قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 4,4 مىڭ ارتىپ، جالپى ەسەبى 900 مىڭنان استى. وسىلايشا قازاقستان «جاعىمسىز ستاتيستيكادا» دۇنيەجۇزىندە حالقى ەڭ كوپ اۋىرعان 36-شى مەملەكەت رەتىندە بىرنەشە اپتادان بەرى ءوز ورنىندا قالىپ وتىر.

ءتورتىنشى تولقىن ەكپىندەي باستاعان شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان، ىندەت قارقىنى ەكى اپتادان بەرى 4-5 مىڭ كەيسكە ماڭايلادى.  دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 8 قىركۇيەكتە كوروناۆيرۋس (كۆي+) جۇققان 4106 ادام، ال 7-ءسى كۇنى  كوروناۆيرۋس پنەۆمونياسىنا (كۆي-) شالدىققان 302 ادام تىركەلدى جانە سەيسەنبىدە 103 قازاقستاندىق (تاڭەرتەڭ 86 ادام دەلىنگەن ەدى، دەنمين تۇزەتۋىنەن كەيىن اقپارات وڭدەلدى – QT) اۋرۋدان قايتىس بولدى. قازىر ەلدە 84 مىڭ ادام (كۆي+ بويىنشا 76 مىڭ، كۆي- بويىنشا 8 مىڭداي) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 24%-ى ادەتتەگىدەي جوعارى ديناميكادا تۇرعان ءبىر عانا الماتى (976) قالاسىنا تيەسىلى. سەيسەنبىگە قاراعاندا كەشە قاراعاندى (529), الماتى (330), شقو (201), اتىراۋ (127), بقو (124) وڭىرلەرىندە ناۋقاستار سانى كۇرت ارتتى.  ال استانا (329), پاۆلودار (229), اقتوبە (222), اقمولا (201), ماڭعىستاۋ (185), قوستاناي (178) وبلىستارىندا ەپيداحۋال ەلەۋلى دارەجەدە وزگەرە قويمادى. شىمكەنت (150), قىزىلوردا (92), سقو (81), جامبىل (79), تۇركىستان (53) وڭىرلەرىندە دەرت قارقىنى تۇراقتى. كەشە، سارسەنبىدە اۋرۋدان ايىققان 6926 ادام ۇيىنە شىعارىلعان. 7 قىركۇيەكتە جيىنى 89 ادام قايتىس بولعان.

#COVID_پنەۆمونياسى قىركۇيەكتىڭ 7-ءسى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 302 ناۋقاس ەسەپكە الىندى. ۆەدومستۆو دەرەگىنشە، بۇل كۇنى سىرقاتتار الماتى (59) وبلىسى،  شىمكەنت (47), جامبىل (40), اتىراۋ (20), ماڭعىستاۋ (20) وبلىستارى مەن الماتى (19) قالاسىندا كوپتەپ انىقتالعان. سونىمەن قوسا، 132 ادام ايىعىپ شىققان، تاعى 14 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 84 مىڭ ناۋقاستىڭ 18 مىڭى اۋرۋحانادا، 65 مىڭى امبۋلاتورلىق باقىلاۋدا. 1390 ناۋقاستىڭ جاعدايى ناشار، ونداعى 346 ادامنىڭ ءحالى وتە اۋىر. بۇدان وزگە 197 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان وبلىسىنان باسقا شقو، سقو، جامبىل، قىزىلوردا وڭىرلەرى «سارى ايماققا» وتكەن. باسقا 12 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 828 مىڭنان اسسا، 1 تامىزدان بىلايعى كوروناۆيرۋس پنەۆمونياسى 72 مىڭعا جۋىقتاعان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 900 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 17,3 مىڭنان اسا ادام (كۆي+ / U07.1 – 10 076, كۆي- / U07.2 – 4611, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 5,7 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,9 ملن-نان اسادى.

The Qazaq Times