مەترو بەكەتىن ينفەكتسيادان زالالسىزداندىرىپ جۇرگەن سانەپيد ماماندار. فوتو: paryz.kz

الماتىدا كوروناۆيرۋس پاندەمياسىنىڭ ءتورتىنشى تولقىنى اقىرىنداپ باسەڭدەپ كەلەدى. تاپ قازىر قالانىڭ 10 مىڭ تۇرعىنى ەمدەلىپ جاتىر. قازىر رەزەرۆتەگى توسەك-ورىنداردى قوسا ەسەپتەگەندە ستاتسيونارلاردا شامامەن 64% ورىن تولعان. 

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 12 قىركۇيەكتە تىركەلگەن 719 ادامنىڭ 690-ى سيمپتوم بەلگىلەرىمەن، تاعى 29 ادام سيمپتومسىز تىركەلگەن. جەكسەنبى كۇنى 211 ادام اۋرۋحاناعا جاتقىزىلعان.

جالپى قالادا سىيىمدىلىعى 5230 ورىن بولاتىن ينفەكتسيالىق ستاتسيونارلاردا 3383 ادام ەمدەلىپ جاتىر. ولاردىڭ اراسىندا 107 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 316 ناۋقاس جاتىر. 52 ادام ءوجج، 120 ناۋقاس ءينۆازيۆتى ەمەس ءوجج-ىمەن جانە 107 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 6934 ناۋقاس امبۋلاتورلىق دەڭگەيدە باقىلاۋعا الىنعان.

وتكەن سەنبىدە جيىنى 18 ادام كوروناۆيرۋس پەن وعان ۇقساس پنەۆمونيادان قايتىس بولعان.

رەسمي دەرەككە قاراعاندا، الماتى قالاسىندا بيىل اقپاننان بەرى 910 مىڭ ادام ەكپەنىڭ العاشقى، ونىڭ ىشىندە 795 مىڭى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 165 مىڭنان اسا ادام اۋىرعان، ونىڭ 50 مىڭعا جۋىعى تامىزدا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ شيرەك بولىگى الماتى قالاسىنا تيەسىلى بولىپ وتىر.

ەپيداحۋالدىڭ ناشارلاۋىنا بايلانىستى قالىپتى جاعدايدا قولدانىلىپ جۇرگەن 5-7 مىڭ اراسىنداعى توسەك-ورىن 8910-عا دەيىن كوبەيتىلگەن. ستاتسيونارلارداعى ورىن سانى ارتىپ، ءتىپتى جاڭا رەزەرۆتىك فيليالدار ۋاقىتشا ىسكە قوسىلعان ەدى. دۇيسەنبى بۇل 5230 ورىنعا دەيىن قىسقارتىلدى.

The Qazaq Times