9 ايدىڭ ىشىندە الماتى مەن جەتىسۋ وبلىستارىندا قۇرىلىسى اياقتالعان جولداردان 481 اقاۋ انىقتالعان. ونىڭ 380-نەن استامى رەسپۋبليكالىق ماڭىزى بار كۇرە جولدار. بۇل تۋرالى «جول اكتيۆتەرى ۇلتتىق ساپا» ورتالىعىنىڭ الماتى وبلىستىق فيليال وكىلدەرى ايتتى. ماسەلەن، الماتى-ەكاتەرينبۋرگ باعىتىنداعى تاس جولدا قۇرىلىستىڭ ءجۇرىپ جاتقانىنا 3 جىلدان استام ۋاقىت وتكەن. اسفالتتىڭ قالىڭدىعى 12 سانتيمەتر، ال ەنىنىڭ ۇزىندىعى 9 مەتر 75 سانتيمەتردەن كەم بولماۋى ءتيىس. ماماندار بۇعان دەيىن ءدال وسى ۋچاسكەدە ءۇش بىردەي اقاۋدىڭ انىقتالعانىن ايتىپ وتىر. جول اكتيۆتەرى ۇلتتىق ساپا ورتالىعى الماتى وبلىستىق فيليالىنىڭ ءبولىم باسشىسى رۋسلان قاشقىنبايدىڭ ايتۋىنشا، اسىرەسە تەحنيكالىق قاۋىپسىزدىكتى ساقتاۋ دا ولقىلىقتار كەتەدى.

«ول اينالما جول، شۇڭقىرلار بولعان، ەكىنشىدەن، تەحنيكالىق قاۋىپسىزدىك ساقتالماعان، كاسكالارىن كيمەگەن جۇمىسشىلار. ۇشىنشىدەن، جول-قۇرىلىس ماتەريالى دۇرىس بولماعان. بەتوندار، ارماتۋرالار جابىلماعان، اشىق اۋادا بولعاننان، استىندا توسەنىشتەرى بولماعاننان كەيىن دۇرىس ساقتالماعان» - دەدى جول اكتيۆتەرى ۇلتتىق ساپا ورتالىعى الماتى وبلىستىق فيليالىنىڭ ءبولىم باسشىسى رۋسلان قاشقىنباي.

جولدىڭ ساپاسىن ناقتى انىقتاۋ ءۇشىن ۇلتتىق ساپا ورتالىعى اسفالتتى ويىپ، سىناما الادى، الايدا كەرننىڭ قاي ۋچاسكەنىكى ەكەنى قۇپيا ساقتالىپ، QR-كود ارقىلى زەرتحاناعا تاپسىرىلادى. توعىز اي ىشىندە الماتى قالاسى مەن وبلىسى جانە جەتىسۋ وبلىسىنان 2 مىڭ 500 سىناما وتكىزىلگەن. رەسپۋبليكالىق ماڭىزى بار تراسسادان الىنعان سىنامانىڭ 25, قالا مەن اۋىل ىشىلىكى جولداردان الىنعاندارىنىڭ 40 پايىزى تالاپقا ساي بولماي شىققان.