قازاقستاندا كيبەرشابۋىلعا ىلىككەن اقپارات قۇرالدارى قۇقىق قورعاۋ ورگاندارىنا ارىز ءتۇسىردى. ۇجىمدىق ارىزعا Kursiv.Media, Inbusiness.kz, ProTenge, Shishkin_like, AIRAN جانە "وبوجايۋ" جوباسىنىڭ جۋرناليستەرى قول قويعان. بۇل تۋرالى ورتالىق ازيا جاڭالىقتار قىزمەتى جازدى.

باس رەداكتورلار مەن جۋرناليستەر ارىزدى تسيفرلىق دامۋ جانە اقپارات مينيسترلىگى مەن حالىقارالىق قۇقىق قورعاۋ ۇيىمدارىنا دا جىبەرەتىنىن مالىمدەدى.

اقپاراتقا قاراعاندا، 17 قاڭتاردا الماتىدا Kursiv.Media كەڭسەسىندە حاكەرلىك شابۋىلعا ۇشىراعان باق وكىلدەرى كەزدەسۋ وتكىزگەن.

"بۇل ءبىز ءۇشىن قازاقستاندىق اقپارات قۇرالدارىنىڭ بىرلىگىن كورسەتۋگە تۇرتكى بولاتىن جايت. ءارتۇرلى رەداكتسيا وكىلدەرى العاش رەت باس قوسىپ، بىرىگىپ ارىز تاپسىرىپ وتىر. ءبىزدىڭ قاتارىمىز كوبەيىپ جاتىر، جالعىز ارەكەت ەتپەۋىمىز كەرەك" دەدى Kursiv.Media باس رەداكتورى ميرا حالينا.

قازاقستاندا كەيىنگى ءبىر ايدا بيلىكتى سىنايتىن مەديا جوبالار مەن بلوگەرلەردىڭ الەۋمەتتىك جەلىدەگى پاراقتارى، سايتتارى كيبەرشابۋىلعا ءجيى ۇشىراپ ءجۇر.

وتكەن اپتادا "وبوجايۋ" جوباسىنىڭ اۆتورى، جۋرناليست اسحات نيازوۆ ءوزى مەن تۋىستارى جانە ارىپتەسىنىڭ WhatsApp اككاۋنتتارى بۇزىلعانىن حابارلاعان.ونىڭ الدىندا ءجۋرناليستىڭ Instagram-داعى پاراقشاسى مەن Telegram-داعى ارناسىنا شابۋىل جاسالىپ، YouTube-ارناسىنداعى ۆيدەولارعا ءتۇرلى اككاۋنتتان "قوقان-لوقى سيپاتىنداعى" مىڭداعان پىكىر كەلگەنىن حابارلاعان. ايتۋىنشا، جارناما بەرۋشىلەر دە كەلىسىمدى توقتاتقان.

ەلدەگى جەمقورلىقتى اشكەرەلەپ جۇرگەن ProTenge سايتى دا Instagram پاراقشاسىنا شابۋىل جاسالعانىن حابارلاعان. بۇعان دەيىن قازتاگ سايتى دا ينتەرنەت-رەسۋرسقا Ddos-شابۋىل ۇدەگەنىن مالىمدەگەن.

Kursiv.Media, Inbusiness.kz, Shishkin_like, AIRAN جوبالارى دا جوعارىدا ايتىلعاندارعا ۇقساس جايتتاردى باستان كەشىرگەن. "پروستو جۋرناليستيكا" YouTube-ارناسىنىڭ اۆتورى، تاۋەلسىز جۋرناليست لۇقپان احمەدياروۆ تا اككاۋنتىنىڭ بۇزىلعانىنا شاعىمدانعان. ساياسي تۇتقىنداردى قولداۋعا باعىتتالعان "ەركىندىك مارافونى" الدىندا بەلگىسىز بىرەۋلەر ونىڭ Kolesa.kz سايتىنداعى اككاۋنتىن بۇزىپ كىرىپ، كولىك ساتاتىنى جونىندە حابارلاندىرۋ جاريالاعان. ءجۋرناليستىڭ تەلەفون ءنومىرىن دە كورسەتىپ قويعان. وسىدان كەيىن ءجۋرناليستىڭ تەلەفونىنا ۇزدىكسىز قوڭىراۋلار كەلىپ تۇسكەن.

ء“ادىل ءسوز” ۇيىمىنىڭ 15 جەلتوقسانداعى ەسەبىنشە، بىلتىر ەلدە ءتۇرلى باق پەن جۋرناليستەرگە 31 رەت كيبەرشابۋىل جاسالعان. ۇيىم وكىلى مۇنى ء“سوز ەركىندىگىن شەكتەۋ”، “جۋرناليستەردى قورقىتۋ” دەپ اتادى.

قازاقستان كونستيتۋتسياسىندا تسەنزۋراعا جول جوق ەكەنى انىق جازىلسا دا بيلىكتى سىنايتىن ساياسي بۇقارالىق اقپارات قۇرالدارى ءجيى بۇعاتتالىپ، كيبەر شابۋىلدارعا ۇشىرايدى. Freedom House حالىقارالىق ۇيىمى ءوز ەسەبىندە قازاقستاندى ۇزاق جىلدان بەرى ينتەرنەتى ەركىن ەمەس مەملەكەتتەر قاتارىنا قوسىپ ءجۇر.