ءۇندىستان-قىتاي باسشىلارى ەكى ەل اراسىنداعى داۋ-دامايعا نۇكتە قويماق

ۇندىستاندىق باق-تىڭ حابارىنا قاراعاندا، ەلدىڭ پرەمەر-ءمينيسترى نارەندرا مودي قىتاي باسشىسى شي جينپيڭمەن (سي تسزينپين/Xi Jinping) كەزدەسپەك. كەزدەسۋدە كورشى ەكى ەل اراسىنداعى داۋ-دامايدى شەشۋ جولدارى قاراستىرىپ، ءۇندىستان-قىتاي قارىم-قاتىناسىن رەتكە سالماق. بۇل تۋرالى «The India Today» باسىلىمى حابارلادى.

وتكەن اپتانىڭ سوڭىندا، جۇما جانە جەكسەنبى كۇندەرى ءۇندىستان مەن قىتاي سىرتقى ىستەر مينيسترلىكتەرى كەزەگىمەن مالىمدەمە جاساپ، مودي مەن شي جينپيڭ قىتايدىڭ ۋحان قالاسىندا كەزدەسەتىنى تۋرالى حابارلادى.

قىتاي ءسىم باسشىسى ۋاڭ ي ءۇندىستان سىرتقى ىستەر ءمينيسترى سۋاراگپەن كەزدەسكەننەن كەيىن جۋرناليستەرگە جاساعان مالىمدەمەسىندە: «ءبىزدىڭ ورتاق مۇددەلەرىمىز، ورتاداعى قايشىلىقتاردان كوپ. ەكى ەلدە ۇزاق ۋاقىتتىق تىعىز دوستىق قارىم قاتىناس، ءوزارا ءتيىمدى ارىپتەستىك پەن ورتاق دامۋ بايلانىسىن ۇستانۋدان باسقا تاڭداۋى جوق»، – دەدى.

قىتاي ءسىم باسشىسى ەكى ەل باسشىلارىنىڭ كەزدەسۋى تۋرالى پىكىرىندە: «بۇل كەزدەسۋ ەكى ءىرى ەل اراسىنداعى قارىم-قاتىناستى تەرەڭدەتە تۇسەدى. ءبىز بۇل بەيرەسمي كەزدەسۋدىڭ تابىستى وتەتىندىگىنە كەپىلدىك بەرەمىز. بۇل قىتاي-ءۇندىستان قاتىناسىنىڭ جاڭا كەزەڭىن باستايدى»، – دەگەن.

ەستەرىڭىزدە بولسا، بىلتىر ماۋسىم ايىنان باستاپ، دوڭلاڭ ۇستىرتىندە قىتاي-ءۇندىستان اراسىندا شەكارالىق يەلىك قۇقىق داۋى تۋىلىپ، قايشىلىق پەن تەكە-تىرەس جاعدايى 73 كۇنگە جالعاسقان ەدى. بۇل جانە ءۇندى-قىتاي اراسىندا العاش رەت بولعان جاعداي ەمەس. ەكى ەل دە گيمالاي تاۋىنداعى يەلىك قۇقىق ماسەلەسىندە ورتاق شەشىمگە كەلە الماعان. ءتىپتى قايشىلىق سوڭى قارۋلى-قاقتىعىسقا ۇلاسا جازداعان بولاتىن.

قازىر اقش پەن قىتاي قارىم-قاتىناسى سالقىنداپ، ءۇندىستان-اقش بايلانىسى بارعان سايىن دامي ءتۇستى. وڭتۇستىك قىتاي تەڭىزى ماسەلەسىندە دە قىتاي ءوز كورشىلەرىمەن شەكارالىق داۋدى شەشە الماي كەلەدى. وسى تۇستا ازيانىڭ تاعى ءبىر الىبى ۇندىستانمەن بولعان تارتىس قىتايدى ايماقتان وقشاۋلانعان بەينەدە كورسەتىپ تاستادى. بۇنى ەرتەرەك شەشۋ ءۇندىستاننان كورى قىتاي ءۇشىن كوبىرەك كەرەك دەۋگە بولادى.

“The Qazaq Times”