يراننىڭ رەسمي تۇلعالارى جاپپاي سىرتقى كۇشتەردى ايىپتاۋدا

يراننىڭ رەسمي اقپارات كوزدەرىنىڭ حابارلاۋىنشا، سولتۇستىك-شىعىسىندا ورنالاسقان ماشھاد قالاسىندا 4 قاڭتاردان باستاپ, وسىدان تۋرا ءبىر اپتا بۇرىن باستالعان ەرەۋىلدەردى ايىپتاعان حالىقتىق شەرۋلەر باستالدى. شەرۋگە قاتىسۋشىلار «امەريكا ءولىم!»، «يزرايل ءولىم!» دەپ ۇرانداپ، قازىرگى ير رەجيمىن قولدايتىندىقتارىن بىلدىرگەن.

ير-نىڭ جوعارى لاۋازىمدىلارى ارت-ارتىنان مالىمدەمە جاساپ، ەلدەگى داعدارىستىڭ سەبەبىن سىرتقى كۇشتەرگە يتەرۋدە. ايتالىق، باس پروكۋرورى  مۇحاماد جافار مونتازاري يرانداعى حالىقتىق ەرەۋىلدەردىڭ باستى جوبالاۋشىسى رەتىندە اقش ورتالىق بارلاۋ باسقارماسىنىڭ لاڭكەستىكپەن كۇرەس ءبولىمىنىڭ جەتەكشىسى مايكل اندريا دەپ كورسەتتى.

ەلدەگى ىشكى ىستەر دەپارتامەنتىنە قاراستى قارۋلى كۇشتەردىڭ باس قولباسشىسى، گەنەرال-مايور مۇحامماد ءالي جافاري دا مەملەكەتتىك تەلەارنادا ءسوز سويلەپ: «اقش جانە ونىڭ يرانعا قارسى وداقتاستارىنىڭ ەلىمىزدە جاساعان بۇلىگىنىڭ باستى ماقساتى، ادام ءولىمى بولدى دەگىزۋ، ءارى ونى يران ۇكىمەتىنىڭ موينىنا ارتىپ قويدى. الايدا، يراندىقتاردىڭ كوبى ولاردىڭ بۇلىگىنە ىلەسكەن جوق. اقش جانە باتىس ەلدەرى يراننىڭ بەيبىت حالقىنا جانى اشيتىن بولسا، وندا ولارعا سانكتسيا سالماعان بولار ەدى»، – دەدى.

يران كونستيتۋتسيالىق كەڭەسىنىڭ حاتشىسى اياتوللا ءجانناتي كەڭەس مۇشەلەرىنە جاساعان مالىمدەمەسىندە: «اقش، يزرايل، ساۋد ارابياسى جانە ۇلىبريتانيا قاتارلى يراننىڭ قاس جاۋلارى ەلدەگى بۇلىككە قولداۋ كورسەتۋى ولاردىڭ ماقساتى مۇسىلمان حالىقتىڭ تۇتاستىعىن بۇزۋ ەكەنىن انىق كورسەتتى»، – دەگەن.

اتالعان ەلدىڭ ءسىم باسشىسى مۇحامماد جاۆاد زاريف تە ءوزىنىڭ تۆيتتەر پاراقشاسىندا ترامپتى سىنعا الىپ: «اقش پرەزيدەنتى يراندىقتارعا «ەرەكشە قۇرمەت كورسەتۋ ءۇشىن» ەرەكشە جولدى تالدادى.  ول يراندىقتاردى «لاڭكەستەر» دەپ، اقش-قا بارۋىنا شەكتەۋ قويدى، پارسى شىعاناعىنىڭ اتىن وزگەرتكىسى كەلدى، يران يادرولىق كەلىسىمىن بۇزىپ، ەكونوميكالىق قىسىم جاسادى، سۇيتە تۇرا ەلدەگى بۇلىككە قولداۋ كورسەتتى»، – دەپ جازعىردى.

قورعانىس ءمينيسترى مالىمدەمەسىندە: «امەريكالىقتار الەمنىڭ ءار قايسى جەرىندەگى ساتسىزدىكتەرىن وزگەلەردەن كورىپ، سيونيستىك رەجيمنىڭ ستراتەگياسىن ىسكە اسىرۋدا»، – دەگەن.

مىنە بۇلار يراننىڭ رەسمي لاۋازىمدى تۇلعالارىنىڭ ەلدەگى داعدارىسقا قاراتقان كوزقاراستارى. جالپى ەلدە وسىعان دەيىن دە حالىقتى باتىس ەلدەرىنە، اسىرەسە اقش پەن ۇلىبريتانيا، يزرايل مەن ساۋد ارابياسىنا قارسى قويۋ باستى يدەولوگيالىق باعىت رەتىندە ۇستالىپ كەلەدى.

قازىر ەلدە ۇكىمەتتى جاقتاۋشىلاردىڭ ەرەۋىلشىلدەرى جالعاسۋدا، بۇل شەرۋلەردى ۇكىمەت ۇيىمداستىرعان بولۋى دا مۇمكىن. الايدا، بۇل حالىق ساناسىنىڭ ىدىراۋىنا، رەجيمدى جاقتاۋشىلار مەن قارسى تۇرۋشىلار اراسىندا ارازدىققا اپارۋى بەك مۇمكىن. يران ءۇشىن داعدارىستى شەشۋدىڭ جولى حالىقتىڭ ساناسىن الدارقاتۋدان كورى، ناقتى الەۋمەتتىك، ەكونوميكالىق پروبلەمالاردى شەشۋدە قالسا كەرەك.

“The Qazaq Times”