الماتىدا كوروناۆيرۋس پاندەمياسىنىڭ ءتورتىنشى تولقىنى ءالى باسەڭدەمەي تۇر. تاپ قازىر قالانىڭ 13 مىڭعا تارتا تۇرعىنى ەمدەلىپ جاتىر. قازىر رەزەرۆتەگى توسەك-ورىنداردى قوسا ەسەپتەگەندە ستاتسيونارلاردا شامامەن 49,7% ورىن تولعان. بۇل تامىز ايىنىڭ ورتاسىنا قاراعاندا ءبىرشاما كەمىگەنى.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 5 قىركۇيەكتە تىركەلگەن 1085 ادامنىڭ 1050-ءى سيمپتوم بەلگىلەرىمەن، تاعى 35 ادام سيمپتومسىز تىركەلگەن. جەكسەنبى كۇنى 273 ادام اۋرۋحاناعا جاتقىزىلعان. بۇل وزگە ايلارداعى كورسەتكىشتەن الدەقايدا جوعارى.

جالپى قالادا سىيىمدىلىعى 8910 ورىن بولاتىن ينفەكتسيالىق ستاتسيونارلاردا 4435 ادام ەمدەلىپ جاتىر. ولاردىڭ اراسىندا 122 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 388 ناۋقاس جاتىر. 56 ادام ءوجج، 150 ناۋقاس ءينۆازيۆتى ەمەس ءوجج-ىمەن جانە 192 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 8640 ناۋقاس امبۋلاتورلىق دەڭگەيدە باقىلاۋعا الىنعان.

سەنبىدە جيىنى 15 ادام كوروناۆيرۋس پەن وعان ۇقساس پنەۆمونيادان قايتىس بولعان.

رەسمي دەرەككە قاراعاندا، الماتى قالاسىندا بيىل اقپاننان بەرى 887 مىڭ ادام ەكپەنىڭ العاشقى، ونىڭ ىشىندە 761 مىڭى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

جالپى پاندەميا باستالعالى قالادا 159,5 مىڭنان اسا ادام اۋىرعان، ونىڭ 40 مىڭعا جۋىعى تامىزدا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ كەمىندە شيرەك بولىگى الماتى قالاسىنا تيەسىلى بولىپ وتىر.

ەپيداحۋالدىڭ ناشارلاۋىنا بايلانىستى قالىپتى جاعدايدا قولدانىلىپ جۇرگەن 7011 توسەك-ورىن 8910-عا دەيىن كوبەيتىلگەن. ستاتسيونارلارداعى ورىن سانى ارتىپ، ءتىپتى جاڭا رەزەرۆتىك فيليالدار ۋاقىتشا ىسكە قوسىلعان.

وسىعان دەيىن باس سانيتار دارىگەر جانداربەك بەكشين ءبىر كۇندە اۋرۋحاناعا جاتقىزىلعاندار سانى 500-دەن اسسا، قالادا لوكداۋن كۇشەيتىلىپ، بلوك-بەكەت قويىلاتىنى تۋرالى ناۋرىز ايىنداعى كريتەريدىڭ قازىر كۇشىن جويعانىن مالىمدەگەن.

The Qazaq Times