ترامپقا قولداۋ بىلدىرگەن.

ترامپ پەن بايدەننىڭ ەكىنشى تەلەدەباتى 15 قازاندا ماياميدە (فلوريدا) ۇيىمداستىرىلماق. كەزەكتى دەباتتىڭ ەرەكشەلىگى – قاتىسۋشىلارعا شتات تۇرعىندارى سۇراقتار قويادى.

پرەزيدەنتتىككە ۇمىكتەرلەرمەن قاتار، ۆيتسە-پرەزيدەنت لاۋازىمىنا تالاساتىن مايكل پەنس پەن كامالا ءحارريستىڭ تەلەدەباتى 7 قازاندا يۋتا شتاتىندا وتەدى. ولار 9 سەگمەنتتەن تۇراتىن سۇراقتارعا 10 مينۋتتان جاۋاپناقتى دالەلدەرمەن جاۋاپ بەرۋى ءتيىس. دەباتتىڭ باسىندا جۇرگىزۋشى سۇراق قويادى.

اقش-تاعى كەزەكتى جالپى سايلاۋ 3 قاراشادا وتەدى. سايلاۋدا حالىق پرەزيدەنت پەن ۆيتسە-پرەزيدەنتتى، وكىلدەر پالاتاسىنىڭ بارلىق 435 مۇشەسىن، امەريكا قۇراما شتاتتارىنىڭ كونگرەسس سەناتىنىڭ ۇشتەن ءبىرىن، 13 شتات پەن اۋماقتىڭ گۋبەرناتورلارىن سايلايدى.

"The Qazaq Times"