قىرعىزستان اۋماعىندا Kloop باسىلىمىنىڭ قىرعىز تىلىندەگى ky.kloop.asia سايتى اشىلماي قالدى. بۇل تۋرالى ورتالىق ازيا جاڭالىقتار قىزمەتى جازدى.

رەداكتسيانىڭ حابارلاۋىنشا، سايت قىرعىزستان مادەنيەت، اقپارات، سپورت جانە جاستار ساياساتى مينيسترلىگىنىڭ شەشىمىمەن بۇعاتتالعان. باسىلىم وعان دالەل رەتىندە 1 قاراشادا مينيسترلىكتەن العان حاتتىڭ كوشىرمەسىن جاريالادى. وندا مينيسترلىك 30 قازاندا قىرعىزستان ۇلتتىق قاۋىپسىزدىگى جونىندەگى مەملەكەتتىك كوميتەتىنەن حات كەلگەنىن جازعان.

«Kloop.kg سايتى «ساياساتكەر راۆشان جەەنبەكوۆ تەرگەۋ يزولياتورىندا ازاپتالعانىن مالىمدەدى» دەپ اتالاتىن ماقالا ءۇشىن بۇعاتتالدى» دەپ حابارلادى مادەنيەت مينيسترلىگى.

قىرعىزستان مەملەكەتتىك ورگاندارى وسى ماسەلەگە قاتىستى ازىرگە رەسمي مالىمدەمە تاراتقان جوق.

قىركۇيەكتە قىرعىز ينتەرنەت-پروۆايدەرلەر Kloop.kg باسىلىمىنىڭ ورىس تىلىندەگى سايتىن بۇعاتتاعان. ال بۇنىڭ الدىندا، تامىزدىڭ اياعىندا بىشكەك پروكۋراتۋراسى سوتقا «كلوپپ مەديا» قوعامدىق قورىن جويۋ تۋرالى ارىز تۇسىرگەن. رەداكتسيا پروكۋراتۋرا ارەكەتىن «قىرعىزستاندا ءسوز ەركىندىگىنە جاسالعان قىسىم» دەپ باعالاعان.

حالىقارالىق ۇيىمدار، سونىمەن بىرگە قىرعىزستانداعى مەدياقاۋىمداستىق تاۋەلسىز باسىلىمعا قارسى ارىزدى قايتارىپ الۋدى تالاپ ەتكەن.

قازاقستاندا تاۋەلسىز Kloop.kg سايتى 2014 جىلى بۇعاتتالعان. سايت رەداكتسياسى قازاق بيلىگىنىڭ ماتەريالدى الىپ تاستاۋ جونىندەگى تالابىن ورىنداۋدان باس تارتقان.