بۇگىن، 16 قىركۇيەك، ەۋرازيا جانە قازاقستان جازۋشىلار وداعىنىڭ مۇشەسى، اقىن-سازگەر، اكادەميك-دارىگەر تولقىن اقانۇلىنىڭ «قاراعايباستاۋىم» اتتى جىر جيناعىنىڭ ونلايىن تۇساۋكەسەر-تانىستىرىلىمى ءوتتى.

بۇعان دەيىن استاناداعى جازۋشىلار ۇيىندە تۇساۋى كەسىلىپ، وقىرمانعا جول تارتقان جىر جيناقتىڭ كەزەكتى ونلاين تۇساۋكەسەرىن الماتىداعى جامبىل اتىنداعى قالالىق جاسوسپىرىمدەر كىتاپحاناسى مەن «ەر جانىبەك» حالىقارالىق قورىنىڭ ۇيىمداستىرعان.

ونلاين شاراعا قاتىسقان قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى، اقىن اقبەرەن ەلكەزەك، ەتنوگراف، جازۋشى بولات بوپايۇلى، قازاقستاننىڭ مادەنيەت قايراتكەرى قايرات قۇلمۇحاممەد، اقىن، مۇرات شايماران، جازۋشىلار وداعىنىڭ ەلورداداعى فيليالىنىڭ توراعاسى، اقىن داۋلەتكەرەي كاپۇلى قاتارلى اقىن، قالامگەرلەر، ونەر مەن ومىردەگى قالامداس جولداستارى اۆتوردىڭ ولەڭى مەن ومىردەگى قىرلارى تۋرالى ەستەلىكتەر ايتىپ، جاڭا كىتاپقا ءسات ساپار تىلەدى.

ونلاين كونفەرەنتسيا.

سونداي-اق، ونلاين فورماتتاعى كونفەرەنتسياعا جامبىل اتىنداعى كىتاپحانانىڭ مەڭگەرۋشىسى عازيزا نۇرعاليەۆا حانىم جانە وزگە دە جىر سۇيەر وقىرماندار قاتىستى. شارا بارىسىندا تولقىن اقانۇلىنىڭ ادەبيەت پەن ونەردەن تىس مەديتسينا سالاسىنداعى بىلگىر ماماندىعى مەن حالقىنا قايىرىمدى مەتسەنات ەكەنى دە تىلگە تيەك بولدى.  شارا سوڭىندا اۆتور تولقىن اقانۇلى قاتىسۋشىلارعا العىسىن ءبىلدىرىپ، جىر جيناعىنان ولەڭ كادەسىن ۇسىندى.

اۆتور تۋرالى:

تولقىن اقانۇلى 1968 جىلى مامىردا تارباعاتايدىڭ مايلى-جايىر وڭىرىندە تۋعان. قىتاي حالىق رەسپۋبليكاسىندا 20 جىلدان استام ۋاقىت مەديتسينا سالاسىندا قىزمەت ەتىپ، اتالعان سالانىڭ باسشىلىق قىزمەتىندە دە  مىندەت اتقارعان. اتاجۇرتقا ورالعاننان كەيىن دە وتاندىق مەديتسينا سالاسىنىڭ دامۋىنا ازاماتتىق ۇلەسىن قوسقان. 2009 جىلدان باستاپ ەلورداداعى «باقكەلدى–2012» جشس-نىڭ ديرەكتورى جانە باس دارىگەرى بولىپ قىزمەت ەتىپ كەلەدى. «قازاقستاننىڭ ۇلتتىق اگروونەركاسىپ پالاتاسىنىڭ» قوعاممەن بايلانىس جونىندەگى ۆيتسە-پرەزيدەنتى، «ەر جانىبەك» حالىقارالىق قوعامدىق قورىنىڭ ۆيتسە-پرەزيدەنتى.

 

“The Qazaq Times”