24 ماۋسىم تاڭدا ماسكەۋگە قاراي جورىق جاساعان ەۆگەني پريگوجين شامامەن 200 شاقىرىم قالعاندا بەلارۋس پرەزيدەنتى الەكساندر لۋكاشەنكونىڭ ارا اعايىندىعىمەن كەلسىمگە كەلىپ كەرى قايتقانى حابارلاندى.

ءبىراز ۋاقىتتان بەرى رەسەي قورعانىس مينيسترلىگىن ايىپتاپ كەلە جاتقان «ۆاگنەر» جەكەمەنشىك اسكەري كومپانياسىنىڭ جەتەشىسى ەۆگەني پريگوجين 24 ماۋسىم تاڭ بوزىندا قارۋلى قارسىلىققا شاقىرىپ قاراماعىنداعى اسكەرىن ماسكەۋگە قاراي باعىتتادى.

رەسەي فەدەرالدىق قاۋىپسىزدىك قىزمەتى قارۋلى بۇلىككە شاقىرقىردى دەپ ايىپتاعان «ۆاگنەر» پريگوجيننىڭ ۇستىنەن قىلمىستىق ءىس قوزعادى. دەمەن بۇل ايىپپەن الدا-جالدا پريگوجين قولدارىنا تۇسە قالسا 20 جىلعا دەيىن قاماۋ جازاسىن كۇتىپ تۇر دەگەن ءسوز.بۇل جونىندە رەسەي باس پروكۋراتۋراسى حابارلادى.

23 ماۋسىم جۇمادا ەۆگەني پريگوجين رەسەي قورعانىس مينيسترلىگى «ۆاگنەر» جاۋىنگەرلەرىن ارتيللەريا مەن اسكەري تىكۇشاق كومەگىمەن اتقىلاپ جاتىر دەپ ايىپتاعان. ونىڭ ايتۋىنشا، وسىنىڭ كەسىرىنەن ونىڭ اسكەريلەرى قازا تاپقان.

كەشكە قاراي پريگوجيننىڭ تەلەگرام-ارناسىندا «ەلدىڭ اسكەري باسشىلىعىنا قارسى» بۇلىك باستاپ، «ادىلدىك ورناتاتىنىن» مالىمدەدى. ول جۇرتتى «قارسىلىق بىلدىرمەي بەرىلۋگە» شاقىرعان جانە قاراماعىندا 25 مىڭ سارباز بار ەكەنىن ەسكەرتكەن بولاتىن.

وسىعان بايلانىستى ۆۆس-ءدىڭ حابارلاۋىندا ماسكەۋدە فسب باسقارماسى مەن اسكەريلەر دابىل بويىنشا جۇمىلدىرىلعانى، ماسكەۋ مەن روستوۆ اراسىنداعى فەدەرالدىق تراسساعا بلوكپوستتار قويىلىپ ماسكەۋدەگى مەملەكەتتىك مەكەمەلەردىڭ ماڭىنا كۇزەت قويىلعانى تۋرالى ايتىلدى.

بۇل وقيعا تۋرالى كەي ساراپشىلار رەسەيدە «ازامات سوعىسى باستالدى» دەگەن پىكىر ايتتى.

ارادا كوپ وتپەي «ۆاگنەر» تىبىنىڭ راستوۆ قالاسىن باسىپ العانى تۋرالى حابار تارادى.

روستوۆتاعى 161.ru سايتى وقىرمانداردان كەلىپ تۇسكەن سۋرەت پەن ۆيدەولارعا سۇيەنە وتىرىپ، كامۋفلياج كيگەن بەلگىسىز توپ  – وڭتۇستىك اسكەري وكرۋگ شتابى; بۋدەننوۆ پوليتسيا بولىمشەسى; ءىىم بولىمشەسى; فسب باسقارماسى; روستوۆ اكىمشىلىگى عيماراتتارىن قورشاپ العانىن حابارلادى.

«ۆاگنەر» توبىنا جاقىن تەلەگرام-ارنالارىندا پريگوجين شويگۋدىڭ ورىنباسارلارىنىڭ بىرىمەن كەزدەسكەنى حابارلاندى.

ۆيدەودا پريگوجين روستوۆتاعى وڭتۇستىك اسكەري وكرۋگتا وتىرعانى جانە قورعانىس ءمينيسترىنىڭ ورىنباسارى يۋنۋس-بەكو ەۆكۋروۆپەن كەلىسسوز جۇرگىزىپ جاتقانى كورىنەدى. اقپاراتقا قاراعاندا، «ۆاگنەر» جەتەكشىسى باس شتاب جەتەكشىسى گەراسيموۆ پەن قورعانىس ءمينيسترى شويگۋدى كەلىسسوزگە شاقىرعان. پريگوجين سونىمەن بىرگە جالدامالى اسكەر دونداعى روستوۆتاعى اسكەري نىسانداردى، ونىڭ ىشىندە اەرودرومدى دا باقىلاۋعا العانىن ايتقان. سوڭعى مالىمدەمەسىندە پريگوجين [ۋكرايناداعى سوعىستا] كەيبىر كۇندەرى ادام شىعىنى مىڭعا دەيىن باراتىنىن ايتقان. «كوپ جەردەن ايىرىلدىق. ولگەن سولداتتار سانى جوعارىعا جىبەرىلەتىن قۇجاتتا كورسەتىلەتىن كورسەتكىشتەن ءۇش، ءتورت ەسە كوپ» دەدى پريگوجين.

