Irandağı ükimetti jaqtauşılardıñ halıqtıq ereuilderi. Foto: Fars Today7

Irannıñ resmi aqparat közderiniñ habarlauınşa, soltüstik-şığısında ornalasqan Maşhad qalasında 4 qañtardan bastap, osıdan tura bir apta bwrın bastalğan ereuilderdi ayıptağan halıqtıq şeruler bastaldı. Şeruge qatısuşılar «Amerika ölim!», «Izrail' ölim!» dep wrandap, qazirgi IIR rejimin qoldaytındıqtarın bildirgen.

IIR-nıñ joğarı lauazımdıları art-artınan mälimdeme jasap, eldegi dağdarıstıñ sebebin sırtqı küşterge iterude. Aytalıq, Bas prokurorı  Mwhamad Jafar Montazari Irandağı halıqtıq ereuilderdiñ bastı jobalauşısı retinde AQŞ Ortalıq barlau basqarmasınıñ Lañkestikpen küres böliminiñ jetekşisi Maykl Andria dep körsetti.

Eldegi İşki ister departamentine qarastı qarulı küşterdiñ bas qolbasşısı, general-mayor Mwhammad Äli Jafari da memlekettik telearnada söz söylep: «AQŞ jäne onıñ Iranğa qarsı odaqtastarınıñ elimizde jasağan büliginiñ bastı maqsatı, adam ölimi boldı degizu, äri onı Iran ükimetiniñ moynına artıp qoydı. Alayda, irandıqtardıñ köbi olardıñ büligine ilesken joq. AQŞ jäne Batıs elderi Irannıñ beybit halqına janı aşitın bolsa, onda olarğa sankciya salmağan bolar edi», – dedi.

Iran Konstituciyalıq keñesiniñ hatşısı Ayatolla Jännati keñes müşelerine jasağan mälimdemesinde: «AQŞ, Izrail', Saud Arabiyası jäne Wlıbritaniya qatarlı Irannıñ qas jauları eldegi bülikke qoldau körsetui olardıñ maqsatı mwsılman halıqtıñ twtastığın bwzu ekenin anıq körsetti», – degen.

Atalğan eldiñ SİM basşısı Mwhammad Javad Zarif te öziniñ Tvitter paraqşasında Tramptı sınğa alıp: «AQŞ prezidenti irandıqtarğa «erekşe qwrmet körsetu üşin» erekşe joldı taldadı.  Ol irandıqtardı «lañkester» dep, AQŞ-qa baruına şekteu qoydı, Parsı şığanağınıñ atın özgertkisi keldi, Iran yadrolıq kelisimin bwzıp, ekonomikalıq qısım jasadı, süyte twra eldegi bülikke qoldau körsetti», – dep jazğırdı.

Qorğanıs ministri mälimdemesinde: «Amerikalıqtar älemniñ är qaysı jerindegi sätsizdikterin özgelerden körip, sionistik rejimniñ strategiyasın iske asıruda», – degen.

Mine bwlar Irannıñ resmi lauazımdı twlğalarınıñ eldegi dağdarısqa qaratqan közqarastarı. Jalpı elde osığan deyin de halıqtı Batıs elderine, äsirese AQŞ pen Wlıbritaniya, Izrail' men Saud Arabiyasına qarsı qoyu bastı ideologiyalıq bağıt retinde wstalıp keledi.

Qazir elde ükimetti jaqtauşılardıñ ereuilşilderi jalğasuda, bwl şerulerdi ükimet wyımdastırğan boluı da mümkin. Alayda, bwl halıq sanasınıñ ıdırauına, rejimdi jaqtauşılar men qarsı twruşılar arasında arazdıqqa aparuı bek mümkin. Iran üşin dağdarıstı şeşudiñ jolı halıqtıñ sanasın aldarqatudan köri, naqtı äleumettik, ekonomikalıq problemalardı şeşude qalsa kerek.

“The Qazaq Times”