رەسەي قورعانىس مينيسترلىگى «ۆاگنەر» جالدامالى اسكەرىنە مالىمدەمە جاسادى ۆەدومستۆونىڭ ايتۋىنشا، جالدامالى اسكەردى «پريگوجيننىڭ قىلمىستىق اۆانتيۋراسى مەن قارۋلى بۇلىگىنە الداپ تارتقان»; قورعانىس مينيسترلىگىنىڭ ايتۋىنشا، «ۆاگنەردىڭ» كەيبىر جاۋىنگەرلەرى «قاتەلىك جاساعانىن ءتۇسىنىپ»، كومەك سۇراعان. ۆەدومستۆو «ۆاگنەر» توبىن اقىلعا كەلىپ، رەسەي قورعانىس مينيسترلىگى نەمەسە قۇقىق قورعاۋ ورگاندارىنا بايلانىسقا شىعۋعا شاقىردى.

ال پۋتين مىرزا رەسەيدىڭ مەملەكەت ارنالارىنان «رەسەيلىكتەرگە، اسكەري جانە كۇشتىك قۇرىلىم وكىلدەرىنە جانە الداۋ جانە قوقان-لوقى ارقىلى قارۋلى بۇلىككە تارتىلعاندارعا» ۇندەۋ تاستادى. ول «ۆاگنەردىڭ ارەكەتىن «تۇتقيىلدان جاسالعان سوققى» دەپ اتاپ، وقيعانى «وپاسىزدىق پەن مەملەكەتتى ساتۋعا» تەڭەدى. «ءبىز ساتقىندىققا كەز بولدىق، شەكسىز امبيتسيا رەسەيگە ساتقىندىق جاساۋعا يتەرمەلەدى» دەدى پۋتين. ول قارۋلى بۇلىككە بارعاندار ءتيىستى جازاسىن الادى دەدى. پۋتين مالىمدەمەسىندە ەۆگەني پريگوجيننىڭ اتىن اتامادى.

ارى قاراي الەم جەلىدە «ۆاگنەر» توبى تۋرالى ءتۇرلى پىكىر ايتىلىپ جاتتى. سونداي-اق ماسكەۋدەن، جالپى رەسەيدەن ازاماتتاردىڭ كەتىپ جاتقانى تۋرالى دا ءسوز بولدى.

ماسكەۋ ماڭىندا م-4 «دون»، م-5 «ورال» جانە م-2 «قىرىم» تراسسالارى جارتىلاي جابىلدى، دەپ حابارلادى ماسكەۋ وبلىسىنىڭ كولىك باسقارماسى. بۇعان قوسا، ياروسلاۆ شوسسەسى دە ءىشىنارا بەكىتىلگەن. بۇعان دەيىن ۆورونەج وبلىسىندا م-4 «دون» تراسساسىنىڭ 464 پەن 777-شاقىرىمىنداعى بولىك جابىلعانى حابارلانعان بولاتىن.

ءتۇس قايتا «پريگوجيننىڭ ءباسپاسوز قىزمەتى» «ۆاگنەر» باسشىسىنىڭ «پرەزيدەنت وتانعا ساتقىندىق جاسادى دەگەن جەرىندە قاتەلەستى. ءبىز وتانىمىزدىڭ پاتريوتىمىز، سوعىستىق، قازىر دە سوعىسىپ جاتىرمىز جانە ەشكىم دە پرەزيدەنت، فسب بولماسا تاعى باسقا بىرەۋدىڭ تالابىنا باس ءيىپ، بەرىلەيىن دەپ وتىرعان جوق. سەبەبى ءبىز مەملەكەتتىڭ جەمقورلىققا، بيۋروكراتيا مەن وتىرىككە مالدانعان كۇيى ءومىر سۇرگەنىن قالامايمىز” دەگەن دىبىستىق جازباسىن تاراتى.

روستوۆتا وڭتۇستىك اسكەري وكرۋگ شتابىندا جارىلىس بولدى. ارتىنشا رەسەي اۋە-عارىش كۇشتەرىنە تيەسىلى كا-52 تىكۇشاعىنىڭ “ۆورونەجدەگى مۇناي قويماسىنا سوققى جاساعانى” تۋرالى ۆيدەو (“ۆاگنەر” توبىندا كا-52 تىكۇشاعى جوق) جاريالاندى. كەي اقپاراتقا قاراعاندا، تىكۇشاق “ۆاگنەر” اسكەرىنە مۇناي قويماسىن باسىپ الۋىنا كەدەرگى جاساۋعا تىرىسقان. بۇل اقپاراتتى تەكسەرۋ مۇمكىن بولمادى. بۇعان قوسا، الەۋمەتتىك جەلىدە “ۆاگنەر” اسكەرىنىڭ تىكۇشاقتى اتىپ تۇسىرۋگە ۇمتىلعانى تۋرالى ۆيدەو دا جاريالاندى.

كەشقۇرىم «ناستوياششەە ۆرەميا» ارناسىنداعى «سيستەما» زەرتتەۋ جوباسىنىڭ ءجۋرناليسى دميتري سۋحارەۆ تىكەلەي ەفيردە بەرگەن سۇحباتىندا ۆلاديمير پۋتين ماسكەۋدەن ۆالدايعا ۇشىپ كەتكەن بولۋى ابدەن مۇمكىن ەكەنىن ايتتى. ونىڭ ايتۋىنشا، كرەملدىڭ تەك رەسەي پرەزيدەنتى ۇشاتىن ەكى ۇشاعى بار، سونىڭ ءبىرى - يل-96. بۇل ۇشاقتى ۆلاديمير پۋتيننەن باسقا ەشكىم قولدانبايدى. ءجۋرناليستىڭ دەرەگى بويىنشا، بۇگىن ماسكەۋدەن «روسسيا» ارنايى ۇشۋ وتريادىنىڭ ءۇش ۇشاعى ۇشىپ شىققان، سونىڭ ءبىرى – وسى يل-96. ول ۆالداي قالاسىنىڭ تۇسىنا بارعاندا راداردان كورىنبەي قالعان. ۆالداي – ماسكەۋدەن 380 كم، سانكت-پەتەربۋرگتەن 140 كم جەردە، كول جاعاسىندا ورنالاسقان قالاشىق. وندا رەسەي پرەزيدەنتىنىڭ رەزيدەنتسياسى بار» دەگەن اقپارات تارادى.

ءتۇن ورتاسىندا، لۋكاشەنكو پريگوجينمەن كەلىسىمگە كەلگەنىن مالىمدەدى. بۇنى لۋكاشەنكونىڭ ءباسپاسوز قىزمەتىنىڭ حابارلادى.

بەلارۋس باسشىسى ءپۋتيننىڭ كەلىسىمىمەن ەۆگەني پريگوجينمەن كەلىسسوز جۇرگىزگەن. ناتيجەسىندە ەكەۋى «رەسەي اۋماعىندا قانتوگىسكە جول بەرمەۋگە» كەلىسكەن. اقپاراتقا قاراعاندا، پريگوجين لۋكاشەنكونىڭ «رەسەي اۋماعىندا ۆاگنەر اسكەرىنىڭ جورىعىن توقتاتۋ تۋرالى» ۇسىنىسىن قابىلداعان جانە جاعدايدى ۋشىقتىرماۋعا كەلىسكەن. «قازىر تۇيتكىلدى شەشۋ ءۇشىن وتە ءتيىمدى جانە ورىندى ۇسىنىس ايتىلىپ جاتىر، ۆاگنەر جاۋىنگەرلەرىنىڭ قاۋىپسىزدىگىنە دە كەپىلدىك بەرىلەدى» دەپ حابارلادى. الايدا، بۇل تۋرالى پريگوجين مەن رەسەي بيلىگى تۇسىنىكتەمە بەرمەدى.

لۋكاشەنكونىڭ مالىمدەمەسىنەن كەيىن ىلە-شالا پريگوجيننىڭ: «جىگىتتەر، مىنىڭدەر، ۇيگە قايتامىز!» دەگەن اۋديوسى جاريالاندى. كەيىنگى اۋديوجازباسىندا پريگوجين «زاتتارىن جيناپ، كەرى قايتاتىندار» دەگەن. سونىمەن بىرگە ول «ۆاگنەر» اسكەرىمەن ءبىر تاۋلىكتە 200 كم جول ءجۇرىپ، «جاۋىنگەرلەردىڭ ءبىر تامشى قانىن توكپەگەنىن» ايتىپ الدا دا «ورىستاردىڭ قانى توگىلمەس ءۇشىن» ماسكەۋ تۇبىندەگى كولوننانى كەرى بۇرىپ، «جوسپار بويىنشا ارتقا قايتىپ، دالاداعى لاگەرلەرىنە باراتىنىن» مالىمدەدى. ونىڭ قانداي جوسپار تۋرالى ايتقانى بەلگىسىز. ول لۋكاشەنكومەن ارادا بولدى دەگەن كەلىسسوز تۋرالى دا ەشتەڭە ايتپادى